الموضوع: تنظيف ثلاجه مكيف سيينا 1400 - انظر الشكل

السلام عليكم الزملاء الاعزاء
متعود اغسل و اطهر ثلاجه الكويل الداخلى للعربيه كل 3 سنوات على الاكثر
و من فوائد هاذوها الموضوع
1/ المحافظه على انسياب الهواء بشكل سلس و بدون صوت عالى
2/ تطهير الممرات و المجارى بتاعه الهواء للحصول على افضل نتيجه و هواء بارد بدون رائحه او عطانه..
3/ارضى غرورى باننى لسه بامارس اعمال يدويه فى عربيتى زى الاول
قبل الجواز كنت بعمل العمرة و كل الميكانيكا فى الجراج عندى و منتش بطيق الهواء - كنت بغسل العربيع بالصابون السائل الالمانى ماركه فا والله - و يا اتبهدلت لما كان اهلى بيدخلوا يلاقوا العلبه ال 1000 ملم اللى بتيجى من بورسعيد تقريبا فاضيه

انما الحمد لله دلوقتى ............المهم
4/ رحت للمهندس ايمن مركز كول اير بجسر السويس و طبعا الجو ابتدى يبرد و الشغل خف و العب باه براحتى
الحقيقه الراجل سايبنى براحتى و مدينى كارد برنش فى اى حاجه - و طبعا بستهبل و اطلب اللى انا عايزه.
5/ اليكم الصور و ما تم عمله و ارجو انو يفيدكم باذن الله
1/ الكشف عن اى تسريب قبل الفك و باين الاسطى عبد العزيز وهو بيتعامل مع السياره كانها بنته لانه عارفنى


2/ فك ضفيره العلبه و تنظيف الفيوزات و الكتاوتات بالهواء المضغوط و الاكاى - سبراى تنظيف جاف .




3/ فك مجموعه التحكم و تنظيفه من الشحوم بتاعه الوايرات و الكشف على اللمض و تنظيفها ان لزم :-

4/فك التابلو - علويا عن طريق 3 مسمار النكيه ورا الهوايات العلويه و يراعى الفك و التابوه بارد تجنبا للكسر كالتالى :-

فك كابل الايريال بكل حرص

5/ فك ضفيره التابلو 3 كلبسات فقط - من اسهل و اجمل الحاجات - و بعد فك المسامير العلويه و السفليه بيخرج زى الحيلاوه - انظر الشكل التالى :-







6/ التابلو بره للتنظيف بحرص و فك العدادات و التشييك على اللمبات و تنظيف غرف الاضاءه - اللى فيها اللمبات و بتدى النور الاخضر للتابلوه - و لا تنسوا الشحم الابيض لعداد الكيلومترات بتاع الرحلات - بستخدم سولدر سيل جنك - امريكانى معتبر..كالتالى :-



7/ الفان كويل بترابها و سلاطاتها و ببا غنوجها - طبعا زفت - مع انى مبستخدمش مسدس الهواء داخل السياره اطلاقا





8/ تنظيف سدر العربيه و الاطمئنان على العزل و تثبيته - ساعات بيتحرك من الحراره كالتالى


9/ فك الثلاجه و التراب باين عليها كالتالى



فلذه كبدى و طالعه مع الاسطى عبد العزيز و عينيا هتطلع معاه..

[img] http://www.nileup.com/uploads/13484217023.jpg[/img]

10/ الجثث دى ناتج فك التابلوه للتنظيف بعد ما نخلص و تركب على نظافه

11/ فك و تنظيف الفان كويل :-


12/ الكويل قبل التنظيف وواضح الصدا و التراب غير الاثنين اللى لقيتهم ماجرين مفروش ( بعوضه و فراشه ) كالتالى :-








13 / الارينجات الاصليه و طبعا خارجه زى الفل لانها مفرغه من جوه و المصرى بتبقى مطاط مصمت و بتسرب لو الضغوط عاليه - انصح بلاصلى فى حاله التغيير حتى لو غاليه .
انا ركبتها تانى لانها كانت كويسه.

14/
بعد ما طببت الكويل ونفخته من داخل المواسير بالهواء - بس على ضغط واطى - نقعت الكويل فى ميه و صابون و ديتول لمده 15 د قيقه ثم نشفته بالهواء من بعيد علشان الريش متتبهدلش و حطيته فى الشمس ساعه .كالتالى :-






15/عمل حمايه للبوابه بتاعه الهواء و ذلك عن طريق وضع سلك مجلفن امريكى و تفصيله حسب الشكل بتاع البوابه كالتالى







16/ مكان الفلتر اللى اوماترا مخبياه مننا - حد يعرفه قبل كده

17/ التقفيل وزى ما انتم شايفين الفرق و كمان تم عمل تشييك للسفنج اللى متاكل باخر جديد لعمل احكام للدائره



و طبعا يستحسن تغيير المجفف - الفلتر - اللى عندى اول تغيير ليه من اول 2004 حتى تاريخه
و كمان زودت عزل المواسير اللى كان متقطه من الغسيل
تم غسل السربنتينه كويس بالمياه المضغوطه من بعيد
تم عمل شحن و فاكيوم - تنظيف للدائره - و اضافه زيت الكباس .
و الحمد لله النتيجه مرضيه جدا بالنسبه لى
درجه البروده على السلانسيه 6 و بالمشى 5 و الحمد لله
التكاليف
فك و تركيب التابلوه 200
الشحن و التننظيف و 400 ودفعت 350
اكراميه عبد العزيز 50
الحقيقه طلعت عينه بس متعود منى على كده


و ان شاء الله المره الجايه هاعمل تقرير صيانه مروحه التبريد و تغيير رولمان البلى و الشربون
ارجو انى اكون افدت الزملاء بالمنتدى و لكم تحياتى..