الموضوع: وعاد التكييف للحياة

[justify]

اشتريت عربيتي (كارينز 2010) من شهرين ومن يوم ماشتريتها والتكييف بيضعف وكنت مكسل اصلحه ، ويمكن خايف يتكلف كتير في ايام دخول المدارس الصعبة دي ، وكان فيه موضوع في المنتدى بيتكلم عن بتاع تكييف شاطر وأمين فى شبرا اسمه محمد جابر وكنت دايما بافكر اعدي عليه اشوف النظام عنده ايه.

المهم النهارده كنت معدي بالعربية من مكان قريب منه افتكرته وفتحت المنتدى شفت العنوان بالظبط وطلعت على هناك وقلت ابص على الورشة من بعيد اشوفها الاول وبعدين اقرر .. الورشة عبارة عن محل مش كبير لكن نضيف وفيه صنايعية كتير وحاطط جهازين شحن تكييف كومفورت بره المحل وفيه عربيات مرسيدس وجيب وتويوتا موديلات حديثة شغالين فيها فاطمنت ودخلت على المحل مالقيتش محمد جابر موجود وقابلني محمود اخوه وبدأ الكشف على العربية.

قاس الشحن لقى الفريون 14% وعمل تست على جودة الفريون وقالي نكبس (اختبار تسريب في دايرة التبريد ) وبعدين نشحن .. قلتله توكل على الله.

بدأ الكبس وكان فيه تسريب واضح والصنايعي بيحط صابون على المواسير عشان يعرف مكان التسريب مافيش .. السربنتينة تمام .. قالي طالما كده ممكن يكون التلاجة أو الكومبريسور ودلوقتي نكبس التلاجة لوحدها ونجرب .. وأسقط في يدي (ده اللى كنت خايف منه) .. يالا يا عم توكل على الله وربنا يستر .

الراجل بيدور على كونفرتر عشان كبس التلاجة ظهر محمد جابر وجه بص على العربية وساعد الصنايعي في توفيق كونفتر وبدأ الكبس .. الحمد لله تمام .. نشوف بقى الكومبريسور .. الصنايعي لسه هيفك الكومبريسور قاله محمد جابر استنى .. نزل بص على العربية وشيك على كل الوصلات .. قال للصنايعي الكومبريسور في الغالب سليم .. ركب المواسير واكبس تاني ممكن تكون المشكلة كانت فى الكبس والدايرة تمام .. وفعلا الراجل كبس .. تمام التمام .. استنى شوية .. تمام التمام .. كمان شوية .. تمام التمام .. اشحن يا عم .

بدأ الصنايعي الشحن تمام التمام .. غسيل السربنتينة بالمياه .. تنضيف الفلتر .. مافيش فلتر .. لازم نركب فلتر يا باشا عشان نحافظ على التلاجة .. ركب يا عم وأمرنا لله .. ركبنا الفتلر وجربنا التكييف .. تلاجة تلاجة .. تمام ياباشا ولو حسيت بأي حاجة تعالى فى اي وقت والمكان مكانك .. الحساب يا باشا .. كبس وشحن وفلتر وغطا بلاستيك 200 جنيه (أحمدك يا رب) .. سلام سلام وطلعت على الشغل مستمتعا بالنسيم العليل للتكييف .

ملاحظات على الزيارة اللى استمرت حوالى 3 ساعات

- الورشة جيدة جدا وسمعة الراجل في المنطقة زي الفل ومعروف جدا هناك.

- اصحاب العربيات الموجودة مرتاحين جدا من تعامل الراجل وواحد كان عنده مشكلة وشكو فى الكومبريسور وغيروه واستمر العيب وكان الراجل جاي يرجع الكومبريسور وياخد فلوسه وماحصلش أي مشكلة.
- الراجل أكد عليا وانا ماشي انى ارجعله تاني بعد كام يوم نتأكد ان كله تمام.

[/justify]

اللون الاحمر مخصص فقط للمدخلات الادارية والاشرافية

مشرف 4 ب
12/9/2012
10.16 pm