العربيه لفت 180درجه بس ربنا سترها

**Galilioz** · 15-09-2012 10:29 PM

فى البدايه عربيتى موديل 2010 مشتريها فى 5-2010 وعامل بيها حوالى 26 ألف كيلو ومتابع صيانات دوريه فى التوكيل
المهم انا من اسبوع كنت مسافر مطروح بالعربيه كنت ماشى على سرعه 160تقريبا المهم سمعت صوت دادقه كده افتكرت ان الطريق متعرج انتوا عارفين الطرق بتاعتنا فجاه انت بتلاقى نفسك الطريق بيسفلتوه والارض زفت الكلام ده فى طريق وادى النطرون الساعه 9صباحا المهم روحت دوست فرامل خفيفه عشان اهدى بس للاسف الدقدقه دى طلعت مش بسبب ان الطريق متعرج لا طلع ان العجل اللى وراه شمال ضرب سلك واتقطع وللاسف بعد ما اديت فرامل العربيه عامت منى وهربت منى جريت شمال وانا كنت فى الحاره الشمال حاولت المها يمين هربت منى خالص وراحت لفه 180درجه وبقه وش العربيه للطريق القادم الحمد لله مكنش ورايه غير ميكروباص واول ما شاف كده راح داخل فى الرمل فى الناحيه الشمال من الطريق لان عربيتى وقفت فى الناحيه اليمين من الطريق ربنا ستر وحصل كملت بالاستبن للعالمين واشتريت عجل جديد من هناك وركبته بس انا الان مش مطمن لان فيه ناس قالولى مدام وحده عملت كده يبقى كله هيعمل زيها والعربيه لما بتشتريها جديده بيكونوا حاطين فيها عجل قديم من عندهم عشان يقللوا فى التكاليف وخاصه انها تقفيل مغربى مش فرنسى هيخافوا على اسمهم
وناس قالولى لا عادى بتحصل وكمل بالعجل عادى
وناس قالولى غير العجله التانيه اللى قدام اضمن
عايز اعرف رايكم ايه اغير عجله كمان قدام ولا اغير التلاته الباقين ولا استنه لحد ما اكمل ال40 أو ال60 ألف؟؟؟
وانا عندى صيانه فى التوكيل يوم الخميس هل ممكن اطلب منهم حاجه هناك او يفيدونى فى حاجه؟؟؟

**ali_333** · 15-09-2012 11:28 PM

حمدا لله على سلامتك
بلاش سرعات عالية انت ماشي مهما كان على كوتشات لو ماشي على كوتشات من حديد اقولك ماشي

لو منك اطلع عالتوكيل لو عيب كوتشات اغير الاربعة

**dr_mustafa_ali** · 16-09-2012 12:10 AM

انت ما غيرتهاش من اول لما جبتها ؟؟؟

**Ahmed A Rahman** · 16-09-2012 12:13 AM

ضمان الكاوتش مش حيغطيهم لان ضمانهم قليل جدا

طلعت سفر وطريق العلمين وماشي على 160 ومش عارف حالة الكاوتش عاملة ازاي ؟؟؟

المفروض تشيك على الكاوتش كل 3 اشهر وتعمل روتيشن كل 10000 وتحط نيتروجين

وقبل السفر المفروض تشيك ثاني خصوصا طريق العلمين يا راجل 130 كيلو مفيهوش عابر سبيل

الحمد لله ان حضرتك سليم

انا شايف كمل لغاية ال 30 وغيرهم الاربعة او غيرهم دلوقتي أأمن على حياتك.

بلاش تسمع لكلام صاحبك اللي بيقول فيه عجلة قديمة, احنا مش شاريينها من وكالة البلح

**Galilioz** · 16-09-2012 01:33 AM

المشاركة الأصلية كتبت بواسطة ali_333

حمدا لله على سلامتك
بلاش سرعات عالية انت ماشي مهما كان على كوتشات لو ماشي على كوتشات من حديد اقولك ماشي

لو منك اطلع عالتوكيل لو عيب كوتشات اغير الاربعة

الله يسلمك ياباشا بس التوكيل عمره ما هيعمل حاجه هو انا اول مره اتعامل مع التوكيل ده
التوكيل بتاعنا من اسوء التوكيلات فى مصر

المشاركة الأصلية كتبت بواسطة dr_mustafa_ali

انت ما غيرتهاش من اول لما جبتها ؟؟؟

اكيد مغيرتهاش انا عامل 26 ألف كيلو بس

المشاركة الأصلية كتبت بواسطة Ahmed A Rahman

ضمان الكاوتش مش حيغطيهم لان ضمانهم قليل جدا

طلعت سفر وطريق العلمين وماشي على 160 ومش عارف حالة الكاوتش عاملة ازاي ؟؟؟

المفروض تشيك على الكاوتش كل 3 اشهر وتعمل روتيشن كل 10000 وتحط نيتروجين

وقبل السفر المفروض تشيك ثاني خصوصا طريق العلمين يا راجل 130 كيلو مفيهوش عابر سبيل

الحمد لله ان حضرتك سليم

انا شايف كمل لغاية ال 30 وغيرهم الاربعة او غيرهم دلوقتي أأمن على حياتك.

بلاش تسمع لكلام صاحبك اللي بيقول فيه عجلة قديمة, احنا مش شاريينها من وكالة البلح

انا اكيد مشيك على الهوا قبل ما اسافر
حاله الكاوتش ايه معتقدش ان الواحد ممكن يكون عنده قلق من كاوتش مستخدمش اكتر من 25 ألف كيلو اومال العجل اللى ما شاء الله ممحى ده اللى بنشوف الناس ماشيه بيه يعملوا ايه بقه

المشاركة الأصلية كتبت بواسطة MohammedAladel

ألف سلامة ليك بس بجد حرام عليك السرعة دى

ياريت تقولنا الكاوتش نوعه إيه ؟؟؟

الله يسلمك ياباشا وبعدين فين ايام السرعه العاليه انا لما كنت بروح بيها السخنه كنت لازم اوصل لل190 ومصور العداد 190 قبل كده بس معتقدش بعد كده هيجيلى قلب اجيب ال190 تانى

الكاوتش هو الاصلى بتاع العربيه انا لسه مغيرتهوش عامل بيه 26 الف كيلو بس

**pharmacology** · 16-09-2012 01:42 AM

هو المفروض عمر اي كاوتش عربية حوالي 40 الف كيلو .. طب ده بالكيلومترات لكن هل يوجد عمر للكاوتش بالسنين ؟؟ يعني لو واحد مثلا فضل معاه كاوتش العربية 5 سنين وعمل بيه مثلا 35 الف كيلو هل ده هيكون في حيز الامان للكاوتش ؟؟ ياريت الاجاية من المختصين .. وحمدا لله علي سلامتك وبلاش فعلا السرعات العالية دي وربنا يسلمك ويسلمنا جميعا من شر الطريق

**pharmacology** · 16-09-2012 01:44 AM

المشاركة الأصلية كتبت بواسطة ahmed a rahman

المفروض تشيك على الكاوتش كل 3 اشهر وتعمل روتيشن كل 10000 وتحط نيتروجين

معلش يعني ايه روتيشن كل 10000 كيلو ؟ ؟؟؟

**Egyzizo** · 16-09-2012 03:32 AM

المشاركة الأصلية كتبت بواسطة pharmacology

هو المفروض عمر اي كاوتش عربية حوالي 40 الف كيلو .. طب ده بالكيلومترات لكن هل يوجد عمر للكاوتش بالسنين ؟؟ يعني لو واحد مثلا فضل معاه كاوتش العربية 5 سنين وعمل بيه مثلا 35 الف كيلو هل ده هيكون في حيز الامان للكاوتش ؟؟ ياريت الاجاية من المختصين .. وحمدا لله علي سلامتك وبلاش فعلا السرعات العالية دي وربنا يسلمك ويسلمنا جميعا من شر الطريق

ست سنين .. دول عمر الكاوتش الافتراضى ..
وبتعرف تاريخ صناعة الكاوتش من طباعة غائرة على جانب الكاوتش كما هو موضح فى الصورة. هتاخد آخر 4 أرقام على اليمين وأول رقمين منهم هم رقم الأسبوع اللى اتصنع فيه الكاوتش (من 1 إلى 52 لأن السنة 52 أسبوع) والرقمين التانيين هم سنة الصنع ، يعنى مثلاً فى الصورة الكاوتش ده اتصنع فى الأسبوع الثامن من سنة 2006. أول 3 أرقام مالناش دعوة بيهم لأنهم كود المصنع.

والمفروض برضه تخللى بالك من التاريخ ده وانت بتشترى الكاوتش وتختار الكاوتش ذو التاريخ الحديث بقدر الامكان.

وده مثال تانى التاريخ فيه فى مربع مستقل بعيد عن كود المصنع (الأسبوع الثالث من سنة 2004)

**mohamed1979** · 16-09-2012 11:56 AM

انا رأي ان الكاوتش كده كان مستهلك
واضح ان استخدامك للعربيه قليل 3سنين و 26الف يعني العربيه بتقف كتير علي الكاوتش بدون حركه و الموضوع ده يخلي الكاوتش يضعف السلك الداخلي بيضرب زي ما حصل معاك
علي فكره الكاوتش اكتر من 3 سنين خطر في العربيه حتي لو كان عامل كيلو متر قليل

-

الموضوع: العربيه لفت 180درجه بس ربنا سترها

LinkBack

أدوات الموضوع

عرض

-

-

-

المواضيع المتشابهه

الحمد لله ربنا سترها

ألحمد لله ربنا سترها معايا :)

الحمد لله ربنا سترها

ربنا سترها والحمد لله

الحمد لله ربنا سترها معايا

الكلمات الدلالية لهذا الموضوع

المفضلات

المفضلات

ضوابط المشاركة