اوصل ميدان الجيزه ازاى ؟؟

**amraction** · 24-09-2012 09:00 PM

السلام عليكم ..

استفسار صغير يا شباب ..
عايز اروح ميدان الجيزه .. على الرغم من سفرياتى ومشاويرى الكتير ف القاهره الا انى ما روحتش ناحيه ميدان الجيزه ابدا.. و جالى مشوار مهم جدا فيه بعد بكره ..

انا من الزقازيق .. حد يقولى اقدر اروح ازاى بقا ؟؟ المفروض اكون هناك على 9 الصبح عشان الحق اخلص المشوار والقرف بتاعه ..

**mohamed_selim** · 24-09-2012 10:02 PM

عربيه ولا مواصلات؟
لو مواصلات اركب مترو الانفاق فى اتجاه الجيزه ( لو انت فى الخط الاول غير فى رمسيس لاتجاه الجيزه) و انزل محطة الجيزه ٣ دقايق مشى هتكون فى وسط الميدان
لو عربيه شوف انت داخل القاهره منين و امسك صلاح سالم لاخره هتعدى النيل و المنيل و كوبرى عباس هتلاقى نفسك فى الميدان
لو معلومات اكتر عن هتيجي منين ممكن يكون فى وصف احسن و اسهل

**amraction** · 24-09-2012 11:33 PM

اه هيكون معايا العربيه...انا غالبا هكون جاى من الطريق الزراعى... وممكن صحراوى مش هتفرق المهم طريق سالك و قصير مين اقرب صلاح سالم ولا الكورنيش ؟

**amraction** · 25-09-2012 12:20 AM

??????????

**معتز الدهشورى** · 25-09-2012 12:40 AM

ادخل كورنيش وانت جاي من الزراعي وعندك خيارين

الاول تطلع كوبرى الساحل وتنزل شمال هيبقى على يمينك المستشفى وبعدها المطابع الاميرية وتفضل مع الطريق لحد ما توصل العجوزة وتعدي أمام مسرح البالون وبعده النفق ومجلس الدولة وتفضل مكمل على طول وبعدين تدخل يمين اجباري وبعدين شمال عند حديقة الحيوان وجامعة القاهرة وبعدها بشوية تلاقي نفسك في ميدان الجيزة

الثاني والأسهل تدخل كورنيش وتطلع كوبري اكتوبر وتفضل لحد آخر نزلة فى الكوبري ولما تنزل الكوبري تفضل ماشي على طول على طول لحد الطريق ما ياخد يمين في شمال عند حديقة الحيوان وجامعة القاهرة وبعدها بشوية تلاقي نفسك في ميدان الجيزة

دي وصفة سهلة .. دي وصفة هايلة