الموضوع: سيارة مستعملة مناسبة

معليش يامحمد باشا اعفيني عن الرد عن سؤالك .... لاني لو رديت هتبص تلاقي امة لا اله الا الله هيخوشوا هنا ويهجموني ان ازااااي وازاي بجيب سيرة الرينو سنديرو ههههههههه.

وانا بقولك على عربية يباني ١٠٠٪. وانتا تقلي فرنساوي. وياريتها فرنساوي الا انها فرنسا مشتريا عربية داتشيا في رومانيا وبتتصنع في المغرب علشان تجينا في الاخر هنا مصر وكلها عيووووووب والناس بتشتكي منها. ورغم ذلك يطلعلك واحد من تحت الارض ويقلك لا مفهاش عيوووب والعربية زي الفل ياعم بص العربية فيها مش عارف ايه. يقلك لا ياباشا دي ميزة وزي الفل .... ياااااا راجل في اكتر من اني بقول لواحد صاحبي بص بص على القزاز الكهربا بيتقفل ببطئ ازاي تحس ان الشباك بيطلع جبل بطيييييييييء. يقلك لا ياباشا دي ميزة علشان لو عندك اطفال وواحد بيحط صباعوا ميتعورش هنههههههههه. طب قولي ده هقولوا ايه بقه.

انا مسقتش السنديروا. بامانه بس الي اعرفوا هيا الهاتش باك للوجن. الي كانت عندي و طلعت عين اهلي .... وقرفتني حياتي .... حتت صفيحه مقفلنها عربية .... ومع ذلك في ناس بتشكر فيها وفي ناس عجبتها وبتبوس ايدها وش وظهر عليها. ... ولو سئلتهم عنها هيقولولك زي الفل وشنطتها زي المرررررررررررسيدس ده في حتى واحد من جبروتوا بيقولي كان عندوا اوبل فيكترا ومعجبتهوش وراح ركب لوجن طب قولي. ده هقولوا ايه زي واحد كان عايش في فيلا على البحر وقال ايه معجبتهوش وقال لا يييييبيع فيلا ييييع خليني اخودلي اوضتين فوق السطح في امبابة طب قولي ده هقولوا ايه خلاص عاوز تعيش فوق السطح عيش فوق السطح وبلاش فيلل.

فمينفعش ياباشا انا بكلمك على فيلا على البحر وانتا بتكلمني على اوضتين وصالة فوق السطح هههههه
زي ما انا بكلمك عن حاجة ياباني ١٠٠٪ من هوروشيما ذات نفسها وانتا بتكلمني عن عربية ابوها روماني وامها فرنساوية. ومتربية في المغرب دي حاجة ودي حاجة تانية .... وعامة هيا كويسة علشان حبايبنا في رينوا ميزعلوش .... بس هتعاني من حاجة فيها هيا حتت السخونة الي من تحت التابلوة بالذات على مشاوير المحور وزحمة المحور في عز الشمس وعز العصر وعز الزحمة هتحس بحرارة بتيجي من تحت التابلوة وبص دلوقتي على الردود واحد هيقولك لا مفيش حرارة والتاني يقلك حطلها حتت فله ولا مصورة بلاستيك على مش عارف ايه والتالت هيقول. لا حط لباد تحت دواسة البانزين والرابع هيقولك شغل التكييف وانتا مش هتحس بالحرارة ههههههههه خليك في المضمون يافندم والمجرب .... وصدقني عربية ياباني مستعملة بكفائة عربية فرنساوي جديدة بل تكاد تكون اكفئ. وعن تجربة

وبلاش كده يافندم خش قسم ديهاتسوا او تويوتا هتلاقي نايم. كل فين وفين لمن حد يكون عندوا مشكلة بسم الله مشاء الله وخش قسم لوجن هتلاقيه شغال الله ينور. اشي واحد عندوا صفارة واشي واحد بيشتكي من حرارة واشي العربية بتزحف واشي مش عارف ايه واشي ابصر ايه ههههههه والجميل في الموضوع ان عربيتهم مكملتش كام سنة في السوق وبان عليها كم المشاكل دي !!! بس احنا في تويوتا او ديهاتسوا كل عربيتنا اغلبها قديمة وهلكناها ( بسم الله مشاء الله ) فقاعدين بنتسلى على الاقسام التانيه هههههه

المهم في الاول والاخير القرار قرارك وماخاب من استشار خش قسم رينوا اكتب كده اجيب سنديروا ولا ديهاتسوا هتلاقي امة لا اله الا الله كلهم يقولولك هات سانديروا دي خطيرررررررة دي عجيبة دي جميلة
وخش قسم ديهاتسو اعمل نفس الموضوع. مش هتلاقي حد يرد عليك ههههههههه لان ايش جاب لجاب ياباشا .... في حاجة عاوز اقول حضرتك عليها يا فندم. عنصر الجووووودة والاتقااااان في الصناعة .... وتلاقي الحاجة كده ماسكة نفسها دي لوحدها ليها تمن يافندم ... امسك باب السيريون وامسك باب اللوجن او السنديروا وانتا هتعرف لوحدك يعني ايه اتقان في الصنعه وضمير في الحاجة الي بيعملوها .... جرب تروح اي معرض واركب عربية سنديروا او لوجن وشوف قاعدت الكرسي عاملة ازاي .... واقعد في عربية يباني وشوف القعدة بتختلف هنا ازاي .... جرب فرامل دي وجرب فرامل دي وهتعرف الفرق بنفسك ( بسم الله مشاء الله ) ... في النهاية انا مليش مصلحة لو اشتريت دي او اشتريت دي لكن بقول النصيحة لوجه الله لاني بعتبرك زي اخويا .... وعلشان ربنا يردهالي لمن اسئل اي حد يجاوبني بامانة. وبمنتهى الامانة في اي حاجة اعوزها . ومدبيس في حاجة زي ابن الحلال الي دبسني في عربية لوجن بعد ماقالي قصيدة شعر فيها واشتريتها واكتشفت انها علبة صفيح باربع عجلات على شوية كراسي منو لله بقه الي دبسني فيها .... ولولا اختلاف الاذواق لبارة السلع. ... جرب يافندم. تروح توكيل عربيات وشوف العربية دي وشوف العربية دي ومتتكسيفش اركب وافتح واقعد وتخيل نفسك ورى الدريكسيون وتخيل ان دي هتبقى عربيتك ان هتدفع فلوس تعبان فيها مش هتاخودها ببلاش ... اركب وعاين وقلب براحتك وشوف نوعية المتاريل .... هتبان حتى من اوكرة الباب اي عربية في الشارع امسك اوكرة باب دي وامسك اوكرة باب العربية الياباني لان الكتكوت الفصيح من البيضه بيصيح ومع احترامي طبعاً لشركة رينو ومصنع داتيشا رومانيا ومصنع المغرب. وملك المغرب. مع احترامي للجميع ( وده مجرد راايي الشخصي ) وربنا يوفقك لما فيه الخير والصلاح ويعترك على عربية. تشوف على وشها الخير كلوا وتكون قدم السعد عليكي وتحياتي . وبالتوفيق انشاء الله