الموضوع: طلع عليا بلطجيا ضربو عليا نار والعربية ادمرت لا حول ولا قوة الا بالله

أعتقد المنطقه كده تبع قسم الدقى

إطلع على مأمور القسم / زكريا حجازى

ده لو مكانش إتغير

بس روحله بالليل بعد الساعه 8

أو رئيس المباحث محمد فوزى

أول حاجة ياباشا: ألف حمد لله على سلامتكم وفداك أي حاجة المهم انك طلعت سلييييييم من موقف زي ده مش مشكلة العربية..الله أعلم لو مكنتوش هربتو كان حصل ايه ساعتها..وعلى فكرة انت اتصرفت صح.

تاني حاجة: اللي حصل دا ميتسكتش عليه أبدا المفروض تروح تعمل بلاغ في قسم الشرطة فورا وتثبت كل حاجة.

تالت حاجة: هو صاحبك اللي كان واقف برا دا ركب معاكو ولا سيبتوه ومشيتو؟

المشاركة الأصلية كتبت بواسطة ahmod

السلام عليكم ورحمة الله وبركاته

مش عارف اكتب ايه او اقول ايه لاني لحد دلوقتي مش قادر اتلم على اعصابي

حاسس اني كنت في فيلم رعب وربنا نجاني

كنت في شارع جامعة الدول العربية معايا 4 زمايلي

عدينا على my queen جبنا اكل وعشان كان لازم ارجع بدري شوية لان ورايا شوية شغل

قلنا نجيب الاكل take away وناكل في اي حتة

وقفنا في محي الدين ابو العز في بدايته من نحية جامعة الدول الساعة كانت 1 بليل تقريبا

واحد زميلي طلع واقف برة العربية وواحد جمبي واتنين ورا

مرة واحدة الاقي واحد من زمايلي باعلى صوتو حرامية حرامية

ببص قدامي لقيت موتوسكل وقف قدامي مباشرة ونازل منه اتنين ضخمين

ماحستش بنفسي غير اني بدور العربية وجبت الفتيس على ال r ودايس بنزين بكل قوة

من هول الموقف مش باصص لا في مرايا ولا اي حاجة لقيت نفسي اتخبطت خبطة جامدة في حاجة من ورا

بدون تفكير لقيت نفسي جايب الفتيس على ال d ودايس بنزين وعلى اتم الاستعداد اني ادوس اي حاجة قدامي

الراجل اللى نازل من الموتوسيكل لقيته عمال يقولي ماتخفش متخفش احنا مباحث اقف

طبعا انا مش سامع اساسا هو بيقول ايه كل اللى بفكر فيه ازاي اهرب

كان فيه عربية لانسر بومة جاية من ورا من الشمال ولقيته تقريبا لما سمع صوت الخبطة اللى انا اتخبطتها فرمل جامد وانا مش عارف هو وقف ليه في موقف زي ده

وانا بعدي من جمب الموتوسيكل وبفاديه الراجل كان بينه وبيني تقريبا خطوة قام مطلع مسدس

زمايلي كلهم نازلو دماغهم تحت بس انا فضلت مركز مع الطريق عشان عايز اهرب باي طريقة

تفاديت الموتوسكيل وعديت مابينه ومابين الانسر

بمجرد عديته قام ضارب نار على العجل

العجلة اللى ورا نامت بس انا فضلت دايس بنزين لحد مابعدت عنهم تماما

مافكرتش اقف ولا ابص على العجلة ولا العربية الا لما اتاكدت اني اختفيت منهم

واحد زميلي قالي لازم تطلع تعمل محضر عشان دول لو فعلا مباحث هنترمي في السجن

انا كل اللى كنت بفكر فيه اني اروح البيت سليم لاني ماكنتش قادر اتلم على اعصابي ورفضت فكرة اني اقف في اي مكان مهما كان تحسبا لان لو كانو قاطرينا ولا حاجة

زميلي التاني ظابط بحرية اتصل بظابط في قسم الدقي قاله على اوصاف الشخصين دول وعرف منه انهم مسجلين خطر وعليهم احكام

وصلنا ميدان الجيزة قلت اقف اشوف العربية

للاسف العربية من ورا تقريبا ادمرت

اكصدام / فانوس / شنطة / الرفرف اتعجن الى غير العجل اللى اضرب عليه نار

الحمد لله على كل شئ ودي اقل بكتير اوي من لو كنا وقفنا واتسرق مننا كل حاجة

الحمد لله ان ربنا طلعنا منها

على قد مانا حزين على العربية والله واعلم ان كانت الخبطة سمعت في فردة شاسيه او العربية هترجع زي الاول ولا لاء

بس بقول الحمد لله لاني مش متخيل انا لو وقفت كان ممكن ايه اللى يحصل

انا لحد دلوقتي اعصابي سايبة ومش متخيل اللى حصل

الله واعلم ايه اللى حصل مع باقي العربيات اللى كانت ورا ووقفت

وربنا يعوض على صاحب العربية اللى انا خبطها انا مش عارف هي عربية ولا موتوسكيل ولا ايه بالظبط

مش عارف لو قدم بلاغ ونمر عربيتي اتسجلت لان كان فيه سكيورتي واقف

مش عارف هتحاسب وهدخل في مسالة قانونية ولا لاء ؟

الواحد مش عارف ايه اللى ممكن يحصل تاني

حسبي الله ونعم الوكيل

حسبي الله ونعم الوكيل

الحمد لله انك بخير
انت ما غلطش
اى تردد منك كان ممكن يضيعكم
مش مهم انك كسرت العربية
لو كنت اتاخرت شوية كان يا عالم ايه اللى حصل
الواد كان مسلح
و الغريب انه اصر انه يوقفكم برغم انك كنت خلاص هربت لدرجة انه ضرب نار على الكاوتش
اقعد يومين تلاته فى البيت ما تنزلش
مش عشان حاجه عشان الموقف كان جامد اوى عليك و تكون عرفت تتلم على اعصابك
و الاحسن تبيع العربية لو تقدر بردك مش لعيب فيها لكن انت هتفتكر الموقف ده كل ما تركبها و انا مش عايز ده يربكك

الحمدلله إنها جت على قد كدة
الناس دي اتهبلت ولا إيه؟؟؟ تقاطع محيي الدين مع الدول بقى كدة خلاص؟
بس بعيدا عن هول الموقف انت اتصرفت بشكل ممتاز
وربنا يعوض عليك وفداك فلوس الدنيا

حمدلله على السلامه والحمدلله انها جت عل اد كده
بس مش عارف حاسس ان في حاجه مش مظبوطه ... مش ممكن بلطجي واحد ينزل يثبت عربيه فيها اربعه وفي مكان زي ده
انت محتاج مش ققل من يوميين لحد ما اعصابك تهدى وتركيزك يرجعلك تاني انت واصحابك وهتفتكر تفاصيل اللي حصل

الحمد لله إنك وأصحابك بخير.... وبالمناسبة دى انا عايز اقول للسادة اللي بيدافعوا عن عدم حمل السلاح... ياتري كان هيبقة ايه موقفك لو انتا في نفس الموقف دا... وايه رد فعلك لو معاك سلاح.. سواء كان مرخص او غير مرخص

ربنا يسترها علينا

Sent from my iPhone