الموضوع: دليـلك الخـاص عـن الاطـارات .مفاهيم .معلومات . رموز . ارشادات

المشاركة الأصلية كتبت بواسطة DarkMagician

تسلم ايدك يا احمد انت ويوسف على المجهود الجبار ياريت بجد يبقى فيه تفصايل اكتر عن كل نوع من البراندات ومميزاته
ونفسي اعرف الرن فلات بكم بس بدون ما اتصدم ههههههههههههههههههههه

مساء الخير،
انا طبعاً مش ها قادر أتكلم في الكاوتش كتير بعد كده خصوصاً بعد المجهود الرائع إللي قام بيه أ/ أحمد و أ/ يوسف و ده طبعاً ما عهدناه من كل منهم على وجه الخصوص و من رجالة نيسان بوجه عام.
و طبعاً بعد الرد إللي رد بيه يوسف ما كنتش عارف ها أدخل أتفزلك إزاي و أجيب معلومات منيني بش قررت إنني أدخل أضيف شوية حاجات صغيره كده علشان أحلف أننى عملت مداخلة و بصراحة برضو ها انقلها من على الNotes في ال facebook بتاعنا علشان ما أفضلش أكتب كتير
https://www.facebook.com/notes/tirem...15264735246009

في الأول خلينا نعرف يعني أيه run flat
لفظ Run Flat بيتم إستخدامه في حاجتين:
الأولى: كاوتش مزود بخاصية ال Run flat
التانية: نظام إسمة Run flat System

ما هو الكاوتش المزود بخاصية ال Run Flat :
تتميز هذه الإطارات صلابة البناء الداخلي، حيث إن تلك الأنواع من الإطارات قادرة على الحمل المؤقت لوزن السيارة، حتى بعد فقدانها كل ضغط الهواء الذي بداخلها.
ولتمكين الإطارات لتصبح مدعمة ذاتياً، يجب وضع مطاط بجوار أو بين طبقات أسلاك مقاومة الحرارة بجوانب الإطار للحيلولة دون كسر أسلاك التدعيم في حالة فقدان ضغط الهواء. بالإضافة إلى ذلك، فإن تلك النوعية من الإطارات تتميز بوجود بعض الدعامات الخاصة التي تساعد في المحافظة على شكل الإطار الأصلي كما لو كان جديداً، وكذا العجلات بعد شرائها حتى في حالة فقدان الهواء.
أيه رأيكم كلام الإنشاء ده إللي مبني على أسس علمية مدروسه "يعنى كله في الهجايص"

خلينا بقى نقول الكلام بالبلدي الشعبي بتاعنا ذي كده"

هي عبارة عن كاوتش عادي جدا من منطقة المداس "يعني هو هو التكوين العادي لأي كاوتش) بس تكوين الأجناب مختلف تماماً من حيث أن الجنب بتاع الكاوتش مدعم بمواد إضافية تخليه ما يضعفش من ضغط العربية عليه حتى لو مافيش هواء في العجلة - يعني تفضل العربية ماشية من غير هواء خالص في الكاوتش من غير ما تحس إن فيه مشكلة".
بس القدرة دي محدودة طبعاً بمسافة و سرعة و هي( 80 كم في الساعة لمسافة 80 كم في الساعة).
طبعاً الفردة بتتحمل أكتر من كده بس هو ده المعيار إللي مصانع الكاوتش بتدي الضمان على أساسه علشان في عنصر تالت أساسي جداً بيأثر بالسلب و الإيجاب على المسافة و السرعة و هو الوزن الكلي للسيارة.
و من المفضل جداً تزويد السيارات التي تستخدم هذا النوع من الإطارات بنظام مراقبة ضغط الإطارات لتنبيه السائق انه قد تم ثقب الإطار حيث إن صلابة هذا النوع من الإطارات شديدة لدرجة إنها لا تجعل السائق يشعر بعلامات ثقب الإطار التقليدية. ويمكن أن يتسبب عدم تزويد السيارات بنظام المراقبة عن غير قصد في حدوث تلف زائد للإطار حيث إن السائق لا يلاحظ حدوث تسريب لهواء الإطار وبالتبعية لن يحاول إصلاحه أو علاج هذا الثقب.

و تكنولوجيا الكاوتش ال Run Flat موجودة في كل شركات الكاوتش الكبيرة و أسمها بيختلف إختلافات بسيطة عن بعض زي مثلاً:

Bridgestone :RFT (Run Flat Tire
Dunlop :DSST (Dunlop Self-Supporting Technology) and ROF (Run On Flat)
Firestone :RFT (Run Flat Tire)
Goodyear: EMT (Extended Mobility Technology) and ROF (Run On Flat)
Kumho : XRP,
Michelin :ZP (Zero Pressure)
Pirelli :RFT (Run Flat Technology)
Yokohama :Run Flat and ZPS (Zero Pressure System)

و طبعاً الكاوتش ده حلو جداً و تكنولوجيا متطورة جداً لإنه ما بيعرضكش لحاجه إسمها إنك تقف على الطريق بسبب كاوتش مخروم، و كمان النوع ده من الكاوتش بيساعد في ثبات العربية في الملفات أحسن من الكاوتش العادي.
بس طبعاً برضوا فيه كام مشكلة كده:

• إن الكاوتش ناشف جداً و بتحس بكل المطبات إللي في الطريق "بس طبعاً ده مش في بلدنا علشان إحنا الشوارع بتاعتنا كلها متسفلته و ما فيهاش مشاكل"
• لازم العفشة بتاعة العربية تكون مجهزة انها تستحمل النشوفية دي علشان ما تبوظش
• بينزل في مقاسات محددة إبتدأ من مقاس جنط 16 و مش كل ال 16 كمان.
• سعره أغلى من الكاوتش العادي بنسبة تتراوح ما بين ال 25% و ال 50% حسب المقاس و الماركة.

ما هو نظام ال Run flat System
هو عبارة عن حلقة (يتكوين مختلف من شركة لشركة) يتم تركيبها على الجنط من الداخل بدون أن يتم أي تلامس ما بين الحلقة و الإطار من الداخل، بحيث أن لو الكاوتش نام العربية بتمشر على الحلقة إللي راكبة على الجنط من غير ما الجنط يلمس الأرض خالص و بناء عليه بيديك قدرة على الحركة و التحكم في السيارة.
و لكن الإنظمة دي يتكون غالية شويتين تلاته و مش سهلة في تركيبها و صيانتها علشان كده بتستخدم لأغراض معينة ذي سيارات الجيش و الشرطة و نقل الأموال و الحراسات الخاصة إللي بيكون هنالك خوف من إطلاق النار علي الكاوتش فيها.


بالنسبة للسعر ف ده طبعاً بيختلف من مقاس لمقاس و لكن على سبيل المثال و ليس الححص
المقاس 205/55/16 V الميشلان
النقشة Primacy HP عادي سعر البيع 974
النقشة Primacy HP Run Flat سعر البيع 1200


و بكده انا خلصت المداخلة الصغيرة جداًبتاعتي.

مع تحياتي،
محمد يسري
01120011222
01006541113