اول 400 كم بالتحفة SX4 Sedan

**haneena** · 03-07-2008 12:59 PM

بجد يا جماعة انا مش عارفة اقول ايه فى العربية دى ماشاء الله عليها ولا حول ولا قوة الا بالله
انا احيانا باخاف فعلا من نفسى عليها لاحسن احسدها

اداء العربية ما شاء الله انا باحس انها طلقة على الطريق السحب ممتاز جدا جدا جدا
انا ماشوفتش عربية اوتو بتسحب بالشكل ده وعشان ماحدش يقولى هو انتى شوفتى كل العربيات هارد عليه واقوله طبعا لأ بس ركبت معظم العربيات اللى الناس بتشكر فيها ومنهم نيسان صنى الاوتو اليابانى مش التقفيل المصرى اللى مالوش لازمة ولانسر 1600 اوتو ومرسيدس c200 ويارس وغيرهم بجد سحب العربية دى رائع

والتكييف مش بياثر نهائيا على السحب لانه شغال بره الموتور يعنى مش بيسحب من الموتور له موتور صغير منفصل عن موتور العربية وده بيخليه يشتغل من غير ماتدور العربية

والتكييف طبعا تلالالالالالالالالالاجة لانى باشغله فى عز الحر ده على مروحة واحد وبيخلى العربية فريزر وكمان بعد شوية باحس ببرودة واضطر اطفيه

السى دى جميل جدا والساوند اكتر من رائع

وارتفاع العربية عن الارض مريح جدا فى السواقة وطبعا فى المطبات وبالرغم من كده العربية ثباتها ممتاز

ونقل الفتيس الاوتو سلس جدا وجميل والعربية فيها شوية حركات كده لزيادة الامان جميلة جدا

الشنطة طبعا بحر انا شايفاها اوسع من الصنى ومن المرسيدس كمان يعنى ممكن تخبى فيها قتيل وماحدش يدرا بيه ههههه

شكل العربية شيك وانا بالاحظ ناس كتير تشد عشان تلحقنى وتيجى جنبى وتهدى عشان تتفرج على العربية وطبعا ده احساس جميل ماقولوكوش عليه وبيبقوا راكبين عربيات كبيرة ومحترمة جدا

العربية فيها شوية اوبشنز لذيذة وكتيرة بالنسبة لسعرها وبالنسبة لانها عربية يابانى 100%
واحلى اوبشن فيها هو الطارة الـmulti function وفيها اتنين اير باج ومرايات كهربا وفوج لايت

وفيها حاجة لذيذة برده فى السنتر لوك بتاعها اكتشفتها بعد ماتخضيت وافتكرت ان الابواب بتعلق لان الريموت لما تيجى تفتح بيه العربية بيفتح باب السواق فقط مع اول ضغطة وباقى الابواب مع الضغطة التانية ومتهايالى هم عاملين الحركة دى عشان حرامية مصر المحروسة مخصوص لان طبعا ممكن تفتح العربية مرة واحدة وتلاقى واحد ابن حلال فى لمح البصر فتح الباب اللى جنبك وخطف الشنطة وحصلت مع واحدة صاحبتى وطلع يجرى وابقى قابلنى لو حصلته
المهم الابواب كلها مش بتفتح مرة واحدة الا مع ضغطتين ورا بعض عشان تكون متأكد ويكون قرارك انت انك تفتح جميع الابواب

وانا ملاحظة ان الrpm مش بيعدى ال2500 لفة والعربية بتاخد سرعات عالية انا بصراحة مش خبرة فى المواضيع دى بس احساسى بيقولى ان دى حاجة كويسة ولو حد يوضحلى يبقى كتر خيره

المهم من الاخر العربية ممتازة لابعد الحدود انا باحمد ربنا وباشكر فضله انه وفقنى فى الاختيار ويا رب يحميها ويكفينى شرها ويرزقنى خيرها

انا دلوقتى فى مرحلة قراءة الكاتالوج فيه حاجات فيها كتير لسه مااكتشفتهاش وفيه حاجات مش فاهماها اصلا زى انه فيها توجيه آلى انا مش عارفة يعنى ايه ومش عارفة اشغله ازاى يا ريت برده حد يفيدنى
وشكرا مقدما

**hazem_khidr** · 03-07-2008 01:11 PM

الف الف مبروك علي العربيه و ربنا يديكي خيرها و يحميكي من شرها .
مستنين صور للعربيه و تقييمك لمركز الخدمه و اسعار قطع الغيار .
يعني شويه معلومات تكون مفيده للي بيسأل لان لو معقوله تبقي خيار ممتاز للفئه المتوسطه:)

**mido777** · 03-07-2008 01:54 PM

الف مبروك العربية ةربنا يباركلك فيها ويكفيك شرها وشر الطريق

انا سوقت الهاتش باك وعحبتنى جدا جدا

بس السيدان اخبار المساحة الداخلية ايه ؟؟ والشنطة مساحتها كويسة ؟؟؟

**haneena** · 03-07-2008 02:31 PM

ميرسى قوى وبالنسبة لصور العربية فيه هنا لينكات كتير ليها
وبالنسبة للتوكيل طبعا مفيش غبار عليه ده من اعرق توكيلات مصر وده عن تجربة لان والدى معاه نيسان صنى بقاله تلات سنين وبيتعامل معاهم وهم ناس غاية فى الخبرة والاحترام ودى من الحاجات اللى شجعتنى اجيب العربية

وطبعا انا كل مااكتشف فيها حاجة هاقول على طول

وبالنسبة للمساحة الداخلية رائعة ومريحة جدا وفيه مساحة كافية بين الكنبة والكراسى واحنا كلنا اوزان واطوال ماشاء الله والقعدة فيها مريحة وانا شايفة انها اوسع من اللانسر وتكاد تكون فى وسع الصنى

والشنطة طبعا بحر زى ماقلت وكمان الكنبة ممكن تطبق وتديك مساحة خيالية للتخزين

**Noha.M** · 03-07-2008 02:46 PM

الف مبروووك عليكيييي و يا رب يباركلك فيها يا قمر و يكفيكي شرها :)

congratulations :)

**haneena** · 03-07-2008 03:37 PM

الف مبروووك عليكيييي و يا رب يباركلك فيها يا قمر و يكفيكي شرها :)

congratulations :)

ميرسى يا سكر ربنا يخليكى ويباركلك فى سيراتوتك ويحفظهالك

**islamnabil** · 03-07-2008 04:59 PM

ياااه كنتي فين من زمان
الف مبروك عليكي و ربنا يباركلك فيها و يديكي خيرها و يكفيكي شرها
انا معجب جدا بالعربية دي ومستنيين بقى التقرير الكامل بعد الالف ان شاء الله

**nav man** · 05-07-2008 10:59 AM

والله انا حبب العربية دي اوي وانتي وطبعا زاد اكتر.بس انا ليا اعتراض علي التوكيل واولهم المهندس ايمن طبعا عارفة. تحسي انة بستخف بالناس. انا كنت باعمل صيانة لغايت 2006 غير ان العمال هناك مستهترين او يمكن علشان انا عربيتي غلبانة سويفت 93 فمش بيهتمو بيها.

**bassam nagy** · 05-07-2008 01:38 PM

الف مبروك وربنا يباركللك فيها
والف شكر على التقييم

**Hisham** · 05-07-2008 03:22 PM

الف مبروك عليكي و ربنا يباركلك فيها و يديكي خيرها و يكفيكي شرها

هى العربيه 4*4 ام عاديه

يا ترى اخبار استهلاك البنزين ايه

عند 2500rpm السرعه بتكون كام تقريبا

وشكرا على التقييم و ياريت

الموضوع: اول 400 كم بالتحفة SX4 Sedan

LinkBack

أدوات الموضوع

عرض

-

-

-

-

-

المواضيع المتشابهه

Frv Sedan

kia pride sedan

Astra Sedan

kia pride sedan

206 sedan

الكلمات الدلالية لهذا الموضوع

المفضلات

المفضلات

ضوابط المشاركة