كل الاعلانات تجاار تحس ان مصر كلها بيتاجرو في العربيات ..بجد حاجة تقرف!!

**mrbond88** · 29-09-2012 11:45 PM

كل ما شوف اعلان اكلم صاحبه الاقيه تااجر والعربية فيها ترابانتين توكيل , يقول فابريكة واروح اشوفها الاقيها رشة
هاحكيلكم اخر عربية شوفتها
الاعلان في الوسيط المرة دي مش على النت
الاعلان
رينو لوجان 2011 19000 كم فاابريييكة برة جوة

انا: الوو

الراجل (بصوت واحد عربجي ): ايوة أأمر

انا: حضرتك عارض لوجان للبيع في الوسيط .... حضرتك صاحب العربية وللا فيها توكيلات

الراجل: ايه؟ اه هي بتاعة اخت مراتي اصلها بتدرس في الجامعة وهتسافر عشان كده هتبيع العربية

انا (في باليي: قديييمة اوي الحوارات دي!!

طب كنت عايز اشوف العربية

الراجل : في مصر الجديدة انا في مشوار تعالى الساعة 4 يوم الجمعة

...... رحت للراجل قاللي انا ساكن في عمارة 61 ونازللك
لقيت واحد مقاسه 4*4 جي من بعييد ومعاه ابنه الصغير ( قال يعني نازل بالترينك من البيت)
ولو حد راح سوق السياارات مرتين هيعرف اننه تااااااااااااااااجر
طب ما تقوول انك تاجر فيها ايه؟!! بدل ما تعمل حوارات

المهم ببص في العربية من جوة لاقيتها مليانة كوبيات شاي فاضية ام جنيه اللي بتتباع في سوق السيارات

وحاطط اكياس على الكراااسي واللزق الاهبل اللي على الباب و الاكصدامات

المهم بافحص العربية كويس لاقيت الدهان مسيل من تحت الكبوت وفي نقطتين دهان كده على طرف الفانوس الورااني

....للناس اللي مش عارفة الموضوع بس ... العربية الفابريكة بيرشوها قبل ما يركبو الفوانيس فا مستحييل تلاقي نقطة دهاان على الفانوس
المهم عرفت ان العربية رشة فسيبتو و مشيت

طبعا انا سيبتو لانه كدااب ..مكن عربية تبقى رشة حزام عاادي وتكون نضيفة

انا حبيت بس انصح الناس احسن عربية تشتريها

1- تكون اول يد او الرخصة باسم المالك على الاقل

2- فابريكة برة جوة - ولو رشة او مغيرة حاجة لازم صاحبها يكوون قايل

3- يستحسن عدااد ماشي قليل - انا عارف ان ده مش شرط لان العربية حالة بس احب افكركم ان العربية
6000 قطعة فا مش معنى ان الموتور و الشاسيه زي الفل يبقى العربية مش هاتعذبك فا يستحسن تكون مش ماشية كتيير ( وتظبيط العداد ده سهل جدا بردوه يعني !!)

و ربنا يرزقكم بعربية سليمة ان شاء الله

المهم انا لحد دلوقتي بدور على عربية في رينج 45000- 50000 ومش لااقي ربنا يسهل

و للناس اللي بتبيع عربيتها و بتخبي عيوووب :
افتكر انك في يوم من الايام هاتكوون مكان المشتري
وانه ممكن يشتريها ويدعي عليك لانك دجكت عليها

فاتقو الله في البيع .... وشكراااااااااا

**حماده المصري** · 30-09-2012 01:32 AM

حسبي الله ونعم الوكيل في معظمهم الحقيقه نصب في نصب

انا شوفت اعلان اف ار في برليانس فبريكه 8 الف كيلو فقط للبيع ب 55 الف روحت ناطط على مدينه نصر صاحب المعرض مش موجود

واتفرج بقى على العربيه من جه دركسيون وفتيس مقشر

من برا في رش كتير ومش حلو وفوانيس مطفيه

الكاوتشات نوع غريب وبايز كمان ف اكيد معديه ال 100 الف

كلمت صاحب المعرض عمل اهبل وجي مالهاش اخت وبتاع لما فهمته انه بينصب قالي اللي تامر بيه

**hardman20060** · 30-09-2012 01:33 AM

ما انت ممكن تلاقي واحد صاحب العربيه والرخصه باسمه ويكون كداب ويغشك , وممكن تلاقي تاجر امين ويديك عربيه محترمه , الموضوع مش موضوع تاجر او صاحب عربيه المهم تلاقي عربيه محترمه وخلاص

**hossam_elwani** · 30-09-2012 02:48 AM

الى حصل ان اغلب الناس بقت معرضه عن الشراء من المعارض وتجار المستعمل فبقت تشترى من النت الى طبعاً احتلوه التجار لتعويض وقف حالهم فى المعارض ... يعنى كأنك يابو زيد ماغزيت

**peposupervisor** · 30-09-2012 01:59 PM

فكرتني ب 127 فبريكة برة وجوة
ورحت اشفها في المعادي في طريق الاوتوستراد عند صقر قريش
مشوار علقة
ولقيتها فعلا فبريكة برة وجوة بس مفيهاش حتة سليمه الهيخدها هيغير كراسيها وماتورها والصاج الخارجي والفتيس والتابلوه والشنطة مفيهاش غير باب يمين ورا المش هيتغير

**Land_Cruiser** · 30-09-2012 02:46 PM

نادرا ما هتلاقى حد بيقول أن العربيه فيها مشاكل فى التليفون او حتى لما تروح تتفرج سواء كان عن عمد أو جهل و بالتالى لابد من الكشف الدقيق على السياره للحكم على حالتها الفعليه و ساعتها ما تفرقش إذا كان اللى بيبيعها تاجر أو صاحبها المهم أن سعرها يبقى متناسب مع حالتها الفعليه وورقها سليم. عمليه تمييز حاله العربيه من التليفون اعتمادا على كلام البائع كفايه عليها قوى ٥٪ من التقييم مثلا و زيهم مثلا لمظهر أو لمهنه البائع يعنى كله ١٠٪ و باقى ال ٩٠٪ للعربيه نفسها. بالمناسبه أنا شفت ناس بتقول على e36 كسر زيرو فى عربيه ماشيه اكتر من ٣٠٠ ألف كيلو و الراجل مقتنع بكلامه و بيحاول يقنع صديقى به كمان

**tananybasha** · 01-10-2012 01:08 AM

والله عندك حق و حاسس بيك
ليا واحد صاحبى كان عايز لانسر 2008 سوبر اكشن
رحنا السوق
طبعاً عربيات مزبله
و فى احد الأعلانات لقينا عربية ورا الحديقة الدوليه
رحت معاه
الراجل برضوا اصل دى عربية جوز اخت مرات خال ست عمة خالى و هى عامله التوكيل ده لأخو جوز خالة ستها الله يرحمها يعنى فيها توكيلين او تلاته
ماشى
العربية على كلامه بره و جوه و فوق و تحت و يمين و شمال و عربية حالة نادرة من الحالات اللى لو راحت اليابان هيحطوها فى متحف الشمع
اتفرج على العربية بحكم انى غاوى
فردة الشاسية اليمين ورا تعيش انت
التانك متاخد فى الخبطه
الصدر متغير كله
الكبوت كان ازرق و قلبه احمر
القوايم فيها طراطيش بوية
الكاوتش مهرى
التابلوه و الفتيس مقشرين
من الأخر
عربية كنبه ملعوب فى عدادها
اه نسيت اقول انها عامله 16450 كم
ايوه بس
عشان صاحب مرات صاحبة جوز اخت اللى معاها العربية بتاخدها معاها مشاويرها و راكنين العربية
قلت لصاحبى يالا بينا
الراجل بيقولى ايه رأيك
قولتله اقولك و متزعلشى
لأ
شكلك هتزعل
حتى السلام و الله ما تستاهله
سكت خالص و بقى زى الأخرس
و بعدين صرفنا نظر عن اللانسر و جبنا 2010 كرولا و رحمنا نفسنا