ربنا ستر و فعلا كله بتمنه
مساء الخير
من يومين كنت سايق على محور التعمير متجه من الساحل الشمالي للداون تاون بعربيتي (سيفيك 2010 vti كامله اللي فيها نظام ثبات مساعد vsa) حوالي الساعه 8 باليل و دي كانت اول مره امشي عليه بالليل و ده كان بسبب ان كل المحلات قفلت في الساحل و كان معايا واحد صاحبي قلنا مابدهاش ننزل داون تاون و نسهر و نتعشى هناك
المهم الطريق من غير نور ولا متخطط و لا عين قط و لا فار حتى بس كنت متطمن لحد ما عشان العربيه نازله بزينون اصلي و نوره كان كويس و ماشي بسرعه من 100-120 كم في الساعه
لقيت ميكروباس بيرعش قلت اخد يمين و اعديه (على فكره الطريق لو مخطط ياخد 3 عربيات) واول ما جه جنبي ببص قدامي الاقي عربيه كارو على بعد مترين لا اكثر و صاحبي بيصرخ بيأس حاسب حاسب
طبعا ما فيش حل غير فرامل و ارمي شمال جامد في نفس الوقت على الميكروباس عشان هو كان يعتبر ماشي في المنتصف و اللي يحصل يحصل وطبعا مستني الحادثه تحصل
وهوب بالظبط كأن حاجه خدت العربيه من ورا الكارو و حطتها بدقه شديده بينها و بين الميكوباص بدون زحف و لا عومان نهائي
طبعا كنت و صاحبي شوفنا الموت و اترعبنا بس ما لامنيش عشان موضوع الكارو باليل على محور التعمير و لون الكارو كأنها جزء من الليل فا مفيش عاكس لضوء الكشافات وده يلبس اجدع سواق
المهم استغرب جدا انها عدت على خير و خصوصا اني اتصرفت غلط في رأيه عشان موضوع الفرامل مع الدركسيون المفروض يعوم العربيه بس لما قعدنا شرحت له فايدة الاى بي الاس و الثبات الالكتروني و ميزة تعليق الملتي لينك
و فعلا حسيت ان ولا فلوس الدنيا تساوي اوبشن يثبت العربيه و يعدل مسارها و عشان كده تلقى الباسات مثلا تكلفة انظمة الامان تعدي نص تمن العربيه
فياريت يا جماعه قبل ما تبصوا على الشكل و الحبشتكانات اهم حاجه و سائل الامان ما تتنازلوش عنها و متقعدوش تقولوا غاليه على الفاضي و متستاهلش اعتقد حياتك تستاهل
واسف على الاطاله