لو حد عدل فى نظام الصوت فى النيسان يقولنا-وايه رايكم فى الصوت
عرض للطباعة
لو حد عدل فى نظام الصوت فى النيسان يقولنا-وايه رايكم فى الصوت
انا في انتظار الاستلام لكن اول حاجه حاعملها انشاء الله اني مبدئيا اركب سماعات بيضاوي في الرف الخلفي لأن الصوت بصراحه ما عجبنيش خالص لما سمعتها في المعرض .
انا باحب اركب كنوود لارجر ( 7" * 10" ) صوتهم نقي جدا و اقل باور بيطلع منهم باص جيد جدا .
مع تركيب رف خشب مكسو بموكيت من نفس لون فرش السياره و عزل اسفله بفوم او اسفنج للحصول علي افضل أداء .
بس كويس انك اثرت الموضوع....... هل تركيب حاجه زي دي بيأثر علي ضمان العربيه لأن طبعا مش حاركب في التوكيل حاركب عند العالميه توكيل كنوود في سانت فاتيما
و هل العربيه مجهزه بسلك سماعات لحد الرف الخلفي و لا في الأبواب فقط لأني علي ما اذكر لمحت السماعات راكبه في الأبواب فقط ( أمامي و خلفي ) .
فنرجو الرد بالأفاده لمن يملك المعلومه .
موضوع جميل ونرجو الرد من الخبراء
اعتقد ممكن يخرج الضفيره من الضمان ونشوف برضه راي الخبراء
انا بدور على كاست فيه بلوتوث وgps كمان ؟؟؟؟؟؟؟
بص يا باشا الرف بيكون خشب mdf. و سمكه علي ما اذكر نصف بوصه و بعدين الفني بيلزق عليه
الموكيت بكله و لو الرف فيه عالي و واطي زي حضرتك ما بتسأل يا اما بيتفرد اسفنج او لوح فوم و هو
حايتكسر و ياخد الشكل الي حد كبير او ممكن نحقن فوم بس عيب الموضوع ده انك لو حبيت تفكه
لازم تكسر الرف و بعض التلفيات المحيطة لذلك الحل ده غير عملي .
ميزه الإسفنج او لوح القوم تحت الرف هي. كتم الهواء تماماً و بالتالي الشنطه بتبقي علبه مبرشمه
و ده بيخللي السماعه تضرب احلي باص .
تحياتي
شكرا يا باشا
بس انا علي حد علمي ان الرف الخلفي اللي نازل في الصني بيكون صاج و للاسف هو مش مسطح و في العادي الفني بيقطع في بالمنشار الكهربائي علي حسب مقاس السماعات المطلوب تركيبها.
اللي فهمته من كلام اني هشيل الرف الاصلي و اجيب واحد mdf علشان مستوي واحد و اخرم فيه ؟
تحياتي
يا جماعة انا مش فاهم حاجة!!
يعنى لما هنخرم فى الصاج الخلفى يبقى ليه نحط خشب وموكيت وفووم؟؟؟؟
قصدى ماهو كده هنسقط السماعات فى الفراغ الى اتخرم ونربط المسامير وخلاص!!
الموضوع عايز شرح يا جماعة
فى حل تانى انك تغيرالسماعات الخلفية الى فى الابواب بسماعات أعلى وات بس تكون نفس المقاس
وبكده نبقى علينا الصوت من غير ما نكسر ولا نخرم ولا نطلع حاجة من الضمان
خصوصا ان فى سماعات بتركب فى الابواب وبتطلع صوت و بيز أحسن كمان من السماعات الى بتركب فى الرف الخلفى وده انا شوفته فى عربيات كتير زى الأوكتافيا مثلا نازله أصلا بسماعات فى الابواب الخلفية صوتها أكتر من رائع
أعتقد ان ده أنسب حل
بصوا يا شباب
طبعا انك تركب سماعات في الأبواب نوعهم انظف و وات اعلي
ده هو الحل السهل اللي يديك صوت جيد جدا ( اكرر جيد جدا ) لكن اني اركب رف خشب MDF فوق الرف الصاج بتاع الفابركيه ( و اشيل الرف الفبر الأصلي بتاع العربيه علشان الأخ اللي كان بيسأل )
ده بيخللي الرف مسطح و لو مش عاوز تقطع في الصاج تخللي الخشب بوصه كامله مش نصف بوصه
ميزه السماعه اللارجر الكينوود اللي ذكرتها في الأول أولا هي 7 * 10 مش 6 * 9 زي باقي الماركات
فالمقاس ده بيدها راق اكبر و بالتالي تضرب باص احلي و بتستجيب لأقل باور من الكاسيت يعني مش محتاجه جي ام ( للي عاوز يلم الميزانيه مبدئيا ).
ثانيا السماعه دي فيها Mid Range كبير شويه و بالتالي صوت ال Vocal بيقي واضح و نقي جدا
و ده يهمني انا شخصيا يعني احب الصوت يبقي مزبوط مش باص عالي و خلاص
و طبعا فيها Tweeter اكثر من رائع لدرجه ان انا حاليا زابطه علي 0 و انا عندي لحد 6 في النغمات الهاي .
انا عارف ان ناس كتير مش بتحب تقطع في الصاج و تحس ان الصنايعي بيقطع فيك شخصيا مش في العربيه لكن في النهايه النتيجه اكثر من رائعه .
تحياتي .