سير الكاتينة اتقطع يا جدعاااااااااااااان

**revenger_345** · 24-09-2012 11:16 AM

السلام عليكم يا شباب
وانا ماشى على الطريق الدائرى امبارح لقيت العربية بطلت لوحداها حاولت فيها ومافيش فايدة
روحت قاطرها لحد البيت عند ميكانيكى جانبى و بعد الكشف انا وواحد صاحبى طالعلى سير الكاتينة مقطوع مع العلم انو ماكملش 3000 كيلو يعنى لسة جديد
المهم انا عارف ان كده العربية شكلها جابت وش سيلندر بس طبعا ماتأكدتش علشان امبارح الحد والناس كلها قافله
ايه رأيكو اعمل ايه افك اللى عندى و اشتريله صبابات و حاجته و اعمله ولا اشترى وش استيراد و اتوكل على الله
عربيتى استرا 2003 ال 1600 سىسى
ياريت حد يفيدنى على الاسعار لو سمحتو و الاماكن انا ساكن فى مدينة نصر وكنت بشترى من الحرفيين بس طبعا مش هاروح للراجل ده تانى
فى ناس وصفتلى محل تقريبا اسمه الوطنية عند رابعة ورا بنزينة شل و قالولى اسعاره غالية بس حاجته كلها نضيفه

**ehabsoft** · 24-09-2012 11:33 AM

السلام عليكم ورحمه الله وبركاته
اغلب العربيات تبطل لما سير الكاتينة بينقطع بس ده مش معناه ان العربية تكون جابت صبابات الا في حاله واحدة
انك تحاول تشغلها غصب عنها يعني تحاول تديها مرش كتير والاخطر انك تحاول تدورها بالذق
ولو انت معملتش الحاجات دي يبقى ان شاء الله هتغير سير الكاتيه وبس وبص على شداد السير ممكن يكون هو السبب في قطع السير ... بالتوفيق

**MohammedAladel** · 24-09-2012 11:39 AM

قدر الل وماشاء فعل سير الكاتينة لازم يكون أصلى ومن الأفضل تغيير البكرتين معاه

وإن شاء الله خير وربنا ما يجيبش ضرر

**HAITHAM1985** · 24-09-2012 12:24 PM

إن شاء الله ولا وش سلندر ولا حاجة .......... هاتغير السير بس وأنا مع إنك تعمل check كامل على البكر زى ما صحابنا الكرام قالوا

**فادى محمد** · 24-09-2012 12:42 PM

ان شاء الله سير كلتينه بس وممكن بليه او بكره الشداد تكون تقيله وعاوزه تتغير وهي اللي قطعت السير
علي فكره وش السلندر مالوش اي علاقه ,اللي لاقدر الله ممكن يتضر الصبابات
بس خلي بالك مواتير الاوبل راس البستم فيها مفحور عليها رسمه قاعده الصباب علشان لما يقع عليها اثناء قطع سير الكاتينه يبات في مكانه من غير اي تلفيات بالشكل ده

ده غير ان حساس الكرنك عندك بيقطع كهربا عن البوبينه في حاله انقطاع سير الكاتينه مهما دورت مش هتدور

**revenger_345** · 24-09-2012 03:09 PM

المشاركة الأصلية كتبت بواسطة hellboy

ان شاء الله سير كلتينه بس وممكن بليه او بكره الشداد تكون تقيله وعاوزه تتغير وهي اللي قطعت السير
علي فكره وش السلندر مالوش اي علاقه ,اللي لاقدر الله ممكن يتضر الصبابات
بس خلي بالك مواتير الاوبل راس البستم فيها مفحور عليها رسمه قاعده الصباب علشان لما يقع عليها اثناء قطع سير الكاتينه يبات في مكانه من غير اي تلفيات بالشكل ده

ده غير ان حساس الكرنك عندك بيقطع كهربا عن البوبينه في حاله انقطاع سير الكاتينه مهما دورت مش هتدور

انا لسه مغير الكاتينة كلها من 3000 كيلو بس و الانواع اللى انا جايبها كويسة ومش اول مرة اجيبها ومعتقدش ان فى الوقت ده يلحقو يبوظوا وعلى العموم انا هاشيك عليهم برضه وربنا يسترها

**karkor30** · 24-09-2012 09:09 PM

قدر الله وما شاء فعل ان شاء الله تبقى حاجة بسيطة

انا بجيب حاجتى من الوطنية اللى ورا شل ومحمد قشطة اللى ورا كشرى هند قدام جامعة الازهر اسال عند الاتنين على حاجتك