أول حادثة في حياتك ومش قادر تنساها

**medododo** · 29-09-2012 01:03 AM

أول حادثة في حياتك ومش قادر تنساها
بدل جو المشادات اللي شغال في المنتدى ده
تعالو نغير الموضوع
أه عنوان الموضوع حادثة وكلام جامد
بس طبعاً أي مصيبة في العربية بتبقى صعبة في أولها
وبعد كده عادي وبعد كده بتتحول لكوميديا وده الجانب اللي فاتح الموضوع عشانه
الرجاء المشاركة بالمواضيع المشابهة
هبدأ بنفسي وأول حادثة
كنت ساعتها في ثانوية عامة ولسة مخلص امتحانات وجاي بدري من اللجنة
وأشتريت شريط كاسيت جديد وروحت البيت أسمع الشريط
الشيطان لعب براسي الكاسيت ده صوته وحش وكاست العربية أجمد والله يرحمه الحاج كان في الشغل وسايب العربية نزلت شلت جزء من غطا العربية وابتديت اسمع الشريط
معجبش الشيطان شيلت باقي الغطاء وقعدت ألمع في العربية معجبش الشيطان قولت مبدهاش دور واطلع خد لفة واسمع الشريط وتعالى (مع وضع حجر مكان العربية عشان ارجعها مكانها والحاج الله يرحمه ميعرفش)
طلعت خدت اللفة التمام ومفيش اي مشاكل خالص يجي نص ساعة كده
وقررت اروح وكنت بجري الصراحة مع انعدام خبرة وفي الشارع الجانبي المؤدي للبيت في ذي تقاطع كده وشوف الصدف يطلعلي عيل صغير بيقطع الشارع من اليمين للشمال وجه ادامي روحت دايس فرامل وحاود الدركسيون شمال لسه العك مخلص
صحاب العمارة اللي عند التقاطع كانو بيجددوا مدخل العمارة وفارشين رمل في الشارع
عارفين عربيات الملاهي العربية لفت حاولين نفسها ولبست وش في ضهر أوبل موديل حاجة وسبعين أو وستين حاجة كده حفرية متغطية (منعرفلهاش صاحب مرمية في الشارع من يوم ما سكنا) طبعا الناس اتلمت ولائي اللي بيطلعني من العربية أنت كويس عايش ؟؟؟!!!
طبعا انا الحمد لله بخير بس صوت الخبطة ذي ما يكون فردة تريلا ضربت أو مدفع رمضان
نزلت لقيت المصايب
العربية بقت هاتش باك من قدام
والأوبل متغطية بس تحتها بودرة كتير؟؟؟؟؟؟؟؟؟؟؟؟؟؟؟؟؟؟؟؟
وراجل طالع من بلكونة في الدور التاني حاجة ايه من التاريخ عربيتي عربيتي عرر ب ي ت ي
وانا مبلم
وفجأه لقيت الراجل ده عياله مسندينه ونازلي الشارع وأنا لسة مبلم
وبيصرخ هتصلحها مش ه س ي ب ك الا لما تصل ح ه ا
ياحج اهدى صحتك اللي عايزه كله إن شاء الله هيحصل بس شيل الغطا نشوف حصل عندك إيه
وهنا فوقت لأني كنت عايز اعرف ايه البودرة اللي تحت العربية الاوبل دي ايه وعرفت
العربية البارومة وكلها من ايام ما تحتمس كان بيتقدم لحتشبسوت وجايب مهر 3 مسلات
والبودرة دي هي اللي باقي من شنطة عربيته وحالة من الضحك جت لكل اللي واقفين وانا رجعت أبلم تاني والراجل اتعصب مش هسيبك يا مستهتر يا وشوية كلام قديم برضه كده من نوعية ارعن واهوج .......
لحد ما كام واحد ولاد حلال قالوله احنا عارفينه وعارفين والده دول ناس محترمه ووالده لما يجي من الشغل مش هيتأخر عنك سيبه يروح الواد وشه اصفر ومتخفش احنا شهود وعربيته موجوده اهه هيروح فين قولتلهم لأ انا مش هسيب العربية في الشارع كده لو هزقها لحد تحت البيت الناس اتوسطت وقالوله عادي واحنا عارفين بيته وتمام على كده طبعا ولاد الحلال ذقوا العربية معايا لحد تحت البيت وغطيتها و الحمد لله انها كانت مركونة بحيث لو الحاج الله يرحمه جاي العمارة هيشوفها من ضهرها فهيطلع مش هياخد باله
طلعت البيت والدتي شافتني قالتلي شاكلك عامل مصيبة حكتلها نزلت معايا الشارع شافت العربية قالتلي تاخد بعضك وتختفي عند جدتك ومتجيش غير أخر الاجازة
لو الله يرحمه شافك هيعملك كفته فعلا خدت بعضي وطلعت على جدتي الله يرحمها
وحكيت الموضوه بشكل تاني خالص عشان منظري طبعا البرستيج هيبوظ
طمنتني وقالتلي متخفش ده الحاج قلبه ابيض وبركة انك بخير وكلام الناس السكر ده
وعلى الجانب الاخر الحاج الله يرحمه وصل البيت والحاجة قالت في سرها مش هتتكلم الا لما يتغدي الاول حطت الاكل التليفون ضرب رد الله يرحمه على غير العادة
لقا مين على الخط جدتي شوف الصدف
اذيك ياحاج عامل ايه
الحمد لله يا حاجة
صوتك ماله ابدا ياحاجة(لسة الراجل جاي من الشغل وعادي يعني الله يرحمه)
مش عيزاك تزعل الشباب كلهم كده وان كان ابنك خبط العربية فبركة انه بخير .................................................. .................................................. .
...............................
السماعة وقعت والراجل نزل جري على الشارع يشوف المصيبة
وشافها لقا الراجل صاحب العربية التانية الناس جايباه
حضرتك أبو الشاب اللي عمل كده
ايوه اتفضل
انا صاحب العربية التانية (طبعا مكنش يعرف التفاصيل)
هتصلحولي ولا ايه
قالو حاضر في سمكري كويس نعرفه هاتها
انا مش هصلح عربيتي دلوقتي
طبعا العربية اياها مبتمشيش ولا فيها بطارية قالو اوصفلي السمكري واحنا هنوديهاله على حسابك قالوه تمام
طبعا السمكري كلم الحاج قاله دي عايزه شنطة نجيبها منين مفيش للموديل ده اي اعضاء بشرية حتى
قاله اتصرف عرفت بعدين انهم راحوا جابو براميل صفيح كام متر صاج وصنعوا للراجل شنطة

وانا الحاج الله يرحمه قعد مخاصمني مدةطويلة وفشلت كل جهود العائلة انه يصالحني
لدرجة اني اتمنيت اني اموت او انه يضربني اهون من العذاب ده
لحد ما جه الفرج من عند ربنا نزلنا البلد والبطارية نامت هناك وكان الله يرحمه مبيعرفش ان حد يزق ويرمي بالعربية (من حظي) لقيته جايلي وبيقولي تعالى اتفضل دورها وان كان لينا حاجة (حبيبي ياحج والله واحشني ) الله يرحمك
الرجاء الدعاء لوالدي
ولصاحب الأوبل
وللسمكري بالرحمة والمغفرة

**Mohab.Nabil** · 29-09-2012 02:16 AM

انا اول حادثة حصلتلى كانت اول يوم خدت الرخصة و كنت ماشى عادى فى شارع جانبى و واحد بعربية Land rover راكن عمودى على الرصيف عايز يطلع طبعا اديته كلاكس و نور عشان انا كنت ماشى عادى فى طريقى و كملت و هو برضه قام مكمل و قام جايب الفانوس و كسره .. و كانت غلطته و راح معايا المعادى يجبلى فانوس بعد ما والدى كلمه و للاسف طلع اى كلام و قالى المحل ده عنده وش فوانيس بس مش فاتح دلوقتى و طلع معندوش حاجة ومخدتش منه حاجة و ان شاء الله اخد ثمن الفانوس منه يوم القيامة بس ديه مش حادثة اوى

تانى واحدة كانت على الطريق الزراعى عربية مقطورة بتاخد غرزة لعبت منه قام خابط دهر العربية من ورا العربية طبعا عومت و لفت حوالين نفسها ووقفت بالعرض فى نص الطريق و المقطورة قعدت تخبط فيها 3 مرات لحد ما قدر انه يوقفها و الحمد لله كانت حادثة موت و ربنا كتبلى انا و اهلى عمر جديد .. الحمد لله

**matrix_it** · 29-09-2012 02:19 AM

ربنا يرحم والدك و يغفرله

**lanos2004** · 29-09-2012 02:19 AM

قطه نزلت تحت العجل وكان ابشع يوم فى حياتى بس كنت ماشى 140 و جيت افاديها اتحركت وخبطت فى العجله الى وار

**Y a r i s** · 29-09-2012 02:21 AM

اول حادثة في حياتي كان الحج عندو عربيتين. وكان في الشغل وسايب العربية التانيه ياحرام مركونه ومتغطية. ... انا بصراحة صعبت عليا العربية قوووي. .... وقلت لما اعريها واسوقها شوية واحرك. عجلاتها بدل الركنة الي هتخربها دي .... المهم طلعت بالعربية ولفة في جامعة الدول كان اياميها ويمبي بقه لسه جديد ضربتلي الهمبورجر ومكنش اياميها فيه حاجة اسمها كاشتب حتى المهم جي راجع البيت بسرعه قبل مايجي الحج واذ فجئتاً اشوف عربية بيجو ٥٠٥ بتاعت الحج في وشي .... هو لمح في المرايا عربية وراه شبه عربيتو وبيبص علي سايق لمحني انا فقام مفرمل في وشي قال يعني عاوز يعترض طريقي انا من هول الصدمة بدل ما ادوس فرامل رجلية اتشيلت ودوست بانزززززززين ههههههههههه. ولك ان تتخيل العربيتين. بقوا شكلهم عامل ازاي

**elpasha1** · 29-09-2012 02:26 AM

ربنا يكفينا شر الحوادث

**lanos2004** · 29-09-2012 02:27 AM

المشاركة الأصلية كتبت بواسطة Y a r i s

اول حادثة في حياتي كان الحج عندو عربيتين. وكان في الشغل وسايب العربية التانيه ياحرام مركونه ومتغطية. ... انا بصراحة صعبت عليا العربية قوووي. .... وقلت لما اعريها واسوقها شوية واحرك. عجلاتها بدل الركنة الي هتخربها دي .... المهم طلعت بالعربية ولفة في جامعة الدول كان اياميها ويمبي بقه لسه جديد ضربتلي الهمبورجر ومكنش اياميها فيه حاجة اسمها كاشتب حتى المهم جي راجع البيت بسرعه قبل مايجي الحج واذ فجئتاً اشوف عربية بيجو ٥٠٥ بتاعت الحج في وشي .... هو لمح في المرايا عربية وراه شبه عربيتو وبيبص علي سايق لمحني انا فقام مفرمل في وشي قال يعني عاوز يعترض طريقي انا من هول الصدمة بدل ما ادوس فرامل رجلية اتشيلت ودوست بانزززززززين ههههههههههه. ولك ان تتخيل العربيتين. بقوا شكلهم عامل ازاي

نشينت يا فالح

**ibn_seena** · 29-09-2012 02:28 AM

الله يرحم والدك

علي فكرة . اسلوبك مسخرة

**medododo** · 29-09-2012 02:31 AM

المشاركة الأصلية كتبت بواسطة mohab.nabil

انا اول حادثة حصلتلى كانت اول يوم خدت الرخصة و كنت ماشى عادى فى شارع جانبى و واحد بعربية land rover راكن عمودى على الرصيف عايز يطلع طبعا اديته كلاكس و نور عشان انا كنت ماشى عادى فى طريقى و كملت و هو برضه قام مكمل و قام جايب الفانوس و كسره .. و كانت غلطته و راح معايا المعادى يجبلى فانوس بعد ما والدى كلمه و للاسف طلع اى كلام و قالى المحل ده عنده وش فوانيس بس مش فاتح دلوقتى و طلع معندوش حاجة ومخدتش منه حاجة و ان شاء الله اخد ثمن الفانوس منه يوم القيامة بس ديه مش حادثة اوى

تانى واحدة كانت على الطريق الزراعى عربية مقطورة بتاخد غرزة لعبت منه قام خابط دهر العربية من ورا العربية طبعا عومت و لفت حوالين نفسها ووقفت بالعرض فى نص الطريق و المقطورة قعدت تخبط فيها 3 مرات لحد ما قدر انه يوقفها و الحمد لله كانت حادثة موت و ربنا كتبلى انا و اهلى عمر جديد .. الحمد لله

مقطورة ؟؟؟؟؟؟؟؟؟؟
الحمد لله عدد خلقه ورضا نفسه وزنة عرشه
إنك بخير

المشاركة الأصلية كتبت بواسطة matrix_it

ربنا يرحم والدك و يغفرله

أمين يارب العالمين وموتاك وموتى المسلمين أجمعين

المشاركة الأصلية كتبت بواسطة lanos2004

قطه نزلت تحت العجل وكان ابشع يوم فى حياتى بس كنت ماشى 140 و جيت افاديها اتحركت وخبطت فى العجله الى وار

صعبة أوي حصلت لواحد صاحبي قعد شهر في البيت وحاسس انه موت روح والذنب ركبه
الحمد لله انك بخير

المشاركة الأصلية كتبت بواسطة y a r i s

اول حادثة في حياتي كان الحج عندو عربيتين. وكان في الشغل وسايب العربية التانيه ياحرام مركونه ومتغطية. ... انا بصراحة صعبت عليا العربية قوووي. .... وقلت لما اعريها واسوقها شوية واحرك. عجلاتها بدل الركنة الي هتخربها دي .... المهم طلعت بالعربية ولفة في جامعة الدول كان اياميها ويمبي بقه لسه جديد ضربتلي الهمبورجر ومكنش اياميها فيه حاجة اسمها كاشتب حتى المهم جي راجع البيت بسرعه قبل مايجي الحج واذ فجئتاً اشوف عربية بيجو ٥٠٥ بتاعت الحج في وشي .... هو لمح في المرايا عربية وراه شبه عربيتو وبيبص علي سايق لمحني انا فقام مفرمل في وشي قال يعني عاوز يعترض طريقي انا من هول الصدمة بدل ما ادوس فرامل رجلية اتشيلت ودوست بانزززززززين ههههههههههه. ولك ان تتخيل العربيتين. بقوا شكلهم عامل ازاي

إيه الصدفة الهايلة دي ده انت لو خدت العربية 50 مرة مش هتتكرر
الله يكون في عون الاهل والله
تعبناهم واحنا صغيرين والنهاردة شايلين همنا وهم عيالنا