صنى 2013... والنهايه الأخيرة مع الكاوتش الماكسس

**saint2011** · 27-09-2012 02:03 PM

الأعضاء الأعزاء مالكى الصنى 2013 السلام عليكم ورحمه الله وبركاته

بعد السؤال والتمحيص والبحث فى كيفيه التخلص من الكاوتش الماكسس الصينى السىء جدا وبعد تجربة أخونا الدكتور علاء مع البريدجستون وكانت المشكلة تتلخص مين هيقبل يأخد الكاوتش السىء ده ؟؟؟؟؟؟؟؟
لأن مش كل الناس هتلاقى عضو على المنتدى يأخد الكاوتش ده بسعر عادل ذى حالة الدكتور علاء ؟؟؟

المهم من غير تطويل انا كان فى واحد جارى فاتح مركز للكاوتش والبطاريات والزوايا وجنوط أسبور كل يوم وأنا ماشى بعدى عليه وانا راجع من شغلى ففى يوم قولت أجرب وأدخل أتكلم معاه وأحاول أشوف الدنيا عاملة أيه عنده المهم دخلت وسألت على صاحب المكان ولم أجده قالولى بيجى بدرى وبيمشى بدرى المهم سبتلهم رقم موبايلى وقلتلهم ياريت لما يجى يكلمنى عشان انا عايزة فى موضوع مهم وانا هنا جاركم فى أخر الشارع .

فى المساء لقيت الراجل بيكلمنى عرفنى بنفسة المهندس أشرف وتحت أمرك طلباتك أيه وحضرتك سألت عليه خير شرحتلة موضوع الماكسس وقد ايه هو سىء الراجل بصراحة قالى انا مبشتغلش فيه وحضرتك شرفنى وشوف أنت محتاج ايه روحت تانى يوم وجدت الأتى :
1- ميشلان 195-60-15 T وسعره 610 جنيه ألمانى
2-كونتيننتال 195-60-15 H وسعره 560 جنيه أوروبى
3-بيريلى نفس المقاس أنجليزى المنشأ بس بصراحة لم أسأل عن السعر
وأنواع تانية كومهو وجى تى ......
وطبعا المقاس بعد التعريض المسموح به

المهم سألته بخبرتك ترشحلى ايه قالى بالترتيب خد الكونتينينتال او البيريلى او المشيلان أستغربت لما جاب الميشلان فى الأخر فقلتله ليه الميشلان فى الترتيب التالت قالى عشان دى مش سرعات أخرها 180 كم سرعة قلتله هو أحنا مش داخلين سبق يعنى قالى الموضوع مش كده الكاوتش السرعات أفضل من حيث الخواص والخامة وكده .

وعرفت انه موزع معتمد كونتينينتال من اليافطة وشهادة متعلقة داخل مكتبة وأنا قاعد معاه بصراحة الفردة الكونتينينتال شكلها تحفة The ContiPremium.......TM 2 ودى للسيارات متوسطة الحجم ذى عربيتنا وطلعلى الميشلان تحفة برضة لكن مش ذى الكونتيننتال والبيريلى مش عارف لم أتقبلها رغما انه شكرلى فيها جدا

أهم نقطه فى الموضوع بعد الأستقرار على النوع وهو الكونتيننتال كان هتأخد يا بشمهندس الماكسس على كام ؟؟؟؟؟؟؟؟؟

قالى أشوفه الأول وأقولك قلتله انا الكاوتش ماشى بيه 400 كم أول عن أخر يعنى جديد لانج فى ايه قالى أشوفه وأقولك المهم بعد المعاينة قاللى أخده على 900 جنيه من الأخر عشان هو جديد فعلا بس فى فرده قدام منحوله شويه وعلى فكره انا هبيعه مستعمل نضيف مش جديد قلتله أزاى بصيت عليها لم أتفكت لقيتها فعلا مختلفه عن التلاته التانيين مش عارف بصراحة

طيب يا بشمهندس الأسعار نظامها ايه وفين الواجب بتعنا أمال جيران أزاى وكده يعنى قالى هحسبلك الكونتيننتال على 550 جنيه شامل الترصيص والنيتروجين والتركيب طبعا وده من الأخر ليك أنت قولتلة توكل على الله

تم التركيب ودفعت 1300 جنية الفرق 2200-900 الجديد وسعر الماكسيس وأيضا دفعت أكراميات للعمال غسلوا الكاوتش والطاسات حاجة بسيطه كده

المفاجئه المدويه بعد مركبت العربية ومشيت حسيت أنى كنت ماشى حافى وبعدين لبسونى جزمة نايكى موديل 2013 العربية يا جماعة مش هى انا ركبت 523i وماشى فى دبى

وأخيرا يا جماعة دى تجربتى مع النهاية الأخيرة للكاوتش الماكسس وليذهب إلى مقبرة التاريخ

**the_air_devil** · 27-09-2012 02:12 PM

ألف مبروك على الكوتشي الجديد .... وربنا يرزقك خيره ويكفيك شره وشر الحرامية .... بس انا للأسف مشواري طويل وعملت حوالي 7 تلاف كيلو بالعربية , وكدة كدة كمان شهور بسيطة واغير كاوتش أصلاً :) فعلاً حاسس انه سيئ جداً بس ميزته الوحيدة انه مش بيغرز في الرمل :) ... بس تنصحني اغيره بعد 45 ألف زي باقي الكاوتش الطبيعي ولا قبلها بفترة؟ لأني لاحظت ان حضرتك بتقول ماكملتش حتى ألف كيلو وفيه فردة منحولة !!!!!!!

**saint2011** · 27-09-2012 02:22 PM

المشاركة الأصلية كتبت بواسطة the_air_devil

ألف مبروك على الكوتشي الجديد .... وربنا يرزقك خيره ويكفيك شره وشر الحرامية .... بس انا للأسف مشواري طويل وعملت حوالي 7 تلاف كيلو بالعربية , وكدة كدة كمان شهور بسيطة واغير كاوتش أصلاً :) فعلاً حاسس انه سيئ جداً بس ميزته الوحيدة انه مش بيغرز في الرمل :) ... بس تنصحني اغيره بعد 45 ألف زي باقي الكاوتش الطبيعي ولا قبلها بفترة؟ لأني لاحظت ان حضرتك بتقول ماكملتش حتى ألف كيلو وفيه فردة منحولة !!!!!!!

الله يبارك فيك شوف حضرتك انا كل مشاويرى وسط المدينة يعنى فى طرق كويسة لكن الكاوتش الماكسس عملى تربنه فى دماغى بيحسسك بكل زلطة فى الشارع وده فى الطرق النظيفه فما بالك بالطرق المكسرة ده غير انه بيأثر على العفشة وعلى أداء العربية كلة فنصحتى لحضرتك لو فى مقدرة ماليه غيرة بسرعة وفى نفس الوقت سعر الماكسس هيتقدر على حالته وتقبل تحياتى :b4_095:

**JOKER_KLEN** · 27-09-2012 02:24 PM

الف مبروك على النايك الجديد

**saint2011** · 27-09-2012 02:44 PM

المشاركة الأصلية كتبت بواسطة dodyam

معنى كلام حضرتك ان ممكن السعر الـ 900 لبيع الماكسس يزيد لان كان فى فردة منحولة عندك
وهل ينفع تكلمه لو يعملنا عرض كويس للأعضاء بحيث ناخد سعر أحسن

أ/ عادل هى مش منحوله بمعنى منحوله لكن مختلفة عن باقى الكاوتش انا كل أللى مشيت به 400 كم وده مش كيلو متر لكاوتش يعنى لكن على أحسن تقدير لو حضرتك طالع بالعربية من المعرض عليه وغيرت الكاوتش مش هيدفع أكتر من 1000 جنيه على أحسن تقدير لأن أللى عرفته منه أن الكاوتش ده مالوش أسم او سمعه فى سوق الكاوتش ومتنساش انه هيبيعه مستعمل ولازم يكسب طبعا فلو عند حضرتك حد يأخد الكاوتش الماكسس بسعر أفضل توكل على الله وتقبل تحياتى

**akmm** · 27-09-2012 03:01 PM

الف مبروك الكاوتش الجديد .

**dodyam** · 27-09-2012 03:11 PM

المشاركة الأصلية كتبت بواسطة saint2011

أ/ عادل هى مش منحوله بمعنى منحوله لكن مختلفة عن باقى الكاوتش انا كل أللى مشيت به 400 كم وده مش كيلو متر لكاوتش يعنى لكن على أحسن تقدير لو حضرتك طالع بالعربية من المعرض عليه وغيرت الكاوتش مش هيدفع أكتر من 1000 جنيه على أحسن تقدير لأن أللى عرفته منه أن الكاوتش ده مالوش أسم او سمعه فى سوق الكاوتش ومتنساش انه هيبيعه مستعمل ولازم يكسب طبعا فلو عند حضرتك حد يأخد الكاوتش الماكسس بسعر أفضل توكل على الله وتقبل تحياتى

شكرا يا باشا
انت كده جبت من الآخر لانى كنت بأظبط مع واحد صاحبى معاه الصنى 2008 فمش عاوز أظلمه و لا يظلمنى

**Ahmed.TV** · 27-09-2012 03:24 PM

اولا الف مبروك يا حاتم باشا .. وياريت تشوفلنا الراجل ده ممكن يعمل معانا عرض ونروح له
لان انا فكرت انى اعمل موضوع واتناقش فيه معاكم للناس اللى حابة تغير الكاوتش
فمثلا لو الواحد دور وجبلكم حد بياخد المستعمل وجبنا عرض وخصم على الجديد .. بس كل ده لعدد كبير .. ايه راى الاعضاء موافقين ولالا .. عشان الواحد ميروحش ويلف على الناس ويكلم حد .. وفى الاخر محدش يعمل حاجة

وبعدين كمان خالى بالكم .. كل كاوتش وحسب حالته عشان تكونوا عارفين .. يعنى بيع المستعمل صعب فيه تثبيت سعر

وبالفعل انا كلمت ناس من يومين والله وبدعبس .. بس خايف ادعبس ويطلع تعبى على الفاضى
لان ياما اتفقت واتحركت فى موضوعات كتير .. ومحدش اتحمس فى الاخر
فا شوفوا ايه النظام وانا معاكم

والف مليون مبروك يا حاتم باشا .. وياريت تقولنا اخبار الثبات والبنزين وهل فى تاثير الاحساس بالعفشة بقت انشف والباور وكل ملحوظاتك عشان تهمنا جدااااااااااااااا