موبايلي وقع تحت الـ Cup Holder
السلام عليكم...
حصلت إنهاردة حاجة غريبة جدا حبيت أقول لكم عليها. اكتشفت إن العربية المازدا 3 الشكل الجديد بتبتلع الأشياء :) ... لو ضاعت منك حاجة قبل كدة وماعرفتش راحت فين... جايز تكون موجودة في العربية المازدا بتاعتك :)
الموضوع ببساطة إني كنت قافل غطاء ال cup holder بتاع العربية وحاطط عليه الموبايل بتاعي..
http://buyersguide.caranddriver.com/...st0320_066.jpg
وبعدين وأنا طالع البيت بدل ما أول حاجة آخد الموبايل غلطت وفتحت ال Cup holder والموبايل عليه عشان أشوف لو فيه حاجة ناسيها جواه... يقوم إيه بأة؟ يقوم غطاء ال Cup holder ياخد الموبايل معاه ويدخل في المنيم بتاعه جوة ال Center Console... بصيت لقيت موبايلي اختفى والغطاء اتحشر ومش عايز يتفتح تاني... لعبته كل الألاعيب ومعرفتش أطلعه... لدرجة إني اتعافيت على غطاء ال Cup holder وكنت حكسره..
المهم مش حطول عليكم... دورت على الإنترنت إزاي ال Cup holder بيتشال ولقيت الشباب دول من كندا بيتكلموا في نفس الموضوع
Mazda 3 2010 Holes in Cup Holder
وطلع ال cup holder متثبت كله بكلبسات مش بمسامير... خد بالك بس إنك أول حتة تشيلها اللي عند فرامل اليد مش اللي ناحية السواق.... ابدأ بالناحية اللي عند فرامل اليد (من على يمين الفرامل مش على شمالها) وإخلع بصوابعك ال Cup holder بالراحة وبتأني حتلاقيه طلع معاك.... كمل بأة واحدة واحدة وبالراحة على الكليبسات.... الحق يتقال إن الكليبسات نوعيتها نضيفة جدا مش من النوع اللي بيتكسر من أول مرة تشيلها حتى لو اتعافيت عليها شوية (افتكرت اللانوس اللي كانت معايا... الكليبسات فيها مصممة إنها تتقفل مرة واحدة بس في المصنع أثناء التجميع.... لو حاولت تفتحها بعد كدة حتتكسر)
الظريف بأة إني بعد ما طلعت الموبايل بالسلامة.... اكتشفت حاجات غرييييييييبة واقعة جوة من نفس الحتة..... آه والله العظيم :) لقيت بطاقة الرقم القومي بتاعي اللي ضاعت مني من سنة وضيعت يوم من حياتي أدور عليها وما لقيتهاش... واضطريت أطلع عليها بدل فاقد..... لقيت كارنيه النادي اللي برضه قعدت أدور عليه ومالقيتوش واضطريت إني أستخدم الكارنيه القديم وأنا داخل النادي وأسمع لي كلمتين كل مرة من الأمن إني لازم أستخدم الكارنيه الجديد .... لقيت إمساكية رمضان..... الصراحة دعيت كتير على اللي صمم ال Cup holder دة.. فعلا ديزاين عبيط جدا الحق يتقال...
ع العموم أنا بشجع كل واحد إنه بفتح ال Cup holder بتاعه ويشوف تحتيه إيه... مع العلم إني محتفظ بحقي في 10% من أي حاجة أي حد يلاقيها :):)
