حساس الشكمان بتاع الألنترا 2007 عامل كام يارجاله

**samihanwar** · 21-09-2012 03:20 PM

بعد عناء ولف على الورش والميكانيكيه
روحت للمهندس وراح كشفلى على العربيه وقالى ان عندك حساس الشكمان ميت وعاوز واحد جديد وهو اللى عاملك المشاكل دى
لأن العربيه بقت غول بنزين ودخنه سودا من الشكمان وريحه بنزين نى
فأنا عاوز أعرف سعرو ومنين أجيبو ولكم جزيل الشكر والتقدير

**mazeen** · 22-09-2012 12:29 AM

400 جم أصلى ده كان سعره من سنتين

**roland_yamaha** · 22-09-2012 12:30 AM

متابع معاك عشان شكلي هجيب واحد برضو

**samihanwar** · 22-09-2012 02:51 PM

معالى الباشا هو انت عندك بردو دخنه سوده وغول بنزين تصدقنى لو قلتلك العربيه مبتعملش 60 كم فى الصفيحه

**samihanwar** · 22-09-2012 03:32 PM

هو غالى ليه كده؟
مينفعش اركب اى نوع تانى او اجيبو من بره التوكيل احسن انتو عارفين التوكيل اسعارو مبالغ فيها اوى
ولو هجيبو من التوفيقيه بكام
تكلفه تركيبو كام
هو بالمناسبه مصنعيه تغيير فلتر البنزين 50 جنيه

**haissam24h** · 22-09-2012 09:32 PM

لا طبعا 50 ايه ههه انا مغير فلتر بنزين وظبط كتينه وراشاشات والمصنعيه 50 ج
الحساس ممكن يعمل 200 ج ان جى ك بس حاول تفك القديم وتجيب زيه بالظبط عشان ده ليه تاثير كبير على البنزين +الفلاتر الى فى الشكمان مش تبوظ

**roland_yamaha** · 23-09-2012 12:50 PM

بص يا سامح اللي هيخلصلك الموضوع ده م/هاني في مركز سبيد سورفيس بتكلمه وتحجز معاه وهو هيجبلك كل قطع الغيار اللي انت محتاجها و أصلية وممكن يقولك سعرها بالتليفون قبل ماتروح وهيكشفلك بالكمبيوتر الاول علي الحساس وهيقولك ع النتيجة بدقة ان شاء الله عشان هو كان شغال في التوكيل
بالنسبة لاستهلاك البنزين عندي 2009 اوتوماتيك ماشية 87000 كيلو انا قيسته في طريق سفر خدت 30 لتر في 300 كيلو نصه بالتكيف
وداخل البلد بالتكيف ممكن تاخد 30 لتر وتعمل 150 كيلو تصدق
يعني غول بنزين جوة البلد وتقريبا معقولة شوية في السفر فعاوزين نتأكد من ناس تانية برضو في الاستهلاك داخل البلد عامل ايه معاهم

**samihanwar** · 23-09-2012 03:00 PM

شكرا لكم جميعا على المساعده
يعنى أنا ممكن أجيب ماركه تانيه غير اللى راكب فى العربيه
أصل أنا عرفت ان اللى راكب فى العربيه ماركه بوش
بس معلش فى سؤال :
ازاى أعرف ان الحساس اللى هجيبو للعربيه غير ماركه اللى راكب فيها حيشتغل حلو من غير اى مشاكل
زى ال ngk
وشكرا جزيلا
هى كده كده ليها نازله للتوفيقيه
بس انا دولوقتى عاوز أفك الحساس وأنزل بيه
محدش يعرف أزاى أفكو
أو أروح لمين يفكهولى
ميكانيكى وشكمانجى؟

**haissam24h** · 24-09-2012 07:28 AM

ميكانيكى وهات نفس الى فى العربيه لان البوش المانى وفانظف +مش هتلاقيه مضروب ذى ان جى كى
ولو من التوفقيه هاته من جورج حلمى قطع غيار مضمونه 100 %

**samihanwar** · 24-09-2012 03:00 PM

اتصلت النهارده بالبنا فى التوفيقيه وقالى لازم تقولى على الرقم اللى على الحساس عشان أقولك اذا كان موجود ولا لأ
وأقولك على سعرو
ومرضيش يدينى سعرو كام وقالى لازم الرقم عشان ده مش هينفع يرجع