سلسلة كيف تقوم بجميع صيانات التوكيل بنفسك للصني 2005 - 2012
صقور نيسان اعضاء المنتدى الجميل ده كلنا او معظمنا بيروح التوكيل و كلنا اكيد نحب نعرف
"هيا الناس دي بتعمل ايه في العربيه و هل ده المفروض يتعمل و لا لأ ؟" السؤال ده انا سئلته لنفسي و عشان اتاكد من الاجابه بطريقه علميه رجعت للكتب و النت و منتديات صني في دول تانيه لقيت انه للاسف ان اعمال الصيانه مش كلها بتتعمل و الدليل اقرا كتاب الضمان هتلاقوا ان فيه حاجات كتير مبتتعملش الي هيا لو اتعملت يبقى المقابل المادي للصيانه معقول جدا و لهاذا...
:whtauwant: :whtauwant: :whtauwant:
انهارده قررت اعمم الفائده و المعلومات و اقول بالصور و الخطوات و الجداول من نيسان اليابان ازاي نعمل صياناتنا بايدنا و بطريقه علميه صحيحه
هنبتدي انهارده نتكلم عامه عن كل صيانه باختصار المفروض يتعمل و كمان مواصفات كل حاجه يتم تغييرها او صيانتها زي انواع الزيوت و السوائل و كمياتها و بالذات انواع البطاريات المتوافقه مع الصني
الموضوع ده انا بهديه لكل الاعضاء الي بتحاول دايما تحسن في عربياتها من غير ما تعدل على التصميم الياباني و نوصل بيه لاحسن اداء ممكن من الثبات و الاداء و الاعتماديه و بعدين نبتدي نعدل و نزود برضه بطريقه علميه لما نخلص السلسله دي
#1100ff
اولا هنبتدي نقول ايه هيا الصيانات الرسميه بتاعتنا طبقا لجدول نيسان اليابان
http://img560.imageshack.us/img560/888/66518855.jpg
الجدول ده بيشرح مواعيد الصيانه الدوريه و الاعمال الخاصه بكل صيانه و زي ما احنا شايفين فوق عدد الكيلومترات او المده (الصيانه عندنا في مصرنا الحبيبه بالكيلومتر فقط و ده خطأ)
الجدول فيه رموز الاعمال المفروض انها تتنفذ مكتوبه اودام كل مكون في السياره يتم صيانته يقابله عدد كيلومترات او مده زمنيه
I = تفقد او اتاكد ان الحاجه دي سليمه
R = تغيير بدون تفاهم يعني
A = ضبط فقط
C= نظف
E= اتاكد من جودة مياده تبريد المحرك
في جدول تاني معمول لظروف القياده السيئه زي التراب و الشوارع المكسره و الاماكن الي فيها رطوبه عاليه و الزحمه و طول فتره الانتظار و العربيه دايره
و ده بيركز فيه على الحاجات الي بتتؤثر بالقياده في ظروف سيئه و مواعيد فحصها و تغييرها بتقل طبعا عن القياده في ظروف عاديه و هنشرحه بالتفصيل بعد شرح الصيانات العاديه
http://img689.imageshack.us/img689/6169/80579800.jpg
و طبعا ده جدول بكل مواصفات الزيوت و السوائل الموصى باستخدامها اثناء اجراء الصيانه
http://img837.imageshack.us/img837/9986/86735086.jpg
و ده جدول بيوضح كمية الميه المستخدمه لدوره المياه كامله و هي 6.7 و القربه 0.7 لتر
http://img69.imageshack.us/img69/4856/19506012.jpg
و ده كمية الزيت الي كل التوكيلات بتغلط فيها الي المفروض تتحط بفلتر 2.7 و بدون فلتر 2.5 لتر
http://img803.imageshack.us/img803/2433/12077882.jpg
و دي صفحه بتبين ان افضل لزوجه زيت للاماكن الحاره زي بتاعتنا للصني 20-50 و ده بيبقى مكتوب على علبة الزيت من بره
و كمان نسبه تركيز مياه التبريد للاماكن الحاره
تكون 70% مياه مقطره و 30% مبرد و فيه عبوات جاهزه بيبقى مكتوب عليها 30% coolant
او 70/30
http://img268.imageshack.us/img268/4552/53875934.jpg
دي كمان كل انواع البطاريات الموصى بها للصني بتاعتنا و الكود بتاع كل بطاريه و الامبير الي بتخرجه
http://img222.imageshack.us/img222/2671/36375753.jpg
و زي ما احنا شايفين الرقم المكتوب اول البطاريه مش ده الامبير كل نوع بطاريه مكتوب تحته انه بيخرج 12 فولت و الامبير هو الرقم التاني
طبعا انا كان لازم اعمل التمهيد ده عشان لما اشرح الصيانات يبقى مفهوم احنا هانعمل ايه و مصدر المعلومات منين
و ان شاء الله هيتم شرح صيانه ال 1000 و ال 10000 المره القادمه
تحياتي ...