عاوز اعمل مفتاح للبرسونا 2009

**gadieb** · 13-09-2012 12:35 PM

صباح الفل على احلى منتدى
يا شبابا انا جبت بروتون بيرسونا 2009 بس الكيلومتر بتاعها عالى شويه عامله 147 الف كيلو
بصراحه العربيه كويسه والكلام ده اكدهولى المهندس عصام فى مركز عصام وصفا
طبعاً غيرت تيل الفرامل اماى وخلفى جبت الامامى ريمسا والخلفى مليزى الريمسا بــ 170 جنيه و الماليزى ب120 جنيه وغيرت سير الكاتينه وسير الدينامو
انا بس عندى مشكله عاوز اخد رايكم فيها للاسف صاحب العربيه ضيع المفتاح الثانى وده طبعاً مقلق لو ضاع المفتاح الى معايا حتبقى حوسه
فياريت تقولولى احسن مكان اعمل فيه مفتاح اسبر ويتكلف كام على شان انا سمعت انه ب1000 جنيه فى التوكيل وطبعاً كده غالى جداً وهل هو مفتاح بصمه ولا عادى يا ريت تفيدونى وجزاكم الله خيراً
واسف على الاطاله
شكراً جزيلاً

**khalid_adel** · 13-09-2012 05:02 PM

هو مفتاح مشفر وبيتعمل بره بحوالي 200 او 250 بالكتير
بس اماكن مش فاكر دلوقتي ممكن تعمل بحث في المنتدي (مفتاح مشفر) حتلاقي مشاركات تفيدك وتتصل بالمحل واسأل عادي

**gadieb** · 16-09-2012 02:59 PM

المشاركة الأصلية كتبت بواسطة a7mad_mo7amad6

الف مبرووووك يباشا
هي عربيه حلوه فعلا
ممكن اعرف غيرت سير الكاتينه بكام

الله يبارك فيك يا باشا
انا اشتريت سير الكاتينه من محل المدينه فى شارع دمشق وعلى فكره ده ارخص محل لقطع غيار البروتون
جبته بــ 120 جنيه وجبت سير دينامو من الحرفيين بــ 80 جنيه ماركه اسمها كونتيننتال
ومصنعيه تركيب السيور 100 جنيه
وبالنسبه لسعر فلتر الهواء الاصلى بتاعها بـــ 50 جنيه من محل المدينه وسير الدينامو البوش الاصلى عنده بـــ 80 جنيه بسعر الكونتيننتال الى جبته من الحرفيين. بس هعمل ايه كنت مضطر اشتريه من الحرفيين وقتها

**a7mad_mo7amad6** · 16-09-2012 11:06 PM

والله مستني اجابتك من يومها :)
طيب سير الكاتينه ده الاصلي والا صناعته ايه
علشان الاصلي عند عصام وصفا ب 340 !!
طبعا رقم خزعبلي

**Al-Farooq** · 17-09-2012 04:26 AM

بلاش سير الكاتينة بالذات تشتريه من خارج التوكيل ، علشان ضمان الموتور لو حصل حاجة لاقدر الله

**gadieb** · 17-09-2012 11:56 AM

المشاركة الأصلية كتبت بواسطة a7mad_mo7amad6

والله مستني اجابتك من يومها :)
طيب سير الكاتينه ده الاصلي والا صناعته ايه
علشان الاصلي عند عصام وصفا ب 340 !!
طبعا رقم خزعبلي

بص يا باشا انا هقولك حاجه للامانه بالنسبه لعصام وصفا بشهاده عيلتى واصدقائى ملاك البوتون من احسن الاماكن الى تودى فيها عربيتك وتطمن للمصنعيه لكــــــــــــن قطع الغيار مغلونجى جداً بس اقل من التوكيل طبعا ونفس قطع الغيار الى بيبعها محل المدينه فى شارع دمشق لانه ما بيشتغلش غير فى الاصلى
طيب انا هقولك على حاجه صغيره لو وقتك يسمح
روح لمحل المدينه الى فى شارع دمشق وقوله انا عاوز اتفرج على تيل الرامل الريمسا وامسكه فى ايدك واحفظ شكله (عند المدينه بــ 170 جنيه) وروح لعصام وصفا وقوله انا عاوز اغير التيل وقوله عاوز اشوف الانواع الكويسه لى عاندك طبعاً هيكون منهم الريمسا واساله بكام وهتصعق لما يقولك 420 جنيه
انا باكد ان سير الكاتينه الى جبته اصلى وبالمناسبه سير الدينامو البـــــــــــوش عند المدينه بــ 80 جنيه طبعاً لو سالت عليه فى اى توكيل ده كمان هتلاقى سعر تانى خـــــــــــالص يا جماعه بجد التوكيلات بتكسب مكسب خرافى من قطع الغيار

**a7mad_mo7amad6** · 17-09-2012 02:11 PM

الف شكر ليك يباشا :)

**khalid_adel** · 18-09-2012 03:17 AM

انا بفكر في جين 2 بسبب الاسعار الحلوه دي ماشاء الله
طب المدينه ده عنده باقي قطع الغيار ولا الصيانات بس
يعني عنده فوانيس , طرمبه مثلا ولا ماستر فرامل , ردياتير ؟؟ كده يعني