كلمتين لكل ملاك نيسان - الجديدة والقديمة

**the_air_devil** · 29-09-2012 02:50 PM

بسم الله الرحمن الرحيم

النهاردة مش جاي اعمل تقرير عن حاجة في العربية

لكن داخل اقول كلمتين وبس, وربنا يعلم مدى صدقي فيهم

المنتدى ده بيضم رجال من النادر وجودهم, في الاهتمام والمساعدة في حل المشاكل, ودي حاجة يندر وجودها في الزمن ده... ويدلوك ازاي تتفاداها وازاي تتجنب الأعطال وتعالجها....

وياما شفنا مشكلات صعبة وعويصة ومحتاجة حلول فنية شديدة الدقة, والكل كان بيساهم في حلها بطيب خاطر وبحسن نية من غير ماحد يمن على التاني انه بيعرف اكتر منه...

وكله بيساعدك في اختيار عربيتك ... وحتى لو ماكانتش الكفة ترجح في صف نوع معين هو بيحبه لكن الكل بيقول الحق .... وكلنا بالتأكيد استفدنا قبل مانرسى على عربياتنا اللي ربنا أكرمنا بيهم ... الناس هنا كلهم مشرفين أو أعضاء جدد أو قدامى أفادونا بشدة واحنا بنعرف مميزات وعيوب وخبرات كبيرة عن كل عربية مهما كان موديلها

بس عايز اقول ان أقل واجباتنا - قبل ما نفيد الناس زي ما أفادونا لو عرفنا حاجة - اننا نعرف ان الكل بيخدم الكل باحترام وبكل صداقة , ماحدش هنا شغال تحت يد التاني علشان نسمع كلام من عينة (عايز حل فوراً ودلوقتي على مزاجي) مكتوب بصيغة الأمر....يا سيدي لو حد حصلت معاه المشكلة ولقى حلها بالتأكيد مش هايتأخر عن مساعدتك...ولو مافيش حد هاتلاقي اللي يقوللك تدور فين وتروح أنهي مركز صيانة ولا حتى ميكانيكي بيفهم في العطل أو العيب أو الملحوظة اللي عندك

استعمال صيغة الأمر والتعامل بصلافة مش من صفات أعضاء قسم نيسان اللي اتعودنا عليها, الناس بتخدمنا لوجه الله وكله بيساعد التاني, مايصحش أبداً ومافيش قواعد دين أو أخلاق بتقول ان لما حد يتطوع علشان يساعدني انزل فيه أوامر ونواهي وفي الآخر امتعض واعترض واتلكك ... وانا مش باقصد حد معين بأي كلام... لكن كان لازم اقول الكلمتين دول في حق ناس لهم فوق راسي كل احترام ومودة

وشاكر أفضالكم وحسن قراءتكم... وربنا يديم المعروف, وأسيب التكملة لأي حد عنده إضافة للكلام ده

**saint2011** · 29-09-2012 03:11 PM

كلامك فى محله أخى الكريم وكلنا أخوه فى الله جميعا وربنا يديم المعروف والمودة والمحبه بيننا

**zambarota** · 29-09-2012 03:13 PM

انت نسيت تحدد نيسان ايه بالظبط (اكيد تقصد صنى)

**the_air_devil** · 29-09-2012 03:21 PM

المشاركة الأصلية كتبت بواسطة zambarota

انت نسيت تحدد نيسان ايه بالظبط (اكيد تقصد صنى)

لأ انا فعلاً قاصد كل ملاك نيسان علشان ماحدش يفتكر اني اقصده بالتحديد ... الكلام عام للجميع ... لأن الجميع بيساعد الجميع ..مش كدة؟

**limo81** · 29-09-2012 05:08 PM

كده يا باشا......!

ربنا يبارك لكل الأعضاء ويجازيهم عنا كل خير
الناس هنا ما بتتأخرش ع بعض فى أى نقطه
وتحس من تانى مشاركه ليك إنك بقالك زمن تعرفهم
ومهما كانت المشاغل صدقنى محدش بينسى حد!!!

**kliken** · 29-09-2012 05:26 PM

ربنا يديم المحبه بين اعضاء القسم و المنتدى بوجه عام ان شاء الله

**A.DIEA** · 29-09-2012 07:04 PM

كلام سيادتك مظبوط وانا فعلا استفدت كتير من المنتدى ده وفعلا اول مرة الاقي اهتمام سواء من المنتدى او شركة نيسان فعلا حاجة تشرف

**SonaSteel** · 29-09-2012 08:12 PM

جزاك الله خيرا اخي الكريم

انا محتاج مقابلة قريبة اشوف الناس الجميلة ديه كلها ..... ربنا يديم المعروف يارب :d

**Youssef.Awad** · 29-09-2012 08:47 PM

كلام مظبوط فعلا وفى محله 100% يا استاذ أحمد ..

وبصراحة من اول ما انضميت للمنتدى هنا وانا ملاحظ النقطة دى
وكل يوم - الحمد لله - بتزيد وكلنا كأعضاء قدامى وجدد أكيد هدفنا هو الافادة الجماعية قدر المستطاع
وحرام فعلا لو حد فينا عنده رد او معلومة ويبخل بيها على الآخرين لمجرد انه كسلان او مش داخل بالعضوية !!!

وتنسى ان نجاح اى مكان فى الدنيا مبنى دائما على روح التعاون والافادة وتبادل الخبرات .. وده فعلا اللى بيتم هنا فى القسم ومخليه متميز عن باقى الاقسام والمنتديات بغض النظر عن مبيعات عربياتها فى مصر او غيرها.

واكيد الناس القدامى ملاحظين الملل اللى كان فيه القسم من فترة قريبة بعد اما الكل عرف تقريبا كل حاجة عن عربيته وما كنش فيه موضوعات جديدة واغلب المطروح كان مكرر .. لحد اما ظهرت الصنى الجديدة وظهرتم كلكم بموضوعاتكم ومشاركاتكم وابداعاتكم وسبحان الله كأنكم معانا من زمان وبسرعة فهمتوا طبعنا واسلوبنا وبكده تستمر المسيرة .