الموضوع: اشتريت بطارية جديدة (أوبل فيكترا بي)

المشاركة الأصلية كتبت بواسطة kar!m

السلام عليكم و رحمة الله

يوم الخميس اللي فات كنت بايت في القاهرة .. و العربية كانت معايا عشان كان في واحد بيتفرج عليها .. المهم نازل الصبح رايح الشغل بدور العربية مش راضية تدور .. كلمت واحد زميلي في الشغل ساكن جنبي في الشيخ زايد .. قال لي أنا جاي لك و معايا كابل توصيل .. نوصل برضه مش راضيه تدور.

وقفنا واحد بفيرنا ووصلنا على بطاريتة .. برضه مش راضية تلقط .. و الكابل بدأ يدخن .. عرفنا ان الكابل تعبان.

رحت الشغل بعربية زميلي و سبت العربية في زايد .. و رجعت مع واحد زميلي من القرية الذكية على زايد و جبنا كابل نضيف من واحد زميلنا تاني .. ووصلنا .. دارت في ثانية الحمد لله.

كنت رايح الزمالك بعد الشغل .. قمت عديت على سمير بيومي في الدقي .. اكشف يا عم سمير .. قال لي البطارية بالسلامة .. قلت له عندك ايه نضيف .. قال لي ايه سي ديلكو 66 أمبير ب 460 جنية .. و 70 أمبير ب 380 جنية .. واخد القديمة.

قلت له ازاي .. قال لي أصل ال 70 أمبير بتطلع 62 .. انما ال 66 بتطلع 66 .. بصراحة مقتنعتش .. قلت له طيب أشوف الاتنين.

لقيت ال 66 أمبير موديل مختلف عن ال 70 أمبير .. و حسيت كده انها احسن .. قلت خلاص ركب ال 66 بس ضبط السعر شوية .. قال لي عشان خاطرك و من الاخر 440 .. قلت له ماشي.

ركب و دورت .. و رحت مشوار الزمالك و بعدين طلعت على الزقازيق بالليل.

أنا عارف ناس كتير هتقول لي مادام نويت تبيع كنت جيب أي حاجه مستعمله ب 100 جنية ولا حاجه .. بس مرضيتش أجيب حاجه و بعد ما أبيع العربية تقوم تبوظ مع اللي هياخدها يقوم يدعي عليه و لا حاجه .. وبعدين يمكن العربية تفضل معايا .. غير ان الواحد اتعود يعمل الحاجه صح .. بدل ما تبوّظ حاجات تانية.

المهم الناس تخلي بالها من موديل البطارية .. عشان في من الماركة الواحدة كذا موديل .. خصوصل لما تقارن بين كذا محل.

طيب مش تتصل انا سمير جنب بيتى بتعامل معاه من ١٥ سنه هو امين جداً وكلامو صح على ال٦٦ بس لو كنت كلمتنى كنت خليتو يعملك خصم عن كده مش هيبقى كتير ٢٠ جنيه مثلاً بس برضو كويس نعوضهالك فى حاجه تانيه واللى انت عملتو الصح دى الامانه انا اي عربيه ببيعها الى اخر دقيقه قبل ما اسلمها للمشترى بتعامل معاها كأنها معايا ومش هتتباع عشان كده ربنا بيوفق وان شاء الله يوفقك يا كريم والله المستعان