الموضوع: فيشة كشاف الفانوس الامامى - لانوس

المشاركة الأصلية كتبت بواسطة msobhy

ياجدعان هو فيه كده - لأ بجد انا هاعيط - أنا هادخل أعيط شوية لغاية لما ترفع الصور - وبجد ربنا يخلى المصريين الرجاله الجدعان - اللى بتخدم بدون مقابل

باشا انا اسف بجد امبارح نزلت اصور لك الشغل فمعرفتش فاضطريت اني افك لك الفوانيس مخصوص عشان اصور..ولما رجعت لقيت النت فاصل عندي ومعرفتش انزلهوملك.
(أصل بيني وبينك انا لاقط شبكة من الشارع عشان في مشكلة مع شركة لينك ومش راضيين يحلوها )

وبعدين ايه لازمته الكلام دا ياعم احنا هنا كلنا اخوات في المنتدى ومفيش بينا الكلام ده.

بص ياباشا

أول حاجة دا شكل الفانوس من ورا



زي ما انت شايف اللمبة الصغيرة موجودة زي ماهي عادي بس الفيشة الكبيرة قصيتها عشان ساحت ولفيت على السلك بتاعها شريط لحام.

يعني نور اللمبة الكبيرة مش هناخدة من الفيشة دي:



بس النور الفيراني(الصغير) زي ماهو هناخدة من الفيشة دي عادي مفيش مشكلة.

تاني حاجة بقى:

هنخرم 3 أخرام صغيرين في الفطا بتاع الفانوس على قد الأسلاك عشان نعدي الأسلاك منو زي كدا:



ملحوظة: لو مش عايز تخرم في الغطا براحتك بس هيبقى الفانوس من ورا مفتوح على طول وبكدا هيتوسخ من جوا وهيتملي تراب وطبعا اضاءته هتبقى وحشة.

بعد كدا لما تعدي الــ 3 أسلاك للناحية التانية هتشتري 3 كيليبسات نحاس زي دول وتقشر كل سلك حتة صغيرة وتركبهم بالبنسة أو القصافة وبعدين تلف عليهم شريط لحام زي كدا:



(الكيليبسات بنص جنيه الواحدة)

طبعا هيبقى سلك أرضي وسلك للنور الواطي والسلك التالت للنور العالي.

والسلكين بتوع النور الواطي والعالي هناخدهم مباشرة من الكتاوت مش من الفيشة الأصلية بتاعت الفانوس.

زي كدا:



انا عندي السلكين متغطيين بشريط لحام لكن انت ممكن تعرفهم بسهولة.

والسلك التالت الأحمر (الأرضي) دا هناخده من أي مسمار في الحوض زي كدا:



طبعا بعد ما تجيب له كيليبسه نحاس زي دي وتركبها وتلف عليها شريط لحام:



نيجي بقى للمبة نفسها:



الرجل الشمال دا الأرضي بتاع اللمبة, وهناخده من السلك الأحمر اللي عملنا قبل شوية.

الرجل اللي في النص فوق دا فردة النور الواطي وهناخده بردو من السلك اللي واخدينو من الكتاوت مباشرةً.

والرجل اليمين نفس الكلام بردو هناخدها من الكتاوت مباشرة, ودي بتاعة النور العالي.

يعني دا هيبقى الشكل النهائي للمبة:





بس بعد ماتوصلها الأسلاك ركبها كويس جوا الفانوس وثبتها كويس وقفل الغطا عادي.


ودا هيبقى الشكل النهائي من ورا:



والسلك الأحمر زي ماقلنا من جسم العربية.

وبس بقى يا معلم قفل فانوسك عادي وربطه كويس ورتب الدنيا عندك وبسم الله واطلع جرب

وإن شاء الله هتلاقي فرق تاني خالص في الإضاءة وهتبقى قوية وثابتة معاك وبالذات عشان واخد أرضي من جسم العربية مش من الفيشة وكمان السلكين التانيين من الكتاوت على طول للمبة مش من الفيشة المعفنة بتاعت الفانوس


في النهاية أتمنى بجد اني أكون أفدتك ولو بحاجة بسيطة, وبعتذر منك تاني على التأخير.

وأي استفسار انا جاهز,

ودعواتك ليا بالتوفيق والنجاح في الدراسة.

وتحياتي ليك ياباشا.