ألنترا md طلعت جامدة و مش ورق

الأخوة و الاخوات الكرام / نجوم هيونداي


أسعد الله يومكم بكل الخير , ووقاكم ووقانا شر الطريق ...


النهاردة الصبح خارج من الرحاب علي طريق السويس و في نفس المكان اللي أتخبطت فيه اللانوس (سيارتي الاولي عام 2008) طالع من الملف و أمامي بيجو 405
أنا أخدت أقصي اليمين كعادتي علشان ادخل الطريق الرئيسي و بعد كده بادي أشارة شمال و ابدأ أدخل منتصف الطريق لحد ما اوصل لليوتيرن
البيجو بقي و هو في الملف دخل من الشمال و عايز يدخل منتصف الطريق مباشرة , في الوقت اللي فيه النترا 2012 زرقاء جاية في الحارة اليمين و ده طريقه

و هووووووووب
طاخ !! تراخ!! ديش

انا شوفت شرار و نار من جنب الالنترا و زجاج بيتطاير من يمين البيجو
قولت بس .... الالنترا أتدمرت
طبعا فرملت جامد و شغلت الانتظار لأن الالنترا لفت جهة اليمين و وشها بقا قدامي و علي طول فاديتها شمال و دخلت ووقفت مابينها و مابين البيجو

نفس عميييييق و أنا مش مصدق اللي بيحصل و اللي حصل و كأني في كابوس
و أحنا الثلاثة صاحب البيجو و الالنترا الزرقاء و انا قاعدين في عربياتنا ما أتحركناش من الصدمة و الذهول

المهم غمضت عينيا ثواني و فتحتها علي صوت نقر علي الزجاج بتاعي علشان ألاقي واحد جاري كان جاي ورايا بالصدفة بيطمئن عليا و بيقولي أنت كويس

الحمد لله نزلت و بصيت علي العربية مافيهاش حاجة انا كنت متأكد أني ماخبطتش في حد منهم بس قولت يمكن زي ما حصل قبل كده حاجة طارت و دخلت فيا

قولت أشوف الالنترا و اللي حصل لها ...
بداية وش العربية سليم تماما لايوحي بان العربية حصل لها حاجة لكن الجنب بقي ...

مفاجأة ....

الجنب سليم ماعدا الباب الخلفي اليمين دخل لجوه حوالي 20 سم كأقصي عمق و معظم البوية قشرت و اللون الاصلي للحديد بان , و تجريح و خدوش في العتب اليمين تحت الباب و خبطة في بداية الرفرف اليمين الخلفي فوق قبل الاطار مباشرة

بصراحة ماصدقتش أن ده اللي حصل للالنترا
قولت أشوف البيجو ..

الوش الامامي (فوانيس + شبكة + أكصطدام + كبوت + رفرف يمين و رفرف شمال)
بصراحة البيجو أتبهدل

انا كنت واقف مذهول
كنت متصور أن الالنترا علي حد وصف البعض أنها ورق و هاتتقسم نصين , لكن بعد كده أفتكرت فيديوهات أختبار التصادم للألنترا و قولت الحمد لله

أنا قولت أنقل لحضراتكم التجربة اللي شوفتها و طبعا ما قدرتش أصور العربيتين لأني بصراحة اتكسفت الموقف ماكانش مستحمل

ربنا يعوض علي الاثنين و لو أن البيجو غلطان بس قلبي معاه و قلبي طبعا مع صاحب الالنترا اللي هايكع ياعيني دم قلبه في أصلاح العربية عند غبور اللي مش أمور

الحمد لله الذي اخرجك من بينهم سليما معافى

وقلبي مع صاحب الالنترا لانه ماشي في طريقه ولقى اللى طلع له فجأة من تحت الأرض .. هيدفع مبلغ محترم يا عيني

ياترى الموضوع انتهى على ايه بين الاتنين ؟

اقتباس:

---

المشاركة الأصلية كتبت بواسطة معتز الدهشورى

الحمد لله الذي اخرجك من بينهم سليما معافى

وقلبي مع صاحب الالنترا لانه ماشي في طريقه ولقى اللى طلع له فجأة من تحت الأرض .. هيدفع مبلغ محترم يا عيني

ياترى الموضوع انتهى على ايه بين الاتنين ؟

---

مش عارف أنتهي علي أيه
الأثنين ماحدش فيهم كلم التاني خالص و ان كان واضحا علي صاحب البيجو أنه عارف أنه غلطان و انا مشيت بصراحة لأني كنت اتاخرت علي الشغل

بس أنا لو من مكانهم مش هاأتكلم في حاجة بعد ماشوفت الموت بعينيا كل اللي هأعمله أني أحمد ربنا اني سليم و بخير

بالرغم من ان عيوب الالنترا السوك البارزه في التصليح والسمكره بس برده ميزتها انها بتمسك الصاج في التصادمات..بالنسبه للبيجو صاجها كان حديد من 20 30 سنه فاتوا قبل ما عوامل الصدا والبارومه والحموات اللي علي السخن تخليه اضعف من صاج التوكتوك..وربنا يكفينا شر الحوادث..والحمد لله ان حضرتك كنت بعيد عن الليله دي:)

اقتباس:

---

المشاركة الأصلية كتبت بواسطة bakkarahmed

بالرغم من ان عيوب الالنترا السوك البارزه في التصليح والسمكره بس برده ميزتها انها بتمسك الصاج في التصادمات..بالنسبه للبيجو صاجها كان حديد من 20 30 سنه فاتوا قبل ما عوامل الصدا والبارومه والحموات اللي علي السخن تخليه اضعف من صاج التوكتوك..وربنا يكفينا شر الحوادث..والحمد لله ان حضرتك كنت بعيد عن الليله دي:)

---

شكرا لحضرتك
أنا بالفعل كنت متخيل أن العربيات القديمة صاجها تقيل و محمل عن العربيات الجديدة اللي كلها ورق , لكن الحادثة دي أستفدت منها عدة دروس مهمة :

1- أننا نثق فعلا في أختبارات التصادم اللي بنشوفها للعربيات المختلفة
2- بالرغم من خفة وزن الصاج الا أن بالفعل يوجد بارات تدعيم موجودة بالابواب الجانبية تقلل من الصدمات
3- عند دخول ملف أو منحني يجب تهدئة السرعة و عدم الدخول باندفاع
4- في حالة دخول تقاطع يجب ألتزام اليمين و النظر جيدا في المرايات لتحديد السيارات القادمة من اليسار
5- عند التعرض لاقدر الله لحادث يجب أن تظل متماسك و متحكم في العربية و هذا مافعله سائق الألنترا الذي كاد أن يفقد السيطرة علي سيارته بسبب الصدمة الجانبية القوية مما جعل سيارته تدور و تعكس أتجاهها لكن الحمد لله ربنا وفقه أنه يسيطر عليها و لا تنقلب منه

الاول حمد الله على السلامة..
وفعلا لو على الهيونداى عامة كانت سمعتها انها فى الحوادث خفيفة خااااالص
بس معتقدش ان الالنترا كده..
ولو على غبووووووووووور هو فعلا مش امووووووووووور خااااااااالص
وللاسف عن تجربة...

لا حول ولا قوة الا بالله
لو بس نهدى كدة ونبص في مراياتنا وناخد الامور بالهدوء كل حاجة هتبقا زي الفل
حمدالله عالسلامة يا بشمهندس

هممممممم غبور دا ما يستاهلش إنى ادفع فلوس فى عربياته اللى بينزلها على مزاجه هو مفتقدة تماما لعوامل الأمان

بعدين الموضوع بيختلف مين اللى خبط مين وقوة الخبطة وليها كذا عامل لكن لو وش لوش أعتقد إن العربية كانت هتيجى أرض أرض

اصل أنا ياما شفت عربيات هيونداى عاملة حوادث على الطريق الزراعى بتبقى معجونة

حمد لله على سلامتك يابشمهندس سمير والحمد لله انها عدت على خير

والحوادث دية ارزاق ونصيب وماتعرفش ليها مين القوى ومين الضعيف لان ليها حسابات تاينة خالص لا يعملها الا الله سبحانة وتعالى
انا عن نفسى شوفت حوادث لعربيات على نفس السرعة وتقريبا نفس الحالة والاقى نفس العربية مدمرة ونفس العربية مافيهاش الا حاجات بسيطة

عمرك ماتعرف تحدد حاجة بالذات فى الحوادث

واصلا صناع السيارات بيخلوا العربية تتكسر كلها فى اى تصادم فى مقابل امتصاص الصدمة عشان تحمى مقصورة الركاب فقط لاغير , العربية مش مهمة عندهم

اقتباس:

---

المشاركة الأصلية كتبت بواسطة semsem kane

حمد لله على سلامتك يابشمهندس سمير والحمد لله انها عدت على خير

والحوادث دية ارزاق ونصيب وماتعرفش ليها مين القوى ومين الضعيف لان ليها حسابات تاينة خالص لا يعملها الا الله سبحانة وتعالى
انا عن نفسى شوفت حوادث لعربيات على نفس السرعة وتقريبا نفس الحالة والاقى نفس العربية مدمرة ونفس العربية مافيهاش الا حاجات بسيطة

عمرك ماتعرف تحدد حاجة بالذات فى الحوادث

واصلا صناع السيارات بيخلوا العربية تتكسر كلها فى اى تصادم فى مقابل امتصاص الصدمة عشان تحمى مقصورة الركاب فقط لاغير , العربية مش مهمة عندهم

---

شكرا يا سامح علي مرورك
بقالنا فترة مفتقدينك ياراجل ...... ههههههههه

فعلا انا معاك ربنا هو اللي بيستر و فعلا اللي يشوف المنظر غير اللي يسمع أو يشوف بعد الحادثة ماتحصل

انا شخصيا توقعت أن الالنترا هاتطير و تتقلب علي جنبها بسبب قوة الخبطة و أندفاع البيجو
و لما لاقيته لف و بقي في وشي قولت بس أحنا كده هانسلم علي بعض

بس الحمد لله ربنا ألهمنا حسن التصرف

ربنا يعوض عليهم .. المهم انك بخيير يا استاذ سمير :)

حمدلله على سلامتك يا كبير. اكيد تلميعة ميدو هي الي انقذت العربيه ههههههههههه

بالنسبه بقى للخبطه, الحمدلله ان الالنترا ماتقلبتش ولا دخل في السور الاسمنت والا كانت الاضرار اكبر. وربنا يسترها على الجميع

حمدا لله على سلامتك والحمد لله انكم بخير
وربنا يعوض عليهم
انا قريب برضه لسه عربيه 405 اللى هى نفس العربيه اللى بتتكلم عنها داخله فى الالنترا من قدام وانا واقف بس مفيش اضرار جامده غير حاجة بسيطه الحمد لله

الحمد لله على سلامتك يا باشمهندس ربنا يكفينا جميعاً شر الحوادث أنا لو أخدت بوسة في عربيتي - بعد الشر بعد الشر - هيجيلي شلل تقريباً لأن العربية حلاوتها في أنها تفضل على حالتها الجديدة والحمد لله محافظ عليها أكتر من نفسي وبأذن الله ربنا يحمينا كلنا شر الحوادث .