شوية ضحك : هل فيه عربيات نحس ؟
لو حد حس مرة ان العربية اللي معاه وشها نحس يحكيلنا تجربته :)
انا حابتدي حكايتي مع عربيتي النحس اللي لسة بايعها امبارح .... اللي أكدلي ان العربية دي نحس التالي :
-بعد ما اشتريتها لقيت رقم الشاسيه مكتوب غلط في الرخصة بتاعة صاحبتها وأجلت تسليم باقي المبلغ لغاية ما صاحبة العربية صلحت الرخصة والتوكيل اللي كان مكتوب فيه رقم الشاسيه الغلط
-كل ما اصلح فيها حاجة محتاجة صيانة لازم حاجة تانية تبوظ عمري ما حسيت ان العربية مش محتاجة حاجة
-جيت ارخص باسمي لفيت السبع دوخات واخدتلي اجازة اسبوع من شغلي في رمضان علشان انقل الملكية لمرور مختلف
-البطارية انسرقت وجيت اشتري بطارية سايلة جديدة قعدت 6 شهور معايا وباظت و بدلت البطارية وبعدها ب6 شهور تانيين باظت برضه لغاية ما جبت بطارية جافة.... يعني اشتريت 3 بطاريات في خلال 4 سنوات ده غير البطارية القديمة اللي انسرقت وهي حالتها ممتازة
-جيت ابيعها خسرت فيها نتيجة انخفاض اسعار العربيات القديمة حاليا عن اسعار سنة 2008 ده غير المصاريف اللي انا صارفها عليها ......
- جيت اجيب شهادة مخالفات قالي لازم اجيب شهادة مخالفات من مرورها القديم .... مش عارف ليه !! وبالتالي ما لحقتش اخلص المشوار لاني كنت يدوب مخلص مشوار الشهر العقاري لعمل توكيل
-التوكيل بعد ما عملته ورجعت بيه جيت اديه لصاحب العربية الجديد اكتشف صاحب العربية ان الاسم اللي التوكيل فيه اختلاف عن اسمه اللي في البطاقة اللي الموظفة المسطولة ما خدتش بالها منه وانا من لخمتي وزحمة الشهر العقاري ما اخدتش بالي برضه لان الاختلاف في حرفين في اسم الجد ......
- ادعولي بقي بعد ما اخلص مشوار الشهر العقاري ده تاني العربية ما ترجعليش لاني اصبحت متأكد ان وشها نحس فعلا وخايف فعلا ترجع تاني ههههههههه
احمد ربنا ربك ما بيجيبش حاجة وحشة ابدااااا
اقتباس:
المشاركة الأصلية كتبت بواسطة ahmed metwaly
طيب انت سهله
انا بقئ بعت عربيتي القديمه وكانت عربيه اصيله
واشتريت عربيه تانيه شاهين العربيه بجد كانت فوق الممتاز صاحبها بعها عشان عايز مصاريف علي الموتور وكلها حجات بسيطه والحمد لله عملتها وجبتها بسعر خيالي وكانت بتجبلي مكسب 5000 جنيه بعد لما اشتيرتها بساعه والي كان بيشتري تاجر
العربيه فبريكا دواخل رشه نضافه مفيهاش اي اعمال سمكره
المهم اول اسبوع سرفيس واقف بيزود الكوتش وحظي الهباب نزلت اسأل علي بطريه والسرفيس راجع خبطلي الرفر اليمين من ورا فنوس الاشاره في مكان رخم وغتت
قولت عادي بتحصل وسبتها علي كدا تاخد العين
المره التانيه لقيت واحد خبطلي الشنطه عجنها في بعضها بمعني الكلمه وهي كانت واقفه في باركنج
روحت سمكرت الشنطه ورشتها من جوه مع اني كنت بتقطع والواد بيرشها بس هعمل ايه واصبحت العربيه رشه شنطه بعد لما كانت رشه بره نضافه بس وفيها شغل سمكره كمان وتسخين في الرفرفين الخلفيين بقيت زعلان جدا
التالته جي من البلد الساعه 2 بليل والساعه دي بيطلع فيها الناس الي مش بتعرف تسوق تتعلم وواحد راكب جيب جبلي بابين ورفر شمال ورا بالاكصدام الحديد كان بيزق العربيه علي الرصيف
رابع خابطه من اسبوع ركنتها علي التراب ونزلت اجيب سجاير من الصف التاني واحد ابن حلال راكب نص نقل بيعدي عربيه في الاتجاه المقابل دخل في وش العربيه انهي معالم العربيه جبت رفر والتاني اتعدل وجبت فردتيين كوتش بدل الي باظو وكبوت واكصدام وشبكه وفوانيس واللذي منه
العربيه دي جايبها من شهرين وكانت فبريكا دواخل ورشه بره نظافه ومفيهاش نقطة تسخين حاليا رشه بره وجوه ومتسمكره ومسخنه في كل مكان
الحمد لله احمد ربنا ربك ما بيقدرش وحش ابدااا
بس انا مش عارف بقي انا اللي نحس و لا العربية بص يا سيدي
كان معايا لادا 1982 عمرها ما قلت معايا و لا عملت الدنيئة ابداااا و كانت حتي لو عطلت تعطل تحت البيت اتبطرت عليها و قلت اركب مكيف بعتها و جبت بي واي دي زيرو بعد ما حينها المرتبات انخفضت 30% و لقيت اني مش هاقدر ادفع القسط الا علي حساب بيتي بعتها بعد 3 اسابيع و خسرت فيها مبلغ محترم المهم قعدت ادور لحد ما لقيت عربية فورد اسكورت
كل الناس قالولي بلاش صيانتها مقرفة و قطع غيار غالية كشفت ع العربية عند اكتر من واحد و كلهم قالوا حالتها ممتازة و بما اني من هواة الاوروبي قلت هي دي و حينها قبل العيد باسبوع و بعد ما استلمتها و انا مروح قطعت مني كهربا ع الدائري و بطلت نزلت ع الكهربائي قالي بطارية قلت بسيطة غير البطارية و من البطارية لمساعدين خلفي و بعدين مقصات و مساعدين أمامي ثم طرمبة باور ثم علبة دريكسيون ثم سخونة غير مفهومة ما كانتش موجودة قبل كده قالوا شكمان غير الشكمان ثم الترموستات ثم..ثم...ثم.... و كل ده بفلوس ووقت و العربية باتت عند الميكانيكي اكتر ما باتت معايا اخر حاجة الدينامو قطع خالص و مااات و خد معاه البطارية و انا رايح اعمله من عشر ايام عملت حادثة غريبة المنظر في مطلع كوبري غريب الشكل و كنت ماشي بالراحة والله و ماعرفش ايه اللي حصل لقيت الناس بتفتح عليا باب العربية و بتقولي احمد ربنا انك سليم و ما طرتش من فوق الكوبري ؟؟؟؟ ووش العربية راح بكل طقم التبريد اللي لسة متغير ومعاه الكارتيرة وقواعد الموتور و هلم و من ساعتها راميها في الحرفيين و ماليش نفس اسال عليها
و باسال نفسي هي العربية اللي نحس ؟؟؟ و لا انا ؟؟ و لا ده ذنب اللادا اللي اتبطرت عليها ؟؟؟؟؟؟