الحقونى .. انا خلاص طهقت و زهقت .. !!

السلام عليكم .. كيفكم يا شباب ...

ندخل ف الموضوع طوالى لانى حاسس انى هفرقع دلوقتى ...

العربيه بقالها فتره صوت موتورها مش عاجبنى وعالى شويه .. ده غير انها بتجيب 160 بالعافيه وحلو اوى على كده .. المارش كان باظ .. وغيرته .. وبعد ما غيرته فيه صوت نعره بيطلع مع دوسه بنزين مره واحده وساعات لا .. وروحت للميكانيكى العربيه كانت فله وشمعه منوره .. زيرو .. مفيهاش حاجه !! .. اروح انا بيها الهبل يشتغل .. مش عارف انا راكبنى عفريت ولا مبعرفش اسوق بقا :019F3B~14:

امبارح عملت كام مشوار من الزقازيق لفاقوس للزقازيق تانى لبنها للقاهره وبعدين رجعت الزقازيق .. مسافه 250 كيلو .. عملت فيه 40 لتر .. وده رقم مش طبيعى خالص .. انا كنت بعمل 200 كيلو ف 20 لتر .. ده غير تزييق التابلوه العجيب اللى طلعلى امبارح .. !!

النهارده بقا .. ودى المشكله الاهم والمصيبه الكبرى .. ( انا قلت الكلام اللى فات عشان لو ليه علاقه ) ...
الدنيا زى الفل.. الحراره مظبوطه .. التكييف تمام ... فجأه .. الحراره بقت 93 مش 90 .. قلت مش مشكله الزحمه وطلوع المدارس اكيد خانق العربيه .. الموتور ما بيشمش غير عادم العربيات اللى حواليه .. يدوب نص ساعه اروح الاقى الحراره بقت 98 .. وده موووش طبيعى ... ركنت وطفيت العربيه.. قلت شويه تهييس . .. بس قلت افتح الكابوت ابص اشوف فيه ايه ..
الاقى صوت "" فسسسسسسسسسسسسسس "" زى ما يكون كاوتش مخروم بالظبط .. طالع من خرطوم تبع دوره الميا .. هوريلكو مكانه ف الصور .. وبينقط نقط ميا .. قربت ايدى منه .. لقيته بيطلع هوا جامد سخن .. بخار ميا .. ونقط الميا جايه على الموتور .. مسكت قماشه وفتحت الاربه بالراحه .. لقيتها بتفضى ميا لما جابت اخر !!

ايييييييييييييييييييييييي ييييه ده بقاااااااااااااااااا !!! .. مع العلم انا مغير بوجيهات وسيور وفلاتر وبليه الكاتيه وبليه الشداد و طرمبه الميا ( هيبو ) ونضفت دوره الميا والسرتنينه و شيكت على ساعات وترموستات المراوح وسلك الارضى من شهر ونص او اقل كمان .. والعربيه كانت كويسه دايما ما عدا موضوع اخر تسارعها ل160 ده .. و كنت دايما بقول مش مشكله اهو 160 حلو ومش تهور جامد .. طالما العربيه مظبوطه وماشيه حلو تكييف وحراره وبنزين تمام .. بس هو فجأه مشكله الحراره والميا دى ظهرت النهارده !! .. قفلت العربيه وطلعت وربع ساعه كده نزلت اصورها

حد يفهمنى فيه ايه عشان انا زهقتتتتتتتتتتتتتتتتتتتتتت ت ..


الصور ..

ده لما فتحت

http://im25.gulfup.com/2012-09-17/1347887012111.jpg



الدايره البيضا مكان التنقيط والصوت .. والاسهم والدايره الزارقه مكان ما طرطشه الميا الخفيفه كانت رايحه .. كان فيه ميا ونشفت فعملت الصفار ده !!


http://im25.gulfup.com/2012-09-17/1347887012732.jpg




ده لما شلت الخرطوه الاسود اللى ماشى بالعرض .. لقيت التنقيط والتفته وبخار الميا مع الصوت طالعين مكان ما السهم الازرق مشاور

http://im25.gulfup.com/2012-09-17/1347887012903.jpg





ده شكل الزيت ...

http://im25.gulfup.com/2012-09-17/1347887012394.jpg




حد يقولى فيه ايه بقا عشان انا جبت جاااااااااااااااااااااااا ااااااز !!!! :stink[1]: :stink[1]: :stink[1]:

متابع عشان عربيتى اخرها 145 وال rpm مش قادر يوصل ل 4

عربيتى ابيزا 98 موتور 1400MPI 8صباب

الموضوع بسيط
عندك تسريب مش واضح في الصوره اما من خرطوم الرادياتير التخين او من الوصله الرفيعه الانتيمون اللي فوق البوجيهات وفي الحالتين هتغير والحراره هتظبط معاك
-ملاحظ ان ميه الدوره مش نظيفه ومليانه صدا اصفر ازاي انت لسه غاسلها ؟؟
-الزيت لونه كويس ماتقلقش منه
-بالنسبه لاستهلاك البنزين..فك البوجيهات وشوف مهببه ولا لا؟ وبعدين نشوف ايه الظروف

بحط ميه حنفيه عادى يا فادى ..

انا استنيت لما العربيه بردت .. وحطيت ميا .. خدت بتاع 3 لتر !! .. استنيت ساعه وبصيت ع الاربه لقيتها نقصت سيكا كده .. مليتها .. وروحت بيها كام مشوار فى وسط البلد فى الزحمه .. الحراره على 80 !! .. احرق اشد اجرى.. على 80 ..

خلصت الحاجه .. وانا مروح قفلت الازاز وشغلت التكييف .. جابت 90 .. وحرق برضه وتنطيط .. وهيا على 90 .. روحت البيت .. فتحت الكابوت .. لقيت الاربه نزلت شويه حلوين كده .. بس مفيش اى حاجه لا اصوات ولا بخار ولا ميا بتنقط من اى حته !!

الضغط زاد
و خرطوم مهرب كبس
دور عليه
و اربط على افيزة الأول
و حضتنى يا عم
هى دى حاجة

تسريب واضح وتهريب المياه يسخن العربيه بس موضوع السرعه ده ممكن الكاتينه مش مظبوطه فى التركيب

اقتباس:

---

المشاركة الأصلية كتبت بواسطة tananybasha

الضغط زاد
و خرطوم مهرب كبس
دور عليه
و اربط على افيزة الأول
و حضتنى يا عم
هى دى حاجة

---

انا متوقع انها حاجه زى كده يا طنانى .. بس انت عارف "" القشه التى قصمت ظهر البعير "" ... انا اساسا فى ظروف ما يعلم بيها الا ربنا .. ودى تعملى كده على فجأه خلتنى اتنطط واتعفرت فى مكانى .. انا استويت وبفكر جديا ف البيع واجيب اى كلبه تمشى وخلاص .. اه بحب الاوروبى والالمانى والعربيه حماله قسيه وفى عز تعبها ما بتقولش لا .. بس انا زهقت بأمانه

اقتباس:

---

المشاركة الأصلية كتبت بواسطة ahmed_fahmy

تسريب واضح وتهريب المياه يسخن العربيه بس موضوع السرعه ده ممكن الكاتينه مش مظبوطه فى التركيب

---

مش مظبوطه ازاى ؟؟ انا عايز اروح لميكانيكى فاجر يظبطلى الموتور وعفشجى فاجر يظبطلى العفشه خصوصا اللى ورا لانى بسمع هربده جامده ف الطرق المكسره . وبتوع العفشه يقوللولى العفشه ورا سليمه .. معرفش بقا الصوت من العفشه الخلفيه ولا الفرش ولا بلاستيك القوايم ولا ايه ..

مش بقولكو طهقت !!

أمسك أعصابك واستحمل .... الشتا جاي وده فترة النعيم بالنسبه للأوبل.
وكان الله في عونك.

بسيطه

الاوبل عربيات شتوي هاهاهاهاها
في الشتا بنسترجاها تسخن علشان نودي العيال المدرسه الصبح
وفي الصيف سخنه لوحدها ,ربنا يهدي

ولا شتا ولا صيف .. انا عربيتى ركبها عفريت .. الحمد لله .. الواحد برضه خد كميه عيون مش طبيعيه .. وعلى ايه مش عارف ..
الحمد لله فى السراء قبل الضراء .. الحمد لله وكفى

-----لومعاك مفتاح بوجيهات فك واحد واحد وشوف فى بوجية علية زيت
-----لو العربية متلتة تعمل كدة
-----لو انتا حاطت مية فى القربة اعلى من الحد المسموح (max) العربية تسخن جامد
-----افصل طرف البطارية السالب لمدة 5 دقاياق وركبة تانى
----------------------------------------------------------------
معلش يا اخويا العربيات مليانة قرف

متابع معاك وطول بالك.......................

لا هو فيه تسريب كده من ناحيه الخرطوم الكبير اللى مشاور عليه ف الصور .. لاحظت انه بينقط والعربيه دايره .. بس مقضيها من امبارح تزويد كل شويه .. مش فاضى اروح لحد والله .. ربنا يسهل بقا

تنقيط المية بسيطة كبيرها هتغير الخرطوم
- لو الخرطوم فيه قطع فا دة بيبقى مكان حرف الافيز وهتغير الخرطوم فى 5 دقايق وخلى بالك اوى اوى وانت بتفكة من الجنب الفايبر بتاع الرادياتير
- لو التسريب من تحت الافيز والافيز اللى عندك سوستة مش بمسمار اشترى افيز بمسار وركبة ههلاقى التسريب وقف

موضوع السرعة ممكن تقرص على طريق سريع وتشوف يمكن محتاجة تفتيح بس وبص على البوجيهات ممكن تكون السبب

قرصت كتير .. الموتور صوته عالى اوى واخره 160 بطلوع الروح وغيرت البوجيهات اكتر من مره .. هشوف حوار الكاتينه اللى قال عليه احمد فهمى

هو حاجه من اتنين .. يا ابيعها واغير .. بس مشكلتى محتاج عربيه دايما عشان الحجه تعبانه والعربيه بقت ايدين ورجلين البيت ..
يا اما اسقطلها سى دى اكس واستغنى عنها يومين تلاته بالكتير ..
ده كل اللى فى دماغى اليومين دول .. طبعا زاد بعد الحوار اللى قلته

انا بتفق مع فادى جداا ... لان الموضوع ده حصل معايا بس فى عربيه تانيه وعملته وانا واقف فى ساعتها .... هاتفك القفيزين وتشوف الخرطوم لو فيه شق او قطع .. لو شق من بدايته هاتقطع الحته المشقوقه وتركب القفايز وتظبط الميه بتاعتك وتاخد الهوا وخلاص خلصت انما لو القطعه الانتيمونيا متاكله من البدايه يبقى هاتركب الخرطوم وترحل القفيز جوه شويه وخلاص .... لو غير كده يبقى تغيرها ... بالنسبه لموضوع سحب العربيه فانا متابع معاك لان عندى سحبها مش عاجبنى

بالنسبة للسحب ومعاة الصوت العالى

غالبا مجموعة دبرياج محتاجة تغيير

اقتباس:

---

المشاركة الأصلية كتبت بواسطة dr.m_baz

أمسك أعصابك واستحمل .... الشتا جاي وده فترة النعيم بالنسبه للأوبل.
وكان الله في عونك.

---

ههههههههههههههههههههه فعلا الشتا داخل وديه فترة النعيم بالنسية للاوبل

مغير الدبرياج من سنه بدبرياج لوك

اقتباس:

---

المشاركة الأصلية كتبت بواسطة buddha

بالنسبة للسحب ومعاة الصوت العالى

غالبا مجموعة دبرياج محتاجة تغيير

---

:tumb::tumb:

اكد على الكاتينة كانت مشكلتى زيك كدة انا لسة جاى من عند الميكانيكى صوت المكنة فرق بعد تغيير السير و ظبط الكاتينة بس لسة مجربتس على طريق مفتوح

أأكد ع الكاتينه ازاى ؟! م انا لسه مغير السير والبليه بتوعها من شهر ونص قووووول شهرين !!

الخرطوم ده انا جيبته تركى ب 40 جنيه و بجد فرق كتير معايا
غيره احسن

لسه مغيرتوش .. ماشى بالتزويد بقضى المشواير الخفيفه .. مش كسل .. بس لخبطه ظروف .. ربنا يسهل بقا والسبت هروح اغير الخرطوم والافافيز بتاعته واحط ع الدوره ملح لمون

تمام
خليك فى الأمان