صني 2013 - شرح مبسط لوظائف وخفايا السيارة بالفيديو

بسم الله الرحمن الرحيم

سلام عليكم يا أحسن شباب ...صقور نيسان

النهاردة كنت باتصفح يوتيوب ولقيت سلسلة فيديوز لسة نازلة جديدة بخصوص نيسان صني (في أمريكا اسمها فيرسا) ... بالطبع هانلاقي شوية اختلافات لأن الموديل اللي هناك ناويين يبيعوه هنا على انه - لامؤاخذة - هاي لاين , وبالتالي ماحدش يعلق على التعديلات الطفيفة اللي ممكن يلاقيها , زي ان المقابض الداخلية نيكل, وان العربية فيها مفتاح ستارت - ستوب .... أو ان فيها دركسيون مالتي فانكشن , .. أو حتى شكل العداد متغير , وبلاش كمان نستغرب من نظام الملاحة بالـ جي بي إس الموجود فيها :Zb_sor1[1]:

من الممكن نلاقي فيديو بيشرح حاجات بسيطة وممكن تكون من وجهة نظر كثير من قائدي السيارات المحترفين "تافهة" ... لكن كلي ثقة ان فيه ناس مبتدئين والأهم من كدة بنات وسيدات محتاجين يعرفوا الوظائف دي بتشتغل ازاي (بدل ما تضطر تسأل في الشارع وتتلخم وأي حد معدي يبصلها كدة :whtauwant: أو تتزنق وتسأل جوزها وأخوها وكل العائلة في التليفون :B4_564::B4_564: وماحدش بينجد حد في أحيان كتيرة :afterboom: )

نبدأ بسم الله (ملحوظة : اخترت الفيديوز اللي تناسب الموديل اللي معمول في مصر ومتوافر فيها حالياً, فيه بعض الفيديوز هاتلاقوها وانا مش حاططها هنا, لعدم أهميتها علشان بتوصف إمكانيات مش متوافرة في بلدنا الحبيبة مصر ! )


وطبعاً مع مراعاة حقوق الناس اللي صوروا وكلفوا الفيديوز دي علشان كل مستهلكي نيسان صني يعرفوا يتعاملوا معاها بكل سهولة




1- فتح العربية (بالريموت كونترول ) :

هما بيقولوا ان الكونترول صالح للاستعمال لغاية 33 قدم (10 متر تقريباً) ... لكن لاحظت انه ماشاء الله بيشتغل لحد 300 متر !! - زائد ان الموديل المصري مش بيدي كلاكس وانا داخل العربية بافتحها ... وإلى الفيديو:

2013 NISSAN Versa Sedan - Remote Keyless Entry - YouTube




2- تشغيل المساحات ومنظف الزجاج :

الفيديو ده بيوصف ازاي تستعمل زرار المساحات وتعدل الفترة البينية بين حركة المساحات وعدد مراتها ... إلى الفيديو:

2013 NISSAN Versa Sedan - Windshield Wiper and Washer Controls - YouTube


3- مصابيح الإنارة وكشافات الضباب :

هنا بيوجهك ازاي تشغل الأنوار وتتعامل مع نور الضباب (بيعتبر لخبطة بالنسبة لناس كتير )

2013 NISSAN Versa Sedan - Headlights and Exterior Lights - YouTube



4- التعامل مع الفيتيس الأوتوماتك:

ناس كتير محتاجين الفيديو ده, خصوصاً حديثي التعامل مع نظام الأوتوماتيك (ملاحظة ان عندهم مدمج السرعات 2 و3 اللي عندنا في نقلة واحدة L وهي ترمز إلى Low Speed )

وبنكرر تاني ان ماحدش أبداً ينقل من N إلى D أو من D إلى P أو R أثناء حركة السيارة لأن ده هايتلف الفيتيس بالكامل (وهو مش رخيص بالمرة) ... ويفضل انك ماتنقلش من D تحت زعم انك بتخف من حمل المحرك, انت كدة هاتستهلك الفيتيس بلا طائل, اعمل كدة بس وقت التوقف في إشارات طويلة أكتر من نص دقيقة

إلى الفيديو

2013 NISSAN Versa Sedan - Continuously Variable Transmission - YouTube



5- التكييف:

بيعلمك ازاي تستعمل التكييف (آه فيه ناس لسة ماتعرفش ومن حقهم يعرفوا) ... وازاي تشغل مزيل الضباب من الزجاج الخلفي (تعرفها انت دي؟ :bluescreen: ) أو تخلي الضباب المتجمع داخل المقصورة يفك (نادراً ماتلاقي حد بيعرف يعملها) ... وامتى تفتح أو تقفل بوابة سحب الهواء الخارجي أو تدوره جوة المقصورة:

2013 NISSAN Versa Sedan - Climate Controls - YouTube



6- فيديو رائع ومهم بخصوص تانك البنزين (لمن لا يعلم غطا تانك البنزين في نيسان له أهمية قصوى في توفير الوقود ونظام تجميع بخر البنزين ) ... وبيعرفك كمان ان فيه إنذار لو باب التانك مفتوح (ماكنتش اعرفها):

2013 NISSAN Versa Sedan - Fuel Functions - YouTube


7- فتح الكبوت (بنات وسيدات كتير مايعرفوش يتفتح ازاي - خصوصاً تكة الأصابع ) :

2013 NISSAN Versa Sedan - Hood Release - YouTube


8- طي الكراسي الخلفية (مش متأكد موجودة في مصر ولا لأ ):

2013 NISSAN Versa Sedan - Folding Down the Rear Seats - YouTube


9 - نظام قفل الأبواب الأوتوماتيكي :

2013 NISSAN Versa Sedan - Automatic Door Locks - YouTube


10 - مكان الإطار الاحتياطي وعدة الكوريك :

2013 NISSAN Versa Sedan - Spare Tire and Tools - YouTube


11- قفل الأمان للأطفال في الأبواب الخلفية:

2013 NISSAN Versa Sedan - Child Safety Rear Door Locks - YouTube

12- تحرير الفيتيس الأوتوماتك (في حالة التوقف المفاجئ للسيارة لاقدر الله أو الحاجة للركن خلف سيارة في وضع المور)

2013 NISSAN Versa Sedan - Shift Lock Release - YouTube


13- مهم جداً جداً : أماكن فحص سوائل السيارة (زيت الفيتيس - زيت الموتور - ماء البطارية - زيت الفرامل - مبرد المحرك - مياه المساحات ) وتوقيتات فحصها والكيفية:

2013 NISSAN Versa Sedan - Fluid Check Points - YouTube

14- ربط حزام الأمان وصفارة الإنذار الخاصة به

2013 NISSAN Versa Sedan - Seat Belt Warning Light and Chime - YouTube


15 - معلومة جديدة: لو لاقدر الله حصل ظرف واتحبست -لأي سبب من الأسباب - داخل شنطة العربية (عن خطأ أو عن عمد لسبب أو لآخر )...تقدر تفتح الشنطة وانت قاعد جواها:

2013 NISSAN Versa Sedan - Emergency Inside Trunk Release - YouTube




يارب أكون أفدتكم قدر الإمكان ويارب اقدر ارد الجميل لكل القائمين على هذا المنتدى الرائع , لأنهم ياما علمونا وعرفونا وأفادونا من خبراتهم


سلام الله عليكم

بصراحة مجهود مشكورعليه تسلم إيديك ويجازيك ربنا خير ويجعله فى ميزان حسناتك

يا سلااااااااااااااااااااااا ااااااااااام ايه الحلاوة دى
ايه العظمة دى
موضوع رائع
انا هبدا اغيييير

:018A1D~146:
:Ta_clap[1]::Ta_clap[1]::Ta_clap[1]::Ta_clap[1]::Ta_clap[1]:

جزاك الله كل خير يا ابو حميد ..
دائما وأبدا ما يتفوق التلميذ على اساتذته :plusone1:
وزى ما باقول دايما ان الصورة تعبر اكتر من 100 كلمة و10 صفحات كتابة

مجهود رائع
مشكوررر ..

جهد رائع وربنا يجازيك خير عليه

تقرير جامد

these videos are amazing and very helpful indeed, but I would like to ask if the gear box equipped in egypt is CVT or normal automatic ?

اقتباس:

---

المشاركة الأصلية كتبت بواسطة addams_2

these videos are amazing and very helpful indeed, but I would like to ask if the gear box equipped in egypt is CVT or normal automatic ?

---

في نظري ان المحرك اللي نازل في نيسان (مصر وبرة مصر) مش مجهز بخاصية CVT اللي نازلة في مواتير هوندا , علشان نظام CVT بيزود التكلفة الخاصة بالتصنيع, بالإضافة إلى ان نيسان لو نزلت المحرك ده كانت هاتملا الدنيا بأن العربية دي CVT , أعتقد النيسان قشقاي فيها النوع ده من المحركات

وأغلب الظن ان الموقع سمى العملية دي CVT علشان الاختصار فقط ( Continuous Variable Transmission) مش علشان تجهيزة المحرك الفعلية


لكن خليني اقوللك عن الإحساس الحقيقي وانت سايق: المفروض ان محركات سي في تي بتعدل العزم وضخ البنزين للمحرك بناءاً على مقاومة الطريق لانسياب السيارة, وبكدة يضمن تحقيق أقصى كفاءة لاستهلاك البنزين, لكن النيسان الجديدة مش مكتوب عليها انها مجهزة بالنوع ده, إنما فعلياً لاحظت ان المحرك بيعدل العزم من غير تأثير كبير على عدد لفات المحرك (للسادة رواد محور 26 يوليو فيه آخر قطاع قبل الطريق الصحراوي - مطلع شاق جداً يهد حيل العربية على السرعات العالية) ... المفروض لو العربية مش مجهزة بكدة الاقي ان عدد لفات المحرك يعلى بعد تباطؤ سرعتها

اللي بيحصل ان كل يوم اتفرج على العداد والاقي ان لفات المحرك تقريباً زي ماهي باختلاف لا يكاد يذكر, ومش باغير ضغطة رجلي على البنزين, وفي النهاية الاقي سرعة العربية زي ماهي تقريباً (باكون جايب 100 باخلص المطلع وهي 95) ... فنظام كفاءة الاستهلاك في محرك صني أقرب وأشبه بنظام CVT في الاستهلاك, لكن بالتأكيد محركات سي في تي أشد كفاءة وأحسن ....وأغلى

مجهود رائع تسلم ايدك

اقتباس:

---

المشاركة الأصلية كتبت بواسطة addams_2

these videos are amazing and very helpful indeed, but I would like to ask if the gear box equipped in egypt is CVT or normal automatic ?

---

الفتيس الاتوماتيك الموجود فى الصنى الجديدة فى مصر والخليج والشرق الاوسط والاقصى اتوماتيك عادى 4 سرعات مع محرك 1500 سى سى .. وليس cvt مثل الموجودة فى السوق الامريكى
والفتيس cvt موجود فى مصر فى طرازات قاشقاى وجوك ومورانو
وخارج مصر فى التيما وماكسيما وسنترا

اقتباس:

---

المشاركة الأصلية كتبت بواسطة the_air_devil

في نظري ان المحرك اللي نازل في نيسان (مصر وبرة مصر) مش مجهز بخاصية CVT اللي نازلة في مواتير هوندا , علشان نظام CVT بيزود التكلفة الخاصة بالتصنيع, بالإضافة إلى ان نيسان لو نزلت المحرك ده كانت هاتملا الدنيا بأن العربية دي CVT , أعتقد النيسان قشقاي فيها النوع ده من المحركات

وأغلب الظن ان الموقع سمى العملية دي CVT علشان الاختصار فقط ( Continuous Variable Transmission) مش علشان تجهيزة المحرك الفعلية

---

توضيح هام يا استاذ أحمد لمنع الالتباس..
السؤال كان خاص بالاستفسار عن نوع الفتيس .. هل هو اتوماتيك 4 سرعات ولا اتوماتيك cvt
واجابة حضرتك تطرقت لموضوع آخر وهو طبيعة المحرك هل هو CVVT ( Continuous Variable Valve Transmission) اى مزود بخاصية التحكم المتغير للصمامات ام لا ؟
وطبعا اهم ما يميزها هو الاقتصاد فى استهلاك الموجود والتكيف مع طبيعة واسلوب القيادة ومقدار الضغط على دواسة الوقود واشهر السيارات المزودة بها هيونداى نيو اكسنت مو2006 غير الهوندا سيفك طبعا
وفى نيسان موجود انظمة أخرى لتقليل استهلاك الوقود من حساسات وغيرها
وهناك فرق بين الاثنين .. لذا وجب التنويه :bump1:

مليون شكر على التوضيح يادكتور يوسف ... بالطبع فيه اختلاف كبير بين النظام وبين الأوتوماتك العادي, يمكن انا حاولت اوصل نفس المعلومة بس أسلوبي ماكانش واضح كفاية :) عموماً ربنا يرزقنا ونجيب عربيات فيها النظام ده, لأن المستقبل ليه علشان توفير تكلفة البنزين

شكرا ... تقرير جامد جداااااااااااااا.............. ومجهود عظيم

اقتباس:

---

المشاركة الأصلية كتبت بواسطة Youssef.Awad

الفتيس الاتوماتيك الموجود فى الصنى الجديدة فى مصر والخليج والشرق الاوسط والاقصى اتوماتيك عادى 4 سرعات مع محرك 1500 سى سى .. وليس cvt مثل الموجودة فى السوق الامريكى
والفتيس cvt موجود فى مصر فى طرازات قاشقاى وجوك ومورانو
وخارج مصر فى التيما وماكسيما وسنترا



توضيح هام يا استاذ أحمد لمنع الالتباس..
السؤال كان خاص بالاستفسار عن نوع الفتيس .. هل هو اتوماتيك 4 سرعات ولا اتوماتيك cvt
واجابة حضرتك تطرقت لموضوع آخر وهو طبيعة المحرك هل هو CVVT ( Continuous Variable Valve Transmission) اى مزود بخاصية التحكم المتغير للصمامات ام لا ؟
وطبعا اهم ما يميزها هو الاقتصاد فى استهلاك الموجود والتكيف مع طبيعة واسلوب القيادة ومقدار الضغط على دواسة الوقود واشهر السيارات المزودة بها هيونداى نيو اكسنت مو2006 غير الهوندا سيفك طبعا
وفى نيسان موجود انظمة أخرى لتقليل استهلاك الوقود من حساسات وغيرها
وهناك فرق بين الاثنين .. لذا وجب التنويه :bump1:

---

تمام كده

شكرا على الموضوع المفيد . جزاك الله خيرا .

تقرير و كليبات رائعة .. شكرا علي التقرير ..

الله ينور علي التقرير الجامد ده و ربنا يجعله في ميزان حسناتك يا باشا

تسلم الأيادي ع التقرير والفيديو
ممكن استفتسار عشان مش متابع الجديد من فترة ..
الموديل ده بيتجمع في مصر ولا مستورد ؟ ومش هو اللي كان اسمه سيلفي ؟ وهل صناعة صيني زي السيلفي ؟

اقتباس:

---

المشاركة الأصلية كتبت بواسطة د.محمود صلاح

تسلم الأيادي ع التقرير والفيديو
ممكن استفتسار عشان مش متابع الجديد من فترة ..
الموديل ده بيتجمع في مصر ولا مستورد ؟ ومش هو اللي كان اسمه سيلفي ؟ وهل صناعة صيني زي السيلفي ؟

---

هلا بيك يا دكتورنا العزيز ..
ايه الغيبة الطوييييييييييييييييلة دى كلها ؟! .. لعل المانع خير

العربية دى هى الصنى الجيل الجديد بعد الشكل القديم الكلاسيك
بتتجمع فى مصر بمكونات يابانية هندية صينية مصرية
ومختلف تماما عن البلوبيرد سيلفى اللى فعلا كانت بتستورد من الصين ..

شكراً ع المعلومات القيمه

تسلم ايدك يا بوحميد على الموضوع الرائع ده والمفيد
وجزاك الله خيرا على تعبك فى اعداده

اقتباس:

---

المشاركة الأصلية كتبت بواسطة Ahmed.TV

تسلم ايدك يا بوحميد على الموضوع الرائع ده والمفيد
وجزاك الله خيرا على تعبك فى اعداده

---

الله يسلمك ويسلم كل أيادي القائمين على القسم ده من كتر ماعرفونا وفادونا...وربنا مايقطعلكوا عادة :yeah:

موضوع متكامل تسلم ايدك