شداية الحمد لله اني خسرتها
سلام عليكم
عايز اقول في الاول ان مش عادتي عموما اني اشد مع حد , يمكن غاوي اجري بس مابحبش الشد , و عربيتي مش بتاعة شد
بس حيث ان الموضة حكايات الشد بقى اليومين دول :)
النهارده كنت ماشي على الدائري , و الطريق كالعادة قافلاه عربيات النقل ماعدا الحارة الشمال كان بيعدي منها بيجو 7 راكب على اقل من مهله , دخلت وراه و و انا بادخل كبس عليا واحد ظريف بعربية فيرنا , المهم ما سألتش فيه و خلتني ورا البيجو و هو عمال يتحنجل ورايا و كل ما حتة بسيطة اوي تفضى بيني و بين الحيطة يحاول يحشر نفسه فيها
المهم مجرد ما البيجو عدى رحت انا جاري يمين كعادتي لما باطلع من حتة زحمة عشان اريح دماغي منهم , و لقيت الاخ ماسك في ديلي , و عرفت ان انا اتورطت في شداية
المهم قلت و ماله و اهو الطريق فاضي و مستقيم , و الطبيعي يعني اني الفيرنا هاتطلع مني هوا , رحت جاري و جري ورايا , مش عارف عشان على سرعة عالية ولا ايه لقيته ما سبقنيش و المسافة بيننا زادت شوية صغيرين
لحد ما وصلنا لكمية عربيات ماشية ابطأ مننا , و انا لقيت نفسي لو دخلت وسطهم هاضطر اخد غرز غبية و الوضع هايبقى غبي رحت موسع من قدامه للناحية التانية و مهدي ............... و لسذاجتي افتكرت البيه هايعمل زيي , و طبعا اتفاجئت لما شفته دخل بسرعته الغرزة الغبية اللي انا ما رضيتش ادخلها و اخدها قطم و شفته و هو بيعاااااااااااااافر عشان يلم العربية تاني و لمها فعلا , انا طلعت من وسط العربيات بالراحة و هو كمل جري و غرز
للحظة تخيلت انه كان ممكن يلبس في العربية اللي قدامه او انه ما يعرفش يلم العربية بعد الغرزة و يلبس في حد تاني , و خفت يبقى ليا يد في ده !!!
الحمد لله انها جت على قد كده