هل يمكن عمل عمرة لمحرك ميجان 2 او تسقيط موتور استيراد خارج ؟
عرض للطباعة
هل يمكن عمل عمرة لمحرك ميجان 2 او تسقيط موتور استيراد خارج ؟
مفيش رد
بص هو العمره بتاعة الميجان عموما بتتكلف 5 الاف جنيه لو المكنه خربانه من جوه و ده عن تجربه من سنه كده كنت نزلت و دورت علي قطع غيار للعمره او شورت بلوك
الشورت بلوك بقي ايامها كان ب 7 و معني ايه الشورت بلوك ده .. ده عباره عن الموتور فاضي من غير ادوات تغذيه زي كمبروسر التكييف و الدينمو و المارش و الحاجات دي
بس فلاقيت اني افضل اني اعمر و ارخص لاني كنت ناوي اقلب العربيه بعد العمره و مش فيا دماغ اروح ارخص بقي تاني و كده
فعمرة و بعت العربيه و كان الله بالسر علييم
قطع الغيار ماليانه في صقر قريش في المعادي و انا عمرتها عن واحد في الطلبيه اصلا صديق عزيزز هنا من قسم الميجان عرفني عليه و حتي نسيت اشكره بعد مالعمره خلصت لان العربيه كانت عربية اخويا وانا ماحطش رجلي فيها لحد ماتباعت فمش هاعرفتش اشكره بذمه فسكت احسن +
ممكن طبعاًُ............مفيش مشاكل
بس أهم حاجة لو هتسقط موتور تتأكد أن الورق بتاعه موجود.
و أعتقد السعر اللى قالك عليه walidadel مظبوط لأني من فترة كبيرة شوية كنت سألت على موتور 2000 سي سي فى الحرفيين و كان بيتباع ب 15 ألف بس مش فاكر بالفتيس ولا من غير.
سبق وعملت نفس الموضوع أيام ما كنت لسة جديد فى المنتدى مكنتش لسة ا شتريت العربية
بالنسبة للى عمر العربية عايزين نعرف عمرت على بعد مشى كام كيلو ؟؟؟
وهل كان صاحبها مهتم بيها ولا لأ ؟؟
ممكن يكون حاليا السعر أرخص بس هل الفرق هيبقى واضح ؟؟؟ أصل قرأت موضوع حضرتك قلت فيه إن الفرق مش كبير بين ال 1600 و 2000
وهل الدينامو والكمبرسور وملحقات المحرك ال 1600 يتماشوا مع ال 2000 ؟ والفتيس كمان ؟؟
إنت بتحب ميجان أوتو أكتر ولا مانيوال ؟؟؟
هل موجود موتور rs لميجان استيراد ؟
15000 جنيه...شوف حد تشاركه واشتروا نص كامل احسن يا زعيم
هههههههههه طيب ما تقولنا عن خلفيتك عن الأسعار ياباش مهندس وبعدين ال 15 ألف دول محرك 2000 سى سى بالفتيس والكلام دا مش دلوقتى وأكيد كان هيبقى فيه كلام والله اعلم أحنا عايزين دراسة للموضوع دا عشان لو كان لينا عمر والتعديلات المستقبلية
وعايزين نعرف أكتر واحد عربيته مشيت كام كيلو وحالة المحرك
شكراعلى الرد بس عاوزاعرف الموتور يتعمر بعد كام كيلو والعمرة اتعملت فين ولو هسقط موتور بالفتيس ولا من غير الفتيس
هو على حسب الاستعمال بس منعرفش عمره الافتراضى كام كيلو مع الاستخدام الكويس
أصل فيه واحد مهمل فى الصيانات الدورية وتغيير الزيوت والفلاتر والبوجيهات ويحرق على الغيارات عمال على بطال
وكيك داون
غير واحد بيهتم بالعربية
بس عايزين برضه نعرف كل واحد عربيته ماشية كام كيلو وحالتها وهل حس بفرق بعد الاستخدام الطويل ولاحظ تأثير على أداء المحرك وصوته والفتيس الأوتو أو المانيوال
عن نفسى عربيتى 110 ألف كيلو وحالتها الحمد لله كويسة جدا صوت الموتور كويس ومعقول
لكن مع الكيك داون صوته بيعلى وبيبقى ملحوظ ودا طبيعى
لو هاتسقط موتور هاتحتاج واحد استاذ في الميجان علشان تظبيط الكونترولات ويمكن تحتاج إعادة برمجة..او تجيب موتور بفتيسه بكونترولاته (بسلاطاته وبابا غنوجه) وتريح نفسك، علشان كدا الموضوع بقى كله فك وتركيب
وممكن تبدل باللي عندك وتدفع الفرق
MohammedAladel
والله يا هندسة انا كنت سألت العقيد خالد من فترة قال لي إن العربية كاملة نصفين بتلعب في اواخر التلاتينات (الف طبعا :-))
الفرق مش وهمي.........حوالى 27 حصان بس أنا عن نفسي محستهمش 27 حصان.....حستهم 10 أو 12 حصان بالكتير.............يمكن علشان بقالى فترة كبيرة مركبتش الميجان ال 1600
بص أنا مجربتش الميجان مانيوال خالص............مش هقدر أحكم
بس العادي أن أداء المانيوال أحسن.
أعتقد موتور ال rs ممكن تلاقيه............بس محتاج مجهود و وقت فى التدوير و التركيب.
يا كبير الكلام ده كان من 4 سنين على الأقل :)
أكتر أتنين مشيوا بالميجان على ما أذكر هما hegazio و تقريباً عدى ال 200 ألف كم
و محمد مصطفى و أعتقد وصل 180 إن مكنش أكتر
الأتنين كانوا منزلين عربياتهم من السعودية
مفيش مقياس لحاجة زى كده غير حالة الموتور...........و الكلام على أى عربية مش على الميجان بس.
يا ريت تقولنا أنت بتفكر تعمل عمرة أو تغير موتور ليه ؟
حاسس ان العربيه مش بتسحب كويس مع ان صيانتها معموله فى التوكيل وانا لسه شاريها وعاوز اعمل عمرة تخلينى مستريح سنتين او اركب موتور استيراد ومش عارف
الحقيقة أنا مش متخصص أوي في الموضوع ده بس أعتقد موضوع السحب مش شرط خالص يكون ليه علاقة بالموتور وبعدين موتور الرينو علشان يحتاج عمرة يبقى لازم يكون اتهان جامد يعني مش بالبساطة دي يتعمله عمرة، أنا عاوز أعرف هو العربية ماشية كام كيلو؟ وبعدين انت أول مالك ليها ولا شاريها مستعملة؟؟
وبرضو بالنسبة لحالة الموتور أعتقد بيتعمل حاجة اسمها compression test وهي اللي بتحدد حالة الموتور ولازم حد متخصص يركب العربية معاك ويختبرها ويقدر يحدد هل المشكلة من الموتور أصلا ولا لأ؟؟
المهم انك تاخد بالك وماتخليش أي حد يلعب في العربية علشان الفكرة دي (عاوز اعمل عمرة تخلينى مستريح سنتين) مش في العربيات دي خالص
وربنا يعملك اللي فيه الخير
برضو سؤال تاني
الصيانة الأخيرة بتاعة التوكيل كانت صيانة كام ألف؟ واتغير فيها إيه؟ وآخر صيانة قبلها كانت امتى؟؟
طيب خلينا نشوف كده واحدة واحدة
السحب فيه تغيير عن قبل كده ولا أنت من ساعة ما أشتريت العربية و هى كده ؟
هو الفكرة ببساطة أنك ممكن تكون مش متعود على سحبها أو كنت راكب حاجة سحبها أعلى من الميجان و متوقع من الميجان أداء مقارب.
ممكن تكون الرشاشات مسدودة
ممكن تكون طرمبة البنزين ضعيفة
ممكن البوجيهات
بتحط بنزين كام.......فيه أسباب كتير.
طيب الموتور هل بيطلع دخنة ؟
هل بتلاقى الزيت بينقص مع أن مفيش بينزل تحت العربية ( بتاكل زيت)
هل الزيت عامل طحينة ؟ ( المياه داخلة على الزيت )
و ممكن برضه تكشف على كبس الموتور زى ما العضو abdo_2812 قال.........بس يفضل فى مكان متخصص فى رينو.
انا متشكر جدا لكل العلومات الهامة
رأيى موتور جديد و بلاش من القديم بس تروح لدكتور ميجان مش اى حد عشان ترجع عروسة
والموتور الجديد دا بكام ؟ أكيد هيعد رقم كويس :)
سؤالين
هل الفتيس االلى مع المحرك ال 2000 سى سى الأوتوماتيك هو نفسه اللى مع ال 1600 ونفس الكلام للمانيوال ؟
هل الفتيس المانيوال اللى مع المحرك ال rs هو نفسه اللى مع المحرك ال 1600 و 2000 طبعا مينفعش المحرك دا يركب مع الفتيس الأوتو هيبقى اقوى منه بكتير
كدا سعره كتيير اووى طب لو اتوماتيك يبقى كام