ازاي تعرف تاخد حقك من التوكيل-قصة واقعية
السلام عليكم
أخويا شغال فى أحد الدول العربية و معاه عربية توارج 2005 شاريها من الزيرو.
العربية من فترة كده التكييف فصل.....و طبعاً التكييف فى الخليج أهم من العربية نفسها زى ما أنتوا عارفين :)
المهم هو راح لورشة علشان يصلحوا التكييف و فعلاً أتصلح بس رجع باظ تاني بعد فترة بسيطة......فقرر أنه يروح التوكيل و خلاص.
راح التوكيل فى شهر 8 أكتر من مرة و مش راضيين يدخلوا العربية بحجة ان الشركة اللى معاها التوكيل أتسحب منها و أخدته شركة تانية.......و بعد محاولات كتير دخلوا العربية يوم 24/8.
التقرير هو أن الكمبرسور محتاج تغيير بس العربية هتاخد 10 أيام لأسبوعين علشان الكمبرسور هيبعتوا يجيبوه من دبي.
طبعاً بما أنه معندهوش حلول تانية فوافق.
يوم 4/9 كلموه و قالوله أن الكمبرسور وصل و خلال يومين هيستلم إن شاء الله........و لحد النهاردة مستلمش العربية !!!!
كل ما يروح بيقولوله فيما معناه أن عربيتك واخدة دورها و لسه مخلصتش......و هو هناك أكتر من مرة كان بيلاقي ناس معاها عربيات تانية فولكس فاجن و عندهم نفس المشكلة.
و كل مرة يطلب هو أو أى حد من الناس اللى مش عارفة تستلم عربياتها أنهم يقابلوا مسؤول أو ياخدوا تليفون مسؤول أو حتى الأيميل بتاعه....يكون الرد.....ممنوع.
لحد مرة كان فيه واحد عربيته جوة و قالهم خلاص أنا مش عاوزكم تعلموا حاجة فى العربية...أنا عاوزها زى ما هى.....رفضوا.......قالهم أنا هدخل الورشة أخدها.......هددوه أنهم يطلبو له البوليس !!!!!!!!!!!!!!!!
أخويا حكالى القصة دى من يومين.....بالصدفة.....طبعاً أنا دمي غلي لما سمعت أنهم بيهددوا عميل أنهم يطلبوا له البوليس....يعنى أيه أطلب البوليس لعميل عاوز يستلم عربيته علشان التوكيل أتأخر فى تسليهما ؟؟؟؟؟؟؟؟؟؟؟؟؟؟
طلبت منه بيانات العربية و ال vin....و كتبت شكوى محترمة و بعتتها لفولكس فاجن الشرق الأوسط...و فى نفس الوقت طلبت من أخويا يروح على التوكيل هناك و يطلب أستلام العربية...و لو رفضوا و هما غالباً هيرفضوا علشان طلبوا الكمبرسور من دبي......هو اللى يهددهم أنه هيبلغ البوليس :)
النتيجة المبدئية من التوكيل مش من فولكس فاجن الشرق الأوسط....كلموه فى نفس اليوم بعد ما هددهم أنه هيبلغ البوليس...أعتذارات بالجملة...و معلش قطعة الغيار لسه موصلتش من دبي.....مع أنهم كانوا قايلين يوم 4/9 أنها وصلت !!!!!!!
و فى الأخر قالوله حضرتك شرفنا بكره و هنديك عربية بديلة لحد ما عربيتك تخلص :)
راح أمبارح أخد عربية توارج 2013 مش ماشية 5 الاف كيلو لسه :))))
و لسه إن شاء الله مكمل فى الشكوى برضه علشان أحاول أجيب خصم على الكمبرسور أو خصم على صيانة بعد كده............أى حاجة تطلع منهم.
القصص المستفادة من الموضوع
لو عندك شكوى من عربيتك......لازم تعرف تكلم مين و إزاي
لو توكيل العربية فى مصر مش مهتم بشكوتك......صعد الموضوع لتوكيل عربيتك فى الشرق الأوسط.....و لو منفعش صعد الموضوع أكتر للبلد الأم.
أنا عارف طبعاً أن فيه بعض الماركات حتى لو بعتت للبلد الأم مش هيتحركوا قوي.....بس عموماً الشركات الكبيرة بتخاف على منظرها قدام عملائها....و مش عاوزة تفقد عميل واحد.
طبعاً لو مفيش أى إهتمام من التوكيل أو الشركة الأم.....مفيش قدامك غير حل أخير و هو حماية المستهلك....و لو وصل الموضوع لحماية المستهلك يبقى بلاش تتعامل مع الشركة دى تاني طالما مش بيقدروا العميل بتاعهم.
المهم أنك متسيبش حقك لأن محدش هيجيبلك حقك غيرك.
معلش طولت عليكم بس التفاصيل بتاعة الحكاية طويلة شوية.