ترخيص اللوجان بيتكلف كام يا جماعة ؟؟؟

الحمد لله حجزت العربية وهستلمها يوم الأحد إن شاء الله ... وكنت عايز اعرف الترخيص 3 سنين هيتكلف كام ؟ ولازم يطلع معايا مندوب من المعرض ولا لأ لأنى ساكن بعيد جداً عن المعرض والمرور بتاعى فى الشروق والمعرض فى العجوزة ..... أرجو الإفادة .

للأسف أنا إشتريت العربيه إستعمال وكان نفسي أرخصها عشان أعرف أرد علي سعادتك
معلش بقا
ممكن حد من الاعضاء يرد عليك ف الموضوع ده

مش لازم يكون معاك مندوب لازم يكون معاك شهادة افراج جمركي


بتروح المرور
ملف 40 جنيه
تفحص
مفيش مخالفات عشان اول مرة
تشتري طفاية 120
تشتري مثلث 30 جنيه
تشتري علبة اسعافات 40 جنيه
تفحص طبعا صوري عشان العربية زيرو
تدفع تامين 220 جنيه
تروح الشباك تدفع ضريبة 660 جنيه
تدفع نمر 120 جنيه
حبشتكانات 50 جنيه

بس والف مبروك

متشكر لذوق حضرتك .. وأرجو من احد الأعضاء الإفادة

متشكر جداً يا دكتور أحمد لإهتمام حضرتك ووقتك .

شوف يا سيدى أنا لسة مرخص من 15 يوم لمدة 3 سنوات كالآتى:-
870ج ضريبة شاملة 35ج ورق الترخيص ل3سنوات
121ج طفاية
20ج تظبيط للمهندس الفنى عشان ميسألش عالمثلث و حقيبة الإسعافات اللى هم موجودين أصلا
125ج نمر جديدة
45ج ورق الفحص
75ج أخذها الموزع المعتمد لإستصدار شهادة البيانات
320ج تأمين إجبارى 3سنوات
الرجل اللى بعته معايا الموزع أخذ 100ج و حسيت أنه سرقنى فى أكتر رغم أنى كنت معاه خطوة بخطوة بس موضوع 125 النمر ده أنا شاكك فيه!! هو ورانى ورقة كومبيوتر مطبوع فيها بنود آخرها مكتوب ال835ج و الخزينة زودتلى ال35 ج بتوع ورق ال3سنين.....
بس أنا أعرف أن النمر الجديدة بحوالى 155ج وبتبقى مدرجة ضمن الضريبة!! لو حد عنده معلومة أنا مش عارفها بهذا الخصوص يقولى
10ج للواد اللى شنير الإكصدام وعلق النمر
حوالى 40 ج تظابيط أخرى للموظفين
الموضوع مخدش أكتر من نصف ساعة عشان الرجل اللى كان معايا كان عارف سكته كويس !!
و مبروك مقدما لكل اللى مقبل عالترخيص و بالتوفيق إن شاء الله

حماده مبروك على حجز العربيه وتدوبها فى عرق العافيه ان شاء الله , اهم حاجه يبقى معاك شهاده بيانات والتخليص الجمركى من الموزع

انا فاكر ان الموضوع شاكب راكب ترخيص 3 سنين كان حوالى 1200 جنيه ومش لازم تاخد حد من المعرض ولا حاجه

ماتنساش تبص على المواضيع بتاعه الاستلام علشان تتاكد من الحاجات اللى لازم تبص عليها وانت بتستلم

والف مبروك مره تانيه

الف مبروك ياباشا اهم حاجة فى الحوار ده كولو انك ماختش فه غير نص ساعة بس وده انجاز جااااااااااااامد

شكراً ياجماعة على الإهتمام والله يبارك فيكم كلكم ............. وشكر خاص للباشمهندس محمد على نصيحته الغالية ليا بالعربية دى

اجراءات ترخيص سيارة لوجان 3 سنوات اول مرة

بالنسبة للترخيص
1- بتدخل بالعربية من المرور وبتركنها علي جنب هيجيلك مليون واحد مبرووك يبية واحنا تحت أمرك وكدة سيبك وروح اول حاجةروح اشتري ورق ترخيص عربية من الخزنة 3 سنوات وهي عبارة عن 3 اوراق متشابهين ومعاهم ورقة اسمة البيئة وورقة لونها ازرق بتاعت البصمة والتعيين وورقة صغيرة لونها احمر بتاعت الطفاية الكلام دة ب 48 جنية و 2 جنية شاي سعتة
2- روح اشتري ملف بجنية وحط فية الاوراق
3- هات بتاع البصمة واديلو الي فية النصيب وخلية يرفع البصمة من علي الموتور
4-روح ادفع التأمين عند اي شباك تأمين 3 سنين (320 جنية)
5-روح لشباك الي بيبيع الطفاية واشتري واحة واديلة الورقة الحمرا الصغيرة (121 جنية
6- وروح للمهندس بتاع الفحص بأوراق العربية الي انت خدها من سمير ريان وهي عبارة عن (ورقة الافراج الجمركي - ورقة مبيعة الشركة المصرية للشركة السبع - ورقة مبيعة شركة السبع لسمير ريان - ورقة مبيعة سمير ريان لسيادتك - شهادة بيانات العربية)
7- هيقولك خرج العربية برة المرور وتعالالي تاني علشان اختملك الورقة
8- هتروح تخرج العربية وترجعلة هيختملك الورقتين (البيئة والفحص) وهيقولك روح اشتري المثلث وشنطة الاسعافات طبعا بيفرق من مرور لمرور (انا كان اجباري ان اشتري علشان انا مرور مدينة نصر (مثلث 30 جنية - شنطة اسعاف 45 جنية )
9-هتتدخل جوة المرور هتصور جميع الاوراق بتعتك الاصل وتحتفظ بيها ليك علشان هيخدو الاصل كلو منك
10- هتصور بطائتك صورتين
11-هتروح علي شباك اسمة (ترخيص سيارة ) وهتستني دورك
12- هيقولك تحت امرك هتقولة سيارة زيرو ترخيص 3 سنوات
13-هيقولك الف مبروك يبية كالعادة هيشوف الورق طبعا بعد ما تكتب بياناتك في ورقة من ال 3 وراقات المتشابهين بتوع ال 3 سنيين
14- هيقولك بطاقتك علشان يتأكد من بياناتك
15- بعد 15 دقيقة هيكون مسجل بياناتك وظبط الدنيا هيديلك ورقة بيقولك روح ادفع الضريبة 805 جنية هتقولة أية هيقولك معلش علشان انت اول مرة تعلق النمر فتمنها لوحدها 155 جنية (ما علينا امرك للة روح للخزنة وادفع وتعالي روحلة تاني)
16-هيرجعلك البطاقة وهيقولك استني برة عند شباك استلام الرخص وهتستلم ببطاقتك
17- هتستني من 30 دقيقة الي 60 دقيقة حسب الضغط وهتسمع اسمك وكأنك سمعت احلي اسم فالدنيا
18-هتاخد الرخصة وهتعد تقراها كلمة كلمة وحرف حرف وتوبسها وتحضنها والناس هتبوص عليك وتقولك مبروووووووووووووووك
19-هتروح لشباك استلام الالواح المعدنية وتديلة الرخصة هيديلك اللوحة وهتلاقي عيل صغير او راجل واقف بيقولك هتعلق يبية هتقولة يلا بينا يبرنس
20-هيخرم فالاكصدام وانتا حاسس انة بيخرم قلبك بس مش مشكلة هتقولة خليك حنين عليها وبراحة علي السنيورة اصلها اول مرة (وبردة الي فية النصيب )
21- اخرج بقة يابشا وربنا يحرصهالك من العين ويكفيك شرها وتكون وش السعد عليك وعلي عائلتك وربنا يبارلكلك فيها


منقول ولعلمك الحوار عمل معايا 1350 تقريبا
و 125 للواد بتاع الشنيور اللى جاب واحد يقفلى ع الشبابيك ويخلصلى الورق !!

لكاتب الموضوع الف مبروك علي العربية بس عندى سؤال مهم انا نفسي اجيب العربية دى بس خايفة من صيانتها هل ممكن اى ميكانيكي يشتغل فيها . انا عارفه ان سؤال بعيد عن الموضوع بس بجد مش لاقيه حد يجاوبني علي اسئلتي وشكر لكم مقدما

أولا : 1000 شكر للأستاذ ابو محمود على الرد والإهتمام واشكرك على الشرح الوافى .
ثانياً : بالنسبة لسؤال الأستاذة دهب طبعاً انا مقدرش اجاوبك عليه لأنى لسة مستلمتش حتى العربية بس انا عايز اقول لحضرتك انى بقالى شهرين بعمل مقارنة ما بين اللوجان والفيرنا واللانوس والساجا ووصلت فعلاً إن اللوجان احسن عربية فى تلك الفئة على الرغم من ان اللانوس والفيرنا اسهل وارخص فى الصيانة إلا ان رأيي الشخصى هو اننا لازم نخرج من مفهوم العربية الشعبية ونسترخص إحنا بنجيب حاجة بتعيش معانا سنين ولازم يكون العربية فيها كل الأوبشنز اللى تريحنى وتساعدنى حتى لو كانت هتكلفنى فى صيانتها اعلى شوية بس مش اعلى كتير زى ما الناس فاهمة .... عموماً إدخلى شوفى قسم المقارنات وهتلاقى اللوجان مكتسحة فى فئتها ..... وأخيراً القرار يرجع لحضرتك

ياحماده ياجامد