مقارنة غريبة : صني 2012 او تيدا 2012 !!!

**aymandrugs** · 19-09-2012 07:24 PM

السلام عليكم ورحمة الله وبركاته
بما اني الفترة اللي فاتت كنت محتار جدا وبدور على عربية جديدة اشتريها بدل الفيرنا اللي معايا حاليا تابعت منتدى نيسان وطبعا ما شاء الله لقيته من انشط وامتع الاقسام في المنتدى هنا-مع الاخذ في الاعتبار ان باقي الاقسام طبعا جميلة-

وبصراحة انا كنت استقريت على نيسان تيدا سيدان اوتوماتك (اللي هيا ب 115 الف)
بس لقيت ان النيسان صني الجديدة قريبة منها في حاجات كتير !!!! والسعر طبعا اقل ب 15 الف

وهنا رجعت تاني الحيرة

فياريت لو اخواني في القسم هنا يساعدوني في النقطة دي !!

هل فعلا الصني الجديدة قريبة من التيدا ؟؟؟ ولا التيدا برضه ممكن ينزل منها شكل جديد قريب زي الصني كده ؟؟

اخوكم
د.أيمن

**ahmed_52869** · 19-09-2012 07:29 PM

اعتقد خليك فى التيدا

**aymandrugs** · 19-09-2012 07:48 PM

المشاركة الأصلية كتبت بواسطة ahmed_52869

اعتقد خليك فى التيدا

طب ممكن تقولي ايه الاسباب ؟؟؟

اي سبب ؟؟

**Bishoy.Girgis** · 19-09-2012 08:06 PM

بص يا دكتور .. التيدا تيدا برده بس هجيب لك من الاخر لأني سوقت العربيتين لو معاك الفلوس هات التيدا و لو مش معاك يكمل اشتري الصني و في كلا الحالتين انت اللي كسبان بالنسبة للتيدا ان شاء الله احتمال و مش مؤكد ان ينزل منها الشكل الجديد في نصف 2013 و هتكون هاتش باك .. انا شخصيا شوفت العربية ديه بجد تجنن بس هي لسه منزلتش مصر رسميا ً .. لك الاختيار
و الف مبروك مقدما ً و اهلا بيك عضو نيساني ان شاء الله :)))

**Land_Cruiser** · 19-09-2012 08:15 PM

مش معقول نفس الشركه تنزل منتجين زى بعض و واحد اغلى من التانى ب ١٥ الف جنيه بدون سبب . اكيد الأغلى افضل طبعا بس هى حكايه ان هينزل شكل جديد من التيدا دى اللى محتاجه تفكير و فى حل وسط و هو الصنى الفئه الاعلى اللى هتنزل قريب دى ممكن تبقى حل وسط بين الاتنين كسعر و كماليات و فى نفس الوقت شكل جديد لسه قدامه فتره على ما يتغير بعكس التيدا

**aymandrugs** · 19-09-2012 08:24 PM

المشاركة الأصلية كتبت بواسطة PeaceMan

بص يا دكتور .. التيدا تيدا برده بس هجيب لك من الاخر لأني سوقت العربيتين لو معاك الفلوس هات التيدا و لو مش معاك يكمل اشتري الصني و في كلا الحالتين انت اللي كسبان بالنسبة للتيدا ان شاء الله احتمال و مش مؤكد ان ينزل منها الشكل الجديد في نصف 2013 و هتكون هاتش باك .. انا شخصيا شوفت العربية ديه بجد تجنن بس هي لسه منزلتش مصر رسميا ً .. لك الاختيار
و الف مبروك مقدما ً و اهلا بيك عضو نيساني ان شاء الله :)))

ياباشا والله اولا واخير ده شرف ليا اني اكون نيساني :)
واللي انا فهمته كده من كلامك ان برضه في حتة شوية كده لصالح التيدا وانا متفق معاك في ده ان برضه التيدا ليها هيبة شوية
بس انت عارف زغللة العين على فرق الفلوس (وهو موجود ان شاء الله)

بس مش عارف !!!
طب بالنسبة لسعر اعادة البيع ؟؟؟
اعتقد طبعا ان الصني تتفوق بجدارة ولكن التيدا ظروفها ايه ؟؟؟
لاني اعتقد انها مش منتشرة قوي وده ليه ميزة انك ماتحسش انها مع عامة الشعب (زي الفيرنا كده ) بس برضه بيقلل من الطلب عليها !!

وارجو اني ما اكونش رخم في اسئلتي

**szaalouk** · 19-09-2012 10:04 PM

شوف يا باشا انا كنت في نفس خيرتك دي و استقريت في النهايه علي حجز الصني الجديده و لو نزلت السوبر صالون حانقل الحجز عليها بإذن الله .
التيدا عربيه محترمه جداً
تقفيلها و خامات صالونها افضل من الصني لكن
تتفوق الصني في
شكل جديد و لسه قدامه زمن علشان يتغير
استهلاك وقود افضل بكثير ( ١٥٠٠ سي سي ) علي حساب التسارع طبع ثبات افضل علي الطريق ( من واقع تجربه نيسان تيم - نايل مؤتمرا )
قطع غيارها سوف تتوفر بغزاره في المستقبل القريب مثلها مثل الشكل القديم
سعر أعاده البيع افضل بمراحل و متماسكه جداً عند بيعها مستعمله

**Mohamed.Ramah** · 19-09-2012 11:55 PM

افضل وارجح راى هو الفئة الاعلى من النيسان صنى بالنسبة للتيدا فى 2014 اكيد حيتغير الموديل الحالى ولاكن نظرا لانك تنوى الشراء حاليا يبقى افضلك الصنى سوبر صالون لان الحالية من راى ليست مقبولة من الداخل (جودة التقفيل الداخلى ليست على المستوى )

كتقييم بين الصنى والتيدا الفارق فى قوة الموتور لصالح التيدا وجودة التقفيل ودة ملاحظة من تجربة شخصية وتقدر تشوف دة بنفسك لما تركب وتسوق الاتنين وموفق فى الشراء