الموضوع: أول حادثة في حياتك ومش قادر تنساها

أولا شكرا لصاحب الموضوع على الفكرة الجميلة دي اللي بتقرب بين أعضاء المنتدى

بالنسبة لي أفتكر أول حادثة عملتها كانت بعربية الحاج ال504 في الساحل الشمالي ...

كنت لسه بقى بأتعلم السواقة وكده وكان بيخليني أنزل ألف بالعربية عشان أتمكن من السواقة أكتر خاصة إن القرية كانت شوارعها نضيفة وفاضية ...

المهم أنا كنت ما أعرفش أركز في السواقة لو الكاسيت عالي وكانت أختي راكبة معايا وأنا مشغل الكاسيت على صوت مناسب ليا ما يشتتش انتباهي وهوبا ألاقي أختي راحت معلية الكاسيت فجأة آل عشان تسمع كويس وتستمتع بالاغنية ههههه ...

أخوكم بقى من الخضة واللخمة رحت بسرعة سايب الدريكسيون عشان اوطي الكاسيت فالعربية راحت حادفة مني شمال ولبست في عربية مرسيدس عيون كانت زيرو بشوكها أيامها سنة "2000" ورحت مكمل ومطيرله المراية اليمين كمان ...

وطبعا أنا كنت صغير في السن ساعتها ما عرفتش أعمل إيه رحت حاطط ديلي في سناني ويا فكيك على الشاليه ركنت العربية وطلعت بقى وشي جايب 100 لون ومش عارف الحاج هيعمل فيا ايه خاصة انه كان شديد علينا أصلا ...

المهم لما جه وعرف الموضوع خاصمني طبعا وبعدين نزل معايا عشان نشوف مكان العربية دي ما لقيهناش ومعرفناش صاحبها لحد ما أخويا تاني يوم كان طالع من القرية يشتري سمك وبتاع فالأمن على البوابة وقفوه لما شافوا الخبطة في وش العربية أتاري صاحب العربية كان بلغهم ووالدي اتصل بيه وحلوا الموضوع بشكل ودي وطلع في الآخر بينهم ناس معارف كتير وأصحاب :)

تاني حادثة بقى كانت على الزراعي بنت عرباوية 12 سنة عدت قدامي فجأة وخبطتها والعربية اتقلبت بيا 10 مرات واتدمرت والبنت الله يرحمها ماتت من الخبطة .... وقعدت بسبب الحادثة دي 4 سنين في بيتنا مقاطع الحياة بالكامل وجالي اكتئاب وحاجات كتير ..... ياااااااااااااه كانت أصعب أيام عليا في حياتي ... الحمد لله

المشاركة الأصلية كتبت بواسطة yasserelsayad

ياااا انا اول حادثة ليا تقريبا شبه بتعتك بالظبط

كنت راجل باردوا من المدرسة بعد اخر امتحان فى 2 ثانوى
وباص المدرسة نزلنى قدام البيت انا و2 من اصحابى عشان نقضى اليوم مع بعض
والدى ساعتها كان مسافر برا مصر والعربيات بقى مركونة قدام البيت ملهمش صاحب

طلعت البيت والحاجة حتطلنا الغداء وتمام وقلنا ننزل نخرج بقى انا وصحابى
انا ساعتها كنت بسوق وهما عرفين ومكنتش بقى بسرق العربية خلاص :)

وقولت للحاجة متجيبى مفتاح المرسيدس (كانت لسه بشوكها) والحمد لله انها مرديتش
والا كان زمان مفيش ياسر دلوقتى

نزلت ساعتها واخدت دايو ليجانزا واقعدنا نلف انا والعيال وتمام وروحنا شربنا عصير وزى الفل
واحنا مروحين بقى وفى شارع البيت وكنت ماشى 80 مثلا وهوب عربية وقفت عايز يعمل u turn
روحت دايس فرامل على الاخر .. مفيش فرامل (كان السيرفو فيه حاجة .. حبكت يعنى دلوقتى)
شاديت الهاند مفيش هاند
جيت افادى العربية من اليمين لقين ناس روحت اتكلت على الله ودخلت فى الشنطة بتاعته طيرته بتاع 10 متر كدا ولا حاجة ومكناش طبعا ربطين حزام ولا حاجة (بس بصراحة العربية تمام انا تقريا متحركتش من على الكرسى)
طبعا الناس اتلمت وصاحبى اللى كان قاعد ورا جاله تقريبا حالة من الرعب لدرجة ان هو منزلش معانا وفضل قاعد جوا العربية وانا نزلت اتخانق مع الراجل والحمد لله الناس هناك كلها عرفنى وشافه اللى حصل فا انا خلعت من موضوع انى اصلح العربية للراجل
المهم ابص على العربية عندى الاقى الفانوس الشمال مكسور والاكصدام بالفوج والكبوت مطبق هو والرفرف
ادخل العربية تمام لسه دايره والتكييف شغال مفيش حاجة
روحت رايح على البيت راكن العربية ومغطيها تمام ومتكلمتش فى الموضوع دا غير لما اكتشفوا المصيبة بعديها بيومين مثلا
والحاج جيه من السفر وحكتله اللى حصل والحمد لله معملش حاجة غير انى اتهزقت منه شوية عشان لما قلته العربية ملقتش فيها فرامل طلع جربها لقى الفرامل تمام مفيهاش حاجة (السيرفو ابن الجزمة :i_angr1[1]:) وموضوع الفرامل اللى راحت دا محصلش تانى غير بعدها بسنتين ولا حاجة معاه وكان هيدخل فى واحد باردوا بس هو ساعتها جيه قالى وعمل العربية

بس كدا الحمد لله

تشابه حوادث أصل الظاهر ده كان منهج الشيطان ساعتها الحمد لله انك بخير

المشاركة الأصلية كتبت بواسطة mohab.nabil

اه و الله الحمد لله

الف شكر يا باشا

و ربنا يرحم والدك و يغفر له ان شاء الله و لجميع موتى المسلمين

على إيه متقولش كده
وشكراً ليك لا أراك الله مكروه في عزيز يارب

المشاركة الأصلية كتبت بواسطة eldell

اول حادثه ليا كنت انا وصحابى وشاارب شويه وماشيين قاعدين بنخمس وناخد فى دريفتات انا وواحد صاحبى جيت عند بنزينه موبيل التجمع الخامس ومش عارف ايه الى حصل حطيت بنزين وطالع واخد من جنب الترنبه درفتايه وكملتها لحد منزل البنزينه وبعدها روحت شادد الهند عكس وكابس برضه روحت مخمس بعدها تقريبا دخت بدل ماادوس فرامل روحت مديها بنزين ههههههههههههههههههههههههه ه روحت راكب رصيف محترم جداااااااااااا وساعتها الكبوت اتنى سنه والحديده الى تحت الاكصدام اتخفست لجوه بس الحمد لله ديه اول حادثه بعدها حوادث بقى ماشاء الله كتييييييييييييير بس مفيش والا واحده الحمد لله على سرعه وده من حب ربنا للواحد

الحمد لله انك بخير
برجاء كتابة إسم المشروب وسنة الصنع لتعم الفائدة
بهذر طبعا ربنا يصلح حالنا وحالك والحمد لله انك بخير

المشاركة الأصلية كتبت بواسطة maheralsisi

بسم الله ما شاء الله ايه الجمال ده ده المنتدى بعد كده يبقي اسمه نايل اكسيدنت
والله انا هم حادثتين في حياتي ( ده طبعا ما بنتكلمش في الحاجات البسيطة فانوس و شنطة و باب و الكلام العبيط ده
الأولى باللادا في ميدان التحرير قبل الثورة بكتيرررر تقريبا اواخر 2009الساعة 2 الظهر
جاي من عند المتحف رايح وسط البلد و الجو رايق و هادي الاشارة قفلت هديت ووقفت بالراحة جدا و مورت و رفعت رجلي مستني الاشارة تفتح و طراااااخ لقيت نفسي معدي الاشارة و الصينية و في نص التقاطع الثاني اللي الناحية التانية ركنت و نزلت اشوف اللي حصل لقيت تاكسي فرنا ماعرفش كان بيعمل ايه مع المزة اللي جانبه بعد ما خبطني الحمد لله اني كنت ممور انا عديت و هو وش العربية عنده راح ووقف في نص الشارع فلبست فيه من الجنب عربية 4*4 جابتله الجنب و البابين عنده كاملين غير وش العربية عنده و طبعا كام خبطة من كام عربية ورا بعض ( ده الميدان الساعة 2 قبل الثورة يا جدعان ) بصيت عندي لقيت الفبرة بتاعة الاكصدام وقعت و الاكصدام متني صعب عليا الراجل سبته و مشيت ( بس اكيد بتاع ال4*4 ماسابوش و لا بقية العربيات )
التانية من 20 يوم بالضبط و لحد دلوقتي مش عارف ايه اللي حصل في مطلع كوبري و طالع يادوب 60 بالعافية و العربية عطلانة اساسا و اخر حاجة فاكرها اني كنت في نص المطلع و لقيت حد بيفتح الباب ينزلني من العربية و لقيت نفسي في نص النزلة ؟؟؟؟؟؟
و ستر ربنا هو اللي خلي العربية ما تطيرش من فوق الكوبري
و مش فاكر اي حاجة خاااالص و لا كنت باجري و لا فيه زحمة و لا اي شئ و برضه الساعة كانت واحدة و نص الضهر. و السمكري مصمم اني عملت الحادثة مش اقل من سرعة 120؟؟؟؟ قالولي يمكن اغمي عليك ضغط او سكر
و رحت كشفت ضغط وسكر و الحمد لله عادي مافيش حاجة
هاقول ايه النصيب
بس نفسي افهم 120 ازاااااااي ؟

معلش ده بقه القدر اللي مفهوش سواق شاطر ولا على قد حاله
إحنا ناخد بالأسباب وربك هو الستار
وألف الحمد لله على سلامتك

المشاركة الأصلية كتبت بواسطة ibn_seena

اول حادثه حصلت من اربع سنين
كنا ايامها شاريين التيوتا كورولا كامله ولسه زيرووووووو. ..
المهم.
الحج ما كنش بيخلي حد يحط رجله فيها نهائي. يعني ساعات كنا بننزل منها عند المطبات العاليه علشان ما تحكش. ........
ويوم طلعنا نزور عمي. سبتهم وطلعت اتفرج عالعربيه وبيني وبين نفسي عمال اقول بكرة اجري بيكي واجيب اخرك. ....
المهم لقيت ابن عمي طالع بمفتاحها. ما سدقتش. هات يا عم المفتاح. لا انا الاول.
المهم ركبت الاكسنت بتاعته وهو طلع قدامي. ماشيين في امان الله وداخلين عادي علي مطب واذ فجاة الباشا كبس الفرامل وهو واخد عالاكسنت. طبعا يا باشا. التويوتا كلبشت مكانها. وانا وقفت على فرامل الاكسنت وهي ولا هنا. العربيه كانت بتتحداني. وتقترب. وتقترب وهوووووووب. ظلاااااااام
البس يا باشا. نزلت ما بصيتش عالاكسنت اساسا. لقيت اكصدام التيوتا من ورا متفرتك. ... ونزلت شتايم فيه يا غشيم. انت فاكرها كوري. .... دي فراملها قوية جدا



. وطبعا عم الحج خاصمني وش. ...

أهم حاجة أهالينا كانوا بيخافوا علي العربيات جدا ونيجي في ثانية نضيع الخوف ده نهائي بعد ما بنعيب العربيات
الله يعينهم

المشاركة الأصلية كتبت بواسطة mollaelolla

الله يرحمهم جميعا
يااااه فكرتنى بالذى مضى
كنت بالعربية ال504 و معدى من تحت الكوبرى فى غمرة ( جيت من رمسيس و متجه الى العباسية )
فى بعد كده كوبرى بتطلعه و اما تنزل بتبقى جنب الكاتدرائية ( على شملك ) و تبقى شايف مسجد النور على مدد البصر

المهم قبل الكوبرى ده ب شوية فى شارع جانبى شمال
المهم انا معدى و جبت الرابع ( سرعتى كانت بتاع 70) و بصيت شمالى لا حد يطلع من الشارع ده فجأة مندفع ولا حاجة ما هو البها(تييييييت) كتير بس ماكانش فى حد
ماشى انا فى نص الشارع
و خلاص معدى امام الشارع اياه و تمام و افجأ بسيارة لادا بتاعة شرطة تقريبا اللى سايق عسكرى و جنبه واحد زيه
الاستاذ اكتشف ان هوا كان عايز يدخل الدخلة دى و هيا كده فاتته
كان هوا امامى بكام متر و فى الحارة اليمين جنب الرصيف
و انا فى الحارة اللى فى المنتصف وراه
يعمل ايه صاحبنا بعد ما الدخلة فاتته
راح لافف زاوية تسعين درجة شمال و راجع لها
ولك ان تتخيل

واله حرام يحطوا رجليهم على عربيات العساكر دول
الله يصبرنا ويرحمنا من أخطاء الغير

المشاركة الأصلية كتبت بواسطة semi

الناس اللي داخله بتقول بلاوي والغريبة انها كلها تضحك سبحان الله
عن نفسي اول حادثة برضه في حياتي كوميدية
كان والدي قاعد جنبي في العربية متفهمش ليه دايما يبقوا متورطين معانا :)
المهم عمال يأكل في لب سوبر ومستمتع جدا وكله ثقة اني بقيت خلاص استاذ سواقة
المهم قربنا من ملف يو ترن وداخل بقلب جامد شوية وسريع وادوس على الفرامل
ان العربية تفرمل كأنها فرامل بسكلته بالظبط والعربية عمالة تبطأ تبطأ تبطأ وتقرب من عربية جديدة
واحدة واحدة لحد ما تكككككك لبسنا فيها لبسة زي العسل
ومن سخرية القدر ان العربية كانت لسه جديدة وكان فيها اللمعة اياها بتاعة الفبريكا
والراجل نزل كان هيتشل ادامنا لكن الموضوع خلص على خير وروحنا وفضلت فترة بسيطة متعقد من السواقة
ووالدي بطل يأكل لب لما يقعد جنبي وانا بسوق


هههههههههه طب اللب ذنبه ايه

المشاركة الأصلية كتبت بواسطة ahmed a.maksoud

هههههه موضوع ظريف جداً

أنا أول حادثة و الحمد لله كانت بعربيتي الشخصية مش عربية حد تاني

العربية كانت بى أم e30 و لسه شاريها من أقل من شهر..........و قبلها بكام يوم كنت بتكلم مع الحاج ربنا يديله الصحة علشان عاوز أرش العربية و هو يقولي مش دلوقتي........كان قلبه حاسس ههههههه.

كنت ماشي عند النادي الأهلى فى مدينة نصر وواخد شمال الشارع و ماشي على 90 أو 100.........قدام شوية فيه يو ترن و فيه واحد بهوندا سفيك هاتش باك موديل اوئل التمانينات ماشي فى الشمال برضه و مش مدى إشارة أو أى حاجة تدل على أنه هيلف...........البيه كان مركب أكصدام حديد.............حديد حديد من اللى بيبقى معمول عمولة مش تهريج.

المهم هو فجأة و أنا وراه بحوالى عشرين أو 30 متر قرر أنه يلف..........وراح مهدى جامد......رزعت فرامل و كان على حظي الحلو فيه رمل على الأرض......العربية فى أخر 3 أو 4 متر بعد ما كانت قربت تقف زحفت بسبب الرمل و طاااااااااااااااااخ.

نزلت ببص عندى بقيت كبوت و رفرف و فانوس و أكصدام.......ببص على الهوندا...........ولا الهوا............الأكصدام متحركش من مكانه :)

طبعاً بتاع الهوندا بص على عربيتي و ركب عربيته و مشي.

رجعت البيت قولت للحاج طبعاً أفتكر أنى خبطتها علشان أرشها عافية هههههههههههههههه.

الحمد لله انك بخير
بس بجد هو
ده الحل حد يشوفلنا الاكصدام الحديد ده بيتعمل فين الواحد يشيل الفبر في البيت ويركب دول
بجد انا بعتبره اقتراح لو ورشة نايل موتورز تاخد بيه وتعملنا الاكصدمات الحديد
وساعتها مش محتاجين ستيكر للمنتدي اللي إكصدامه حديد يبقا تبعنا و متنسوناش في نسبة من المبيعات

المشاركة الأصلية كتبت بواسطة dr.mostafa anwar

أولا شكرا لصاحب الموضوع على الفكرة الجميلة دي اللي بتقرب بين أعضاء المنتدى

بالنسبة لي أفتكر أول حادثة عملتها كانت بعربية الحاج ال504 في الساحل الشمالي ...

كنت لسه بقى بأتعلم السواقة وكده وكان بيخليني أنزل ألف بالعربية عشان أتمكن من السواقة أكتر خاصة إن القرية كانت شوارعها نضيفة وفاضية ...

المهم أنا كنت ما أعرفش أركز في السواقة لو الكاسيت عالي وكانت أختي راكبة معايا وأنا مشغل الكاسيت على صوت مناسب ليا ما يشتتش انتباهي وهوبا ألاقي أختي راحت معلية الكاسيت فجأة آل عشان تسمع كويس وتستمتع بالاغنية ههههه ...

أخوكم بقى من الخضة واللخمة رحت بسرعة سايب الدريكسيون عشان اوطي الكاسيت فالعربية راحت حادفة مني شمال ولبست في عربية مرسيدس عيون كانت زيرو بشوكها أيامها سنة "2000" ورحت مكمل ومطيرله المراية اليمين كمان ...

وطبعا أنا كنت صغير في السن ساعتها ما عرفتش أعمل إيه رحت حاطط ديلي في سناني ويا فكيك على الشاليه ركنت العربية وطلعت بقى وشي جايب 100 لون ومش عارف الحاج هيعمل فيا ايه خاصة انه كان شديد علينا أصلا ...

المهم لما جه وعرف الموضوع خاصمني طبعا وبعدين نزل معايا عشان نشوف مكان العربية دي ما لقيهناش ومعرفناش صاحبها لحد ما أخويا تاني يوم كان طالع من القرية يشتري سمك وبتاع فالأمن على البوابة وقفوه لما شافوا الخبطة في وش العربية أتاري صاحب العربية كان بلغهم ووالدي اتصل بيه وحلوا الموضوع بشكل ودي وطلع في الآخر بينهم ناس معارف كتير وأصحاب :)

تاني حادثة بقى كانت على الزراعي بنت عرباوية 12 سنة عدت قدامي فجأة وخبطتها والعربية اتقلبت بيا 10 مرات واتدمرت والبنت الله يرحمها ماتت من الخبطة .... وقعدت بسبب الحادثة دي 4 سنين في بيتنا مقاطع الحياة بالكامل وجالي اكتئاب وحاجات كتير ..... ياااااااااااااه كانت أصعب أيام عليا في حياتي ... الحمد لله

أولا انا اللي بحييك على ذوقك يا د.مصطفي
انا مش عارف أقول ايه
حادثة البنت منعتني عن الكلام الله يرحمها ويكون في عونك وعون أهلها

مممممممم انا الحمدلله لسا مجاش نصيبي يعني اخري حكه بسيطه في الاكصدام او ترييحه علي اكصدام عربيه كده يعني لكن مره كنت راكب مع واحد صاحبي وعملنا حادثه خفيفه كده :)
صحبي كان لسا شاري العربيه جديد ومش اوي ف السواقه وكنا رايحين صيانة ال 10 الاف وفي اوتو موتورز
كنا ماشيين في الاوتوستراد ورايحين المعادي وفي حوالي 2 كوبري فبل متوصل للدائري بتاع المعادي
اخر كوبري -- اللي هوا ال 2 -- وخلاص داخلين ع المعادي عملوا حاجة رخمه اوي من فتره -- في مطب في اخر الكوبري مش عارف ازاي مطب في كوبري -- المهم صحبي نازل بسرعه شويه -- الكوبري اخرو منزل كمان -- والعربيات كلها بتهدي علشان المطب والصني الوحش وفراملها المثيرة وفرامل فرامل فرامل هووووووووووب
لبسنا في ضهر عربيه ربع نقل بس الحمد لله اكصدام بس في العربيه الربع النقل والصني كبوت وشكبة وشوية سمكرة :)
بس انا شفت حوادث بعيني ربنا يبعد عنا شرها

احسن حاجه ان اكتر الناس كان بعربيات اهلها وكلها تقريبا 504 انا اول مره كنت في الثانوي بعربيه والدي 504 وكان جايبها زيرو وكانت اغلي مني تقريباهههههههههه كنت بجري 100 تقريبا والبيضه بتاعه المقص سابت وعينك ماتشوف الا النور من الحظ انها نزلت من حته رمل ووقفت الحادثه التانيه كانت باول عربيه بتاعتي كانت نيسان تيدا 2006 كنت ماشي 200 علي الصحراوي وواخد الشمال وفجاه عربيه نصف نقل في اقصي اليمين لقي الدوران راح قاطع الطريق حاولت افاديه اتقلبت 4 قلبات او 5 والحمد الله ربنا سترها بس تاني يوم علي طول ركبت عربيه ابويا عادي بقي الواحد قلبه جمد من الحوادث

اول حادثه ليا بس مكنتش انا الي سايق كان الحج كان في 2004 وكنت في 3-4 ابتدائي كانت بال504
المهم انه كانت مصر خسرانه من الجزائر في اليوم ده
فالحج سايق متعصب كنا رايحين القاهرة
قبل الماتش بقي بابا كان عند الميكانيكي قله في جلده مش عارف ايه كده في الفرامل لازم تغيرها والا هتموتك
ماشي هبقي اغيرها
المهم بقي طلعنا علي الطريق الساعه 12 بليل فولنا تمام تمام
ابويا كان من النوعيه الي مش بتربط حزام لقي لجنه مفاجئه في منطقه بردين ربطه ونسيه
مشينا بقي والحج سايق متعصب من الخسارة
يابابا هدي يا ابني انا ماشي براحه هدي حاضرر بابا انا مش مطمن اسكت
5دقائق ايييييييييييييييييييييييي ييييييييييييييييئ بم تش طخ
العربيه بتلف خبطنا في الخرسانه لزقت في الكرسي والسقف ووقعت اصلي بقي قاعد ورا الحج
بسم الله الذي لايضر مع اسمه شئ في الارض ولا في السماء وهوا السميع العليم
الدنيا ظلمه
الحياه سودا مش عارف اتحرك
ابص وريا
القي البربريز مايل مايل؟
وفي اصوات كتير من برة
لا اله الله -ان لله وان اليه راجعون- ياساتر يارب -يا حفيظ ودوشه كتير
واسمع تيش تيش وحجات بتقع علي خدي وشعري ووشي
وايد بتمد بتسحبني
واخرج
وافاجاء ان لعربيه مقلوبه
وواحده ست خدتني وعدت بيا الطريق وانا بدور علي اهلي ملقتهمش افتكرتهم ماتو
روحت راقع 1500 صوت وسايبها وعديت الطريق زي المجنون من غير ما شوف الطريقوانا بعدي
وكنت عايز اعرف الناس العدد الي في العربيه روحت راقع بالصوت بابا ماما هبه ربيع
ونزلت بركبي علي الارض لقيت ريحه ببص لقيت العربيه بتكب بنزين ينهار اسود كله بيشرب سجاير روحت راقع بالصوت وقولت ده بنزين 80 لقيت حوالين العربيه فضي تقريبا ورجعوا تاني
جم عايزين يطلعوا بابا قاموا كسروا البربريز الادماني وطلعوة قمت رايح عليه وواخده بالحضن ومش عارف كان ليه احساس غريب كده وعمال اعيط
جم طلعوا اخويا كان بيقعد علي رجل ماما وكان نايم فقال ايه مغطياه بالخمار فلما اتقلبنا ربيع كان تحط ماما وبابا كان واقع عليه بس الحزام نفع ربيع وبابا قدر يحرك نفسه لحد اما ربيع بعد براسه وكان لسه نايم برضه
جم علي ماما واختي معرفوش يطلعوهم لا من البربريز ولا من الشباك قاموا فتحوا الباب لاختي وطلعوها شيل
جم علي ماما بقي قاموا عدلو العربيه ونزلوها من بابها
الي يشوف العربيه يقول الي فيها ماتو ده ده حتي عمي لما جه بابا كان قله احنا عملنا حادثه في ميت ربيعه وقفل
كسر الاكرة بتاعه عربيته وجري علينا زي المجنون يطمن علينا
الطريف بقي
اخويا صحي بيعيط
بتعيط ليه اهدي احنا سلام مفناش حاجه
استغرب كده
قلهم الكوتشي
بعد الحادثه بقي بساعه
شاف العربيه بص لبابا كده وقاله هو احنا عملنا حادثه؟
انا سعتها ممسكتش نفسي من الضحك والعياطمع بعض
الحمد لله خرجنا سلام
بابا هو الي كان متعور شويه بس خدوش
انا برضه حبه خدوش
والباقي سليم
والحمد لله الذي حفظنا يومها
والسبب في ده كله
ان العجلتين الشمال هما الي فرملو واليمين لاء