الموضوع: تجربة تصليح حزام الأمان - ابيزا 99

السلام عليكم ورحمة الله وبركاته

أخواني في قسم سيات عاملين ايه؟؟

طبعا انتم عارفين اني كنت عملت حادثة بعربيتي من حوالي سنة كدة والحمد لله علي كل حال انا اهو بحاول اصلحها شوية بشوية وماشي علي مهلي واقل من مهلي كمان.

اثناء الحادث المروع كنت بفضل الله رابط الحزام (ودي كانت اخر مرة ربطت فيها الحزام)
وبعد الحادث والسمكرة والذي منه اكتشفت تعطل حزام الأمان.
بتاع قطع الغيار الأستيراد قالي هجيبلك واحد ان شاء الله وضربلي رقم خزعبلي
بقوله ليه ياعم الحاج؟؟؟ قالي اصل الحزام دة علي اير باج - وانت الأير باج عندك ضرب وعشان كدة الحزام باظ

سألت هنا في القسم - يعني ايه يا جدعان الحزام علي اير باج ؟؟؟ (علي اساس ان الأتنين من وسائل الأمان؟؟) المهم طبعا محدش فاهم يعني ايه الكلام دة

من كام يوم واحد حبيبي بتاع قطع غيار واكسسوارات قالي تعال اشوفلك الحزام ماله - وقالي انه عمل احزمة عربيات كتير حديثة ومفيش اي حاجة اسمها حزام امان علي اير باج والكلام مالوش اي اساس من الصحة. وان كل أحزمة الأمان في جميع السيارات بنفس الفكرة وهي انها بكرة ملفوفة علي ملف زمبرج (الزمبلك بتاع ألعاب الأطفال) والبكرة دي راكبة علي ترس والترس دة مش عارف بيلف مع ايه تاني كدة عشان مع اللفة الفجائية يفرمل وبلا بلا بلا ورغي كتير مفهمتوش.

امبارح خدت بعضي وروحتله وقولتله مش هنعمل الحزام بقي ياباشا ؟؟؟

وبالفعل بدأ يفكك ويكشف عشان يشوف الدنيا فيها ايه؟؟

اول ملاحظة - ان الحزام قافش ومش راضي يلم - فقالي تلاقي الزمبلك جوة معلق ولا حاجة ومانعه انه يلم
لأن طبعا العيب الشائع ان الحزام مهما تشد فيه فجأة ما يفرملش لكن عندي الوضع جديد شوية وهو ان الحزام خارج لأخره ومش بيلم

تاني ملاحظة - ان التقفيل محكم جدا ومتقفل علي الحزام بطريقة عبقرية جدا والمكنة بتاعة الحزام اللي موجود فيها البكرة اللي بيلف عليها الحزام مدفونة بشكل احترافي في القايم بين البابين

ثالث ملاحظة ودي كانت الصاعقة - بعد مافك جميع المسامير الرابطة للحزام والمكنة لقي ان المكنة مربوطة بواير حديد في حاجة اسطوانية شبه المساعد
قالي ايه دي ؟؟؟؟ جه في دماغي الأير باج
قولتله مش عارف - بس انا مش قولتلك ان الحزام بتاع عربيتي علي اير باج ؟؟؟
قالي لا دي مش اير باج دي حاجة تانية بس انا مش عارف دي ايه.
وقالي انا فكيت احزمة عربيات كتير وقليل لكن عمري ما شوفت عربية بالأتقان دة لدرجة انه قالي ان جميع احزمة الأمان في جميع العربيات ابتداء من الفيات 128 لحد السيراتو والألنترا 2012 بنفس الفكرة تزيد او تقل بعض المكونات الطفيفة لكن مش بالشكل دة
لدرجة انه قالي انه فك حزام امان في بي ام 318 جديدة والحزام كان متركب في الكرسي مش في القايم ومع كل تعقيده في الفك والتركيب الا انه علي نفس الفكرة الشائعة في كل العربيات وبردو مش زي بتاع الأبيزا..
طبعا بعد ما فك لقيت كل فتفوتة في مكونات الحزام عليها الختم الشهير المعروف للعلامة الأكثر احتراماً في تاريخ صناعة السيارات - علامة VW و AUDI
لدرجة كان في جزئية صغيرة جدا عليها العلامة لا تري بالعين المجردة
ايه الأتقان الشديد دة ؟؟؟!!!
لقيته فرحان جدا وبيقولي هتلر يا باشا مش اي كلام

طلعنا الجزء الأسطواني واللي كان بايت في العتب بجانب الكرسي وماشي مع العتب بتاع العربية تحت الموكيت والجزء البلاستيكي بجوار الجوان بتاع الباب
اتاريه اسطوانة مفرغة واغلب الظن انها فعلا حاجة زي الأير باج لو الحزام لف بشكل مفاجئ وقوي بيلف البكرة بقوة وهي بدورها بتشد الواير بسرعة وقوة يقوم الواير ضارب حاجة مكنتش موجودة عندي وبيفرغ الأسطوانة (دة طبعاً تحليلنا المتواضع للموضوع للحاجة الغريبة اللي مكناش فاهمينها)

طبعاً الأختراع دة كله الغرض منه هو عند حدوث اي حادث لا قدر الله الحزام يقوم بدوره بفعالية وبعد انتهاء مهمته (وهي حماية الركاب) ينتهي عمره الأفتراضي علي كدة ولا يتم صيانته او تصليحه مرة اخري كما يفعل البعض منا - وكما توصي معظم الشركات المصنعة للسيارات -
ولكن يبدو ان شركة فولكس لها رأي اخر مختلف عن باقي الشركات المصنعة - وهو اجبار قائد السيارة علي تغيير احزمة الأمان ولم تكتفي فقط بالتوصية.

المهم
طلعنا الحزام برة العربية وصديقي قام بتفكيكه الي اجزاء صغيرة جدا وبدأ يحاول يحرر البكرة من الواير ولكن محاولاته باءت بالفشل ولم يستطع تحريرها مما أضطره الي قص الواير وأخراجه بعد عناء شديد وجذب من كلا منا باحد الأطراف

وبعد فك الواير من البكرة والغاء قطع كثيرة من الحزام لم نستطيع فهم الغرض منها او دورها حتي في منظومة الحزام - تم اعادة تشغيل الحزام مرة اخري وعودته للعمل مجدداً ولكن بضعف شديد عن ما عهدناه عليه من كفاءة.

واعتقد كل هذا التعقيد والحرص علي عدم جدوي الصيانة هو اجبار صاحب العربية علي تغيير الحزام بعد الحادث وتعطل منظومة حزام الأمان.

في نهاية التجربة
احب انقلكم اعجاب وانبهار صديقي بمنظومة الأمان في سيارات سيات وصديقي هذا يعمل في مجال أكسسوارات السيارات من ما يزيد عن ال25 عاماً سواء في تجارته الخاصة او مع والده ولم يري اتقان او احترافية كما رأي امس في سيارة متواضعة من احد الشركات التابعة لمجموعة فولكس فاجن والتي تحمل علامة سيات وجديرة ان تحمل شعار فولكس علي كل قطعة صغيرة كانت او كبيرة منها.

وعندما يقال ان الصانع الألماني يهتم بعوامل الأمان فأنه حقا يهتم بعوامل الأمان والمتمثل في ابهي صوره في جزء صغير وابسط واول عامل امان وهو حزام الأمان وقد فهمت الأن لماذا سمي بحزام الأمان.

تحياتي وشكري وتقديري لشركة فولكس وسيات اللتين يهتمان بكل صغيرة وكبيرة وتخصيص فريق عمل من المهندسين والفنيين لتطوير جزء لم يكن ليخطر علي البال وبالقياس علي جميع اجزاء السيارة فأنا اتوقع انبهار وتكنولوجيا في باقي مكونات السيارة.

صور الحدث






شكرا لمتابعتكم
وانتظروني في تقرير جديد ان شاء الله

اخوكم
محمد سيد