الموضوع: تقريري الاسبوعي عن لوجي 2013 بعد 210 كيلو..

السلام عليكم يا لوجاناويه يارب تكونوا بخير يارب

نبدأ بسم الله


النهارده يعتبر اول يوم في تاني اسبوع من استلامي ل "لوجي" 2013

ولغاية امبارح انا عامل 210 كيلو تقريبا

انا عارف ان الفتره دي متكفيش اني احكم عالعربيه

بس انا قصدت التقرير يبقي علي فترات متقاربه عشان كل واحد خايف من العربيه او بيفكر يقتنيها يشوف التقرير ده اكنه هو اللي راكبها

مبدايا انا مقابلتش مشاكل تذكر لغاية اللحظه اللي بكلمكوا فيها دي
غير بس ان مواسير التكييف متعزلتش جوه المقصوره والصوت عالي نسبيا لو وصل الار بي ام لاكتر من 4

الحلو في الموضوع ان استهلاك البنزين بيقل بطريقه ملحوظه

لدرجة اني قلقت اول مستلمتها كانت عامله حوالي 57 كيلو

وكان استهلاك البنزين وصل ل 18 لتر لكل 100 كيلو

اخر قرايه كانت وانا بركن امبارح وصل الاستهلاك ل 8.8 لتر لكل 100 كيلو ودي حاجه مفرحاني الحمد لله وكمان الموضوع بيقل

نسبة الاستهلاك من ساعة متحركت اول مره ركبتها عامله 10 لتر وحبه تقريبا في 140 كيلو وكنت مفول اول مستلمتها 92 ودلوقتي في شرطتين بس ناقصين الحمد لله

لغاية دلوقتي معدتش 3000 ار بي ام الا مره او اتنين ووصلت لسرعة 120 مرضتش ازود عشان مش عايز اعدي الار بي ام ده دلوقتي

وعلي فكره صوت الموتور لغاية 3000 ار بي ام ولغاية السرعه دي يكاد يكون معدوم داخل المقصوره بجد لكن لو زودت الصوت يبدا يظهر ويعلي

وبالنسبه للثبات انا شايف انه مرضي جدا لحد دلوقتي امبارح جربت 4 او 5 غرز علي الكورنيش ومش زي مبيتقال عليها خالص مرجيحه ومشثابته والكلام ده كلو عالاقل لغاية دلوقتي

عفشه مرنه جدا مع المطبات ومرضيه جداا

وعلوها عن المطبات في راحة بال جدا من انك ممكن تخبط في مطب او لا انت اصلاا من علوها مبتفكرش في الموضوع

بالنسبه للوسع رهييب في الكنبه اللي ورا رعم اني مرجع الكرسي ورا ومع ذلك مش مضايق حد ورا

غير الوسع المبالغ فيه في الشنطه :d ممكن 3 يناموا فيها مرتاحين لو حبيت تقلبها فندق :d

تجميع السرعه عالغيارات القليله بطيئ نسبيا لكن عالغيارات العاليه بتجري لوحدها
ال 120 دي جبتها وانا لسه مجبتش ربع الدواسه عالخامس

التقرير المبدئي عنها مرضي ليا شخصيا وان شاء الله اكون افدتكوا وباذن الله حرفعلها صور قريب

لسه مركبلها النمر امبارح اتكلفت حوالي 1350

حاليا انا نازل عند سعيد نصار عشان حجزت فرش وارضيه وطقم ستاير كله علي بعض اتكلف بالتركيب 800 جنيه ونازل دلوقتي اركبهم ان شاء الله

بالله عليكم كل اللي يشوف الموضوع يدعيلي بالبركه يارب
وربنا يرق واحد كل اللي بيتمناه

ألف مبروك و عقبال ال200 ألف كيلو...