الموضوع: أول حادثة في حياتك ومش قادر تنساها

المشاركة الأصلية كتبت بواسطة moh19227

مممممممم انا الحمدلله لسا مجاش نصيبي يعني اخري حكه بسيطه في الاكصدام او ترييحه علي اكصدام عربيه كده يعني لكن مره كنت راكب مع واحد صاحبي وعملنا حادثه خفيفه كده :)
صحبي كان لسا شاري العربيه جديد ومش اوي ف السواقه وكنا رايحين صيانة ال 10 الاف وفي اوتو موتورز
كنا ماشيين في الاوتوستراد ورايحين المعادي وفي حوالي 2 كوبري فبل متوصل للدائري بتاع المعادي
اخر كوبري -- اللي هوا ال 2 -- وخلاص داخلين ع المعادي عملوا حاجة رخمه اوي من فتره -- في مطب في اخر الكوبري مش عارف ازاي مطب في كوبري -- المهم صحبي نازل بسرعه شويه -- الكوبري اخرو منزل كمان -- والعربيات كلها بتهدي علشان المطب والصني الوحش وفراملها المثيرة وفرامل فرامل فرامل هووووووووووب
لبسنا في ضهر عربيه ربع نقل بس الحمد لله اكصدام بس في العربيه الربع النقل والصني كبوت وشكبة وشوية سمكرة :)
بس انا شفت حوادث بعيني ربنا يبعد عنا شرها

الحمد لله ربنا يسترها معاك ومتعملش اي حوادث

المشاركة الأصلية كتبت بواسطة rompo10

احسن حاجه ان اكتر الناس كان بعربيات اهلها وكلها تقريبا 504 انا اول مره كنت في الثانوي بعربيه والدي 504 وكان جايبها زيرو وكانت اغلي مني تقريباهههههههههه كنت بجري 100 تقريبا والبيضه بتاعه المقص سابت وعينك ماتشوف الا النور من الحظ انها نزلت من حته رمل ووقفت الحادثه التانيه كانت باول عربيه بتاعتي كانت نيسان تيدا 2006 كنت ماشي 200 علي الصحراوي وواخد الشمال وفجاه عربيه نصف نقل في اقصي اليمين لقي الدوران راح قاطع الطريق حاولت افاديه اتقلبت 4 قلبات او 5 والحمد الله ربنا سترها بس تاني يوم علي طول ركبت عربيه ابويا عادي بقي الواحد قلبه جمد من الحوادث

فعلا اهم حاجة ان الواحد ميتعقدش ربنا يسترها معاك ومعانا

المشاركة الأصلية كتبت بواسطة hpxp

اول حادثه ليا بس مكنتش انا الي سايق كان الحج كان في 2004 وكنت في 3-4 ابتدائي كانت بال504
المهم انه كانت مصر خسرانه من الجزائر في اليوم ده
فالحج سايق متعصب كنا رايحين القاهرة
قبل الماتش بقي بابا كان عند الميكانيكي قله في جلده مش عارف ايه كده في الفرامل لازم تغيرها والا هتموتك
ماشي هبقي اغيرها
المهم بقي طلعنا علي الطريق الساعه 12 بليل فولنا تمام تمام
ابويا كان من النوعيه الي مش بتربط حزام لقي لجنه مفاجئه في منطقه بردين ربطه ونسيه
مشينا بقي والحج سايق متعصب من الخسارة
يابابا هدي يا ابني انا ماشي براحه هدي حاضرر بابا انا مش مطمن اسكت
5دقائق ايييييييييييييييييييييييي ييييييييييييييييئ بم تش طخ
العربيه بتلف خبطنا في الخرسانه لزقت في الكرسي والسقف ووقعت اصلي بقي قاعد ورا الحج
بسم الله الذي لايضر مع اسمه شئ في الارض ولا في السماء وهوا السميع العليم
الدنيا ظلمه
الحياه سودا مش عارف اتحرك
ابص وريا
القي البربريز مايل مايل؟
وفي اصوات كتير من برة
لا اله الله -ان لله وان اليه راجعون- ياساتر يارب -يا حفيظ ودوشه كتير
واسمع تيش تيش وحجات بتقع علي خدي وشعري ووشي
وايد بتمد بتسحبني
واخرج
وافاجاء ان لعربيه مقلوبه
وواحده ست خدتني وعدت بيا الطريق وانا بدور علي اهلي ملقتهمش افتكرتهم ماتو
روحت راقع 1500 صوت وسايبها وعديت الطريق زي المجنون من غير ما شوف الطريقوانا بعدي
وكنت عايز اعرف الناس العدد الي في العربيه روحت راقع بالصوت بابا ماما هبه ربيع
ونزلت بركبي علي الارض لقيت ريحه ببص لقيت العربيه بتكب بنزين ينهار اسود كله بيشرب سجاير روحت راقع بالصوت وقولت ده بنزين 80 لقيت حوالين العربيه فضي تقريبا ورجعوا تاني
جم عايزين يطلعوا بابا قاموا كسروا البربريز الادماني وطلعوة قمت رايح عليه وواخده بالحضن ومش عارف كان ليه احساس غريب كده وعمال اعيط
جم طلعوا اخويا كان بيقعد علي رجل ماما وكان نايم فقال ايه مغطياه بالخمار فلما اتقلبنا ربيع كان تحط ماما وبابا كان واقع عليه بس الحزام نفع ربيع وبابا قدر يحرك نفسه لحد اما ربيع بعد براسه وكان لسه نايم برضه
جم علي ماما واختي معرفوش يطلعوهم لا من البربريز ولا من الشباك قاموا فتحوا الباب لاختي وطلعوها شيل
جم علي ماما بقي قاموا عدلو العربيه ونزلوها من بابها
الي يشوف العربيه يقول الي فيها ماتو ده ده حتي عمي لما جه بابا كان قله احنا عملنا حادثه في ميت ربيعه وقفل
كسر الاكرة بتاعه عربيته وجري علينا زي المجنون يطمن علينا
الطريف بقي
اخويا صحي بيعيط
بتعيط ليه اهدي احنا سلام مفناش حاجه
استغرب كده
قلهم الكوتشي
بعد الحادثه بقي بساعه
شاف العربيه بص لبابا كده وقاله هو احنا عملنا حادثه؟
انا سعتها ممسكتش نفسي من الضحك والعياطمع بعض
الحمد لله خرجنا سلام
بابا هو الي كان متعور شويه بس خدوش
انا برضه حبه خدوش
والباقي سليم
والحمد لله الذي حفظنا يومها
والسبب في ده كله
ان العجلتين الشمال هما الي فرملو واليمين لاء

الحمد لله انكوا بخير يارب تكونوا لقيتوا الكوتشي :))))))))))))))))))

المشاركة الأصلية كتبت بواسطة mohammad zico

مش عارف اوصفلك ان انا كنت هدخل الحمام من كتر الضحك ........ عمري في حياتي ما ضحكت بالشكل كده ...... و انت اسلوبك كوميدي جدا ....... و عيشتني في الموقف ..... و تقريبا كان هيحصلي نفس اللي حصلك ......... بس الحمد لله الموضوع عدى على خير ............

ده بس من روحك الحلوة

المشاركة الأصلية كتبت بواسطة mohammad zico

انا حصلتلي حادثة في صيف 1996 و عملت واحد كبيرة في ديسمبر 2005 ..
الأولى ...... كنت راجع مع اصدقائي بيعربية ريجاتا ...... و الجزء الكبير نزل عند نادي هليوبلس ... و انا كنت قاعد ورا اساسا مع اتنين تانيين ... المهم تلاتة نزلوا و انا طلعت و قعدت قدام جنب السواق ....... و احنا بقى في اشارة يوسف عباس اتجاة المؤدي لعباس العقاد ...... و فجأة .... عربية نص نقل طلعت فوف العربية ( الحمد لله ربنا ستر و العربية كانت مافيهاش بنزين اساسا و الراجل كان هيمون من عند كالتكس الي عند مترو النحاس ) .... المهم العربية نصها الوراني بقى بسيسة .... فطيرة من الكاوتش و الكنبة و الشنطة و جزء من السقف ....... الموضوع بقى قلب خناقة جامدة وروحنا قسم اول مدينة نصر و بعدها على المرور و ردينا تاني على القسم ....... و الراجل السواق قلقان جدا عليا لان انا كنت تعبان جدا ( عندي 9 سنين وفتها ) و مافيش موبايلات وقتها و حتى المرور و الفسم مافيهومش تليفونات ...... بس كانت علقة سحنة بجد

نيجي بقى لحادثة 2005 ...........
كنت نازل ب نصر 127 رايح اصلي الفجر في جامع الصديق اللي بمساكن الشيراتون ...... انا اساسا كنت نايم متأخر و المفروض اعدي على 4 اخدهم معايا الجامع ....... نزلت و انطلقت وانا ماشي باعربية حسيت ان سيرفو الفرامل مش شغال كويس زي ما كنت انا و اخويا مصلحينه ... و الكالرثة اساسا احنا عملنا شده كاملة للعربية في فبراير 2005 و كملناها في مايو بالكماليات و كانت طالعة عروسة ..... بس انا عنستها في ديسمبر ........ خارج من عباس و داخل طريق النصر قولت لنفسي الطريق فاضي افوق العربية شوية لفيت في الطريق النصر لفة حلوة كده ...... و بصراحة انا اتغابيت في السرعة و عديت ال90 ... و فجأة لقيت ميكروباص رحلات غبي علوز يفطر من اخر ساعة .... بيكسر كسرة بنت ستين كلب و انا سرعتي الكبيرة جيت بقى ادوس فرامل جامد شويه علشان اهدي لقيت الدواسة بتحضر الارض و مافيش اي حاجة خالص ..... فكرت بسرعة روحت كاسر يمين اعديه و لما جيت اعدل لقيت لاند كروزر موديل السنة في وشي و هوووووووووووووووووووووووو ووووووووووووووووبأااااااا ااااااااااااااااااا .................... روحت لابس لابسة .............. الحمد لله كنت لابس حزام الامان ....... العربية بقت 8 بدل من 127 ...... نزلت من العربية و انا دايخ و انا بقى كنت روحت متصل بأخوبا اللي كان عيد ميلاده نفس اليوم علشان يجي يتفاهم لان انا كنت في السلاسيه خالص مش عارف اتكلم لان كنت مبلم تبليمة في العربيتين ....... انا 127 راحت و اللاند كروزر وده اللي غايظني لحد دلوقتي ..... حلص انبعاج بسيط جنب الفانوس الشمال ........ و قال ايه الراجل عاوز 15000 علشان يصلحها ........... و روحنا الفسم الفجر و طبعا مافيش ولا ظابط .... قعادنا لغاية ما جيه الظابط لان العربية متأمن عليها ........ و بعد كده روحنا المرور و الموضوع خلص على كده ............. بس بقى خدت تزبيطة محترمة من اخويا و خالي ( والدي كان بقى الله يرحمه ) العربية لغاية دلوفتي بتعاني من اثار الحادثة ....... و المضحك انا ابن خالتي اللي قعد يتريق عليا بعده ب 3 سنين عمل حادثة و ب 127 برضه و بقت 8 بس هو خرج بأصابات هو و زميله ........ و الصدفة انه يخبط برضه في جيب و مايحصلهاش حاجة بس هي بي كلاس مرسيدس ..... و العربية التانية اللي خبطها اوبل فيكترا الكرومبة..... دي بقى المفاجأة انها بتاعت مدير المدرسة اللي اخوه و اخته فيها .............. ........
ههههههههههههههههههههههههه ههههههههههههههههههههههههه ههههههههههههههههههههههههه هههه
ربنا يكفينا شر الطرق و الحوداث .......... لأنها بجد بتحصل في ثانية .............

هههههههههههههه مدير المدرسة
تحس ان مصر مش 80 مليون ولا حاجة كلنا بنتقابل كأننا 80 واحد
الحمد لله انك طلعت من الحوادث دي بالسلامة

المشاركة الأصلية كتبت بواسطة y a r i s

هههههههههههههههههههه
حبايبي جميعاً تسلمولي ياربي .... واللهي الاهالي دول ليهم الجنة هما الي شافوه مننا شوية
وانا اجزم بل اكاد اقطع ايدي ان كل واحد فينا. كان ماشي بيروح المدرسة ومعاه نسخة من مفتاح عربية ولدوا .... زي ما انا اقطع. ايديا ان الواد الحيوان ابني برضوا مخبي نسخه من مفتاح العربية او من مفتاح عربيت اموا .... ورغم اني فتشت اوضتوا عشرين الف مره. اموووت وافهم هو مخبي المفتاح فيييييييييين ياراجل ده انا فتشت حتى قطن المخدات. وقلت اكيد مخبي المفتاح فيهم .... فتشت الجزم الشربات الفنيلات ونفسي افتش الواد تفتيش ذاتي وهو طالع وهو داخل. لغايت ملاقي النسخه الاحتياط

مش عاوز ابني يعمل فيا زي ما كنت بعمل في ابويا. ... لان ابويا الوحيد فيكي يا مصر الي بعد مايركن العربية ويغطيها كان يفك وش الكاسيت ويخلع البطارية بتاعت العربية. وتلاقيه ياعيني رايح جي بالبطارية. لدرجة اني خفت الناس في الحته يسموه ابو بطارية من كتر مكان بيشيلها في ايدوا وبيشوفوه بيها هههههههههههههه

سامحني يابه علي عملتوا فيك وانا صغير بس اعمل ايه انتا الي حببتني في العربيات

هههههههههههههههههههههههه
مش هتعرف كانوا أهلينا عرفوا
خد بالك الجيل بتطور بطريقة مذهلة يعني ألعابهم دلوقتي الموبيلات التاتش وإحنا كان أخرينا العربيات اللي بالزمبلك