الموضوع: عملت زرجينه و عدت على خير

مساء الخير ياشباب
كان عندي شك ان فيه حدفه خفيفه يمين و انا مسافر على الصحراوي قلت يا واد اظبط زوايا عشان تحافظ على الكاوتش الجديد
المهم رحت على توكيل بريدجستون اللي في عباس العقاد و كانت الصدمه لقيت العامل بيقول لي العجله اليمين قدام خدت مطب و راجعه تلات اربع سم و لازم تطلع لقدام بزرجينه و طبعا فاكرين المطب بتاع طريق السويس اللي خدته و فرقع لي العجله و دبسني في اربع فرد
طبعا عشان انا عارف الموضوع ده من زمان ايام ال١٢٨ و الريتمو وانه بيبوظ اكتر افتكرت لاول وهله ان العربيه جابت شاسيه من المطب لقيت العامل بيطمني و بيقول لي الموضوع بسيط و ان القنطره مساميرها اللي ماسكه العفشه هي اللي اتحركت و انه هيبعتني عند واحد ممتاز عنده جهاز مخصوص اليكتروني عشان العربيه ترجع على الشعره و اداني عنوانه في الحرفيين
المهم مشيت و انا متضايق و مش عارف اتصرف ازاي و خصوصا لما عملت صيانة ال ٣٠ الف في التوكيل طلبت في امر الشغل الكشف على الجنب بتاع المطب و قالوا سليم و زي الفل و طبعا هما كبروا دماغهم و لا كشفوا ولا نيله عشان لو جابوا مسطره و قاسوا مسافة العجله من الرفرف كانوا هيشفوها انما نقول ايه في قلة الضمير رغم انهم كانوا عمولوا كام حاجه كويسه في الضمان
اتكلت على الله و رحت الحرفيين لقيتها و رشة سمكره كبيره و فيها جهاز استعدال الشاسيه بالكومبيوتر و محطوط عليه مرسيدس e250 الشكل الجديد فضلت مستني ساعه لما نزلوها و طلعوا عربيتي و اكدوا لي ان الموضوع سهل و بعيد عن الشاسيه قعدوا يربطوا العربيه بالسلاسل و مافيش عشر دقايق كانوا منزلينها بعد ما ربطوا العفشه
المهم ان الموضوع اتعمل من غير ما يحلوا الفرده و لاحظت و هم بيربطوا ان العفشه مفكوكه عشان الصنايعي مش كان بيقرط لا ده كان زي ما يكون بيربط حاجه مفكوكه و طبعا شكلها عمرها ما اتربطتت من و هيا على الزيرو و ده برضه كنت لاحظته لما عملت سيرفيس للكورولا بره التوكيل و طبعا كل العملا عايمين على مية البطيخ و مش شايفين اللي بيحصل في العربيه و فاكرين انها اتعملت على الشعره
مشيت بعد ما دفعت ١٥٠ جنيه بس قلت مش مهم يا واد قصاد نضافة الشغل و خصوصا لقيت صاحب الورشه بيقول لي بثقه العربيه تمام و مش محتاجه زوايا و انهم لقيوا العجله مرحله سم
العربيه فعلا اتعدلت و الحدفه راحت و حتة العفشه فرقت جامد لدرجة لما عديت على عين القط العربيه عدت بنعومه و تحس ان العربيه ثباتها زاد فيا ريت ياجماعه خلوا بالكم من ان التوكيل شكله بيغير زيت و فلتر و دمتم عشان مش فاضيين

المشاركة الأصلية كتبت بواسطة minicooper20

اما كنت لسه عند سمير على انتا عربيتك لوها جراى جلاكسى كده يا ريس

انا كنت هناك الجمعه من ٣-٥