الكارينز ............ سؤال ما يتسألش
السلام عليكم ورحمة الله وبركاته
السبع كان عامل أسبوع صيانة مجانية .. رحت يوم الأربعاء الماضى 12/9 بعد ما حجزت قبلها بيوم
كان ميعادى الساعة 9 وقابلت المهندس وكانت الشكوى من عضة فى الفيتيس فى الأولانى والتانى
والشكوى التانية من ان الدركسيون فيه زنة ساعات بتظهر على السرعة البطيئة وكان بيرعش عند سرعة 110 بالضبط وتختفى تحت أو فوق ال 110
العربية دخلت الساعة 9 وخلصت الساعة 12 تقريباً
كشف شامل ... تربيط عفشة ... فك الأربع عجلات ومراجعة ترصيص العجل على الجهاز
وفى الآخر تنظيف شامل وتلميع العربية من الداخل بملمع تابلوه وحاجة 100%
وفى الآخر قابلت المهندس وقال لى على اللى فيها
الفيتيس ما فيش فيه مشكلة
و
علبة الدركسيون محتاجة تتغير !!!!!!!
أنا صعقت .............. معقول ؟؟
قال ممكن عشان العربية تقيلة
المهم المهندس مشكوراً اتصل بفرع القطامية ورتب معاهم انى أروح أغيرها هناك تبع الضمان لإنها مش متوفرة عندهم
وانا مروح جربت تانى .... يمكن الرعشة تروح بعد الترصيص ...... مافيش فايدة
أنا كنت غيرت الكاوتش الأمامى قبل رمضان وقلت أغير الخلفى بالمرة ......... رحت جبت زوج جديد ركبته فى الأمام ورصصت كمان مرة
النهارده الصبح قلت أجرب تانى 110-120-130 الرعشة راحت والحمد لله
يعنى ممكن نقول ببساطة كانت مشكلة كاوتش ؟ الله أعلم
فاضل حكابة الزنة فى الدركسيون اللى كل شوية بتظهر وأحس بيها فى الدركسيون
المهم أنا مفروض أروح فرع القطامية عشان الموضوع ده
أيه رأيكم أروح وللا بلاش ؟؟؟؟
السؤال اللى ما يتسألش هو : تفتكروا مركز كيا السبع تشخيصهم صح وللا غلط ؟
أفيدونى أفادكم الله علشان أقرر أروح مركز القطامية يوم الأحد وللا لأ
آخر الأخبـــــــــــــــار
السلام عليكم ورحمة الله وبركاته
وصلت لل 45000 وروحت القطامية وقلت لهم عن الرعشة اللى على سرعة 100-110 وان مركز السبع قالوا فيها علبة دركسيون
لا جديد فى الموضوع .... رفعوا العربية على الونش وقعدوا يفحصوها من تحت ويمرجحوها وهى متعلقة ......... وفى الآخر فكوا الأربع عجلات وعملوا ترصيص للمرة الرابعة وكتبوا لى توصية باستعدال الجنوط !!!!
هو أنا ناقص احتمالات ؟؟؟ كاوتش وللا ترصيص وللا علبة دركسيون وللا طنابير وللا قواعد موتور
وكمان تطلع لى حكاية استعدال الجنوط دى ؟؟؟؟
وقابلت المهندس صلاح عيد وقلت له العربية اترصصت قبل كده 3 مرات ودى رابع مرة ... وايه حكاية استعدال الجنوط دى كمان ؟؟؟ دى عمرها ما اتخبطت
قال المفروض لما تغير الكاوتش تعمل ترصيص وضبط زوايا واستعدال جنوط عشان تبقى المنظومة كلها جديدة ومضبوطة
وقال الطرق فى مصر وحشة جداً ولو كان لاقى علبة دركسيون مش سليمة كان غيرها من نفسه و طلع معايا المهندس أشرف حسين نجرب العربية وجرى بيها وجاب 100-110-120 ........ ما فيش رعشة ..... الحمد لله
وقال لى ان رأيه (الشخصى) إنها مش محتاجة تعديل جنوط لأنها كويسة !!!!
وخدت العربية وماشى بيها من يوم 27 للنهاردة مفيش أى رعشة
على الله ترجع تانى بقى
هو كان قال لى عن مكان فيه جهاز لاستعدال الجنوط بس مش فاكر قال اسمه ايه بالضبط وللا فين حتى
حد يعرف تتعمل فين الحكاية دى ؟؟