الموضوع: 'طريقه تنظيف دوره التبريد في السيارات ذات الدوره المغلقه ..

السلام عليكم ورحمه الله وبركاته..
-طبعا الاوبل من السيارات اللي فيها دوره التبريد مغلقه يعني الرادياتير مافيهوش (عصفوره) من تحت نقدر نفضي منها الميه علشان كده هنفضي الميه من خرطوم الراجع اللي راجع للقربه من الرادياتير..
-القربه ليها 2 خرطوم راجع ,اشمعني هنختار اللي جاي من الرادياتير؟؟ ببساطه علشان المستوي الافقي للراديتير اقل من المستوي الافقي لمخرج الميه من الموتور نفسه,نخش علي الخطوات ..
اول حاجه دي صوره الموتور اللي هنشتغل عليه فيكترا بي 1600 سي سي وعذرا القربه علي يمين الكادر ..


-هنفتح غطا القربه ونحط اما علبه منظف جاهزه للتنظيف ودي بتتباع في البنزينات الكبيره في حدود 35ج واحسن الانواع هي الامريكي ..او نحط 2 ملعقه كبيره ملح ليمون+2 زجاجه خل مطبخ تركيز عالي
-هنقفل الغطا وندور الموتور ونطلع مشوار طويل شويه بحيث المنظف يشتغل ويعمل بحقه
-ياريت نشغل التكييف السخن من البكره علشان نفتح طريق الميه لتنظيف سربنتينه السخن اللي تحت التابلوه
- هنفك غطا القربه وهنفك الخرطوم اللي اتفقنا عليه واللي السهم الاصفر بيشير له والموتور بارد طبعا وندلدله لتحت بره العربيه


-هنلاحظ ان الميه بدات تنزل ومحدش يتخض لما يشوف لون الميه اسود من السنين ,طبعا مش كل الميه هتنزل جزء منها بس الفيكترا بتاخد في حدود 7 لتر ماء تبريد
-يفضل يبقي جنب العربيه مصدر ميه خرطوم يعني ..
-هتحط خرطوم الميه في القربه من فوق وخرطوم الراجع زي ماهو مدلدل
-هتدور الموتور علشان الطرمبه تشتغل وتطرد الميه المتسخه اللي في مجاري الموتور والمانفولد وباقي الاجزاء
-لاحظ انك تظبط منسوب الميه النظيفه علي قد منسوب الميه المتسخه اللي نازله من العربيه بحيث لا تقل علي الموتور ولا تزيد فتقع بره القربه
-مفيش مانع تساعد بايدك وتزود بنزين من الاكسراتير لتسريع حركه الطرمبه
-هتستمر لغايه ماتلاقي الميه نازله نظيفه جدا .في الوقت ده ارفع الخرطوم وركبه مكانه في القربه وظبط منسوب الميه اعلي من السهم ب2 سم لانه هيرجع يقل شويه طبيعي ماتقلقش وكده مفيش اي هوا في الدوره لان الميه زقته في طريقها انت نسيت ولا ايه؟
-لاحظ ان الميه مش هتنظف من اول مره يعني هتمشي يومين تلاته وتغير ميه تاني بس هنا تغيير ميه بس من غير منظفات
-اول ماتطمئن ان ميه الدوره بقت نظيفه نبدا بقي شغل المحترفين
اعمل نفس خطوات تغيير الميه بس هتستبدل خرطوم ميه الحنيه بجركن ميه خضرا كبير او ميه مقطره ايا كان مصدرها سواء تشتريها او تجيبها من صرف تكييف البيت ولما تحس ان الدوره بقت كلها ميه مقطره حط علبتين كانز ميه خضرا مركزه واحسنهم ابرو الامريكي ب10ج الواحده
-وبكده مبروك عليك نظافه الدوره ,واي استفسار انا في الخدمه . تحياتي