تقييم اللوجان بعد السبعين ألف ... الصراحة مش جيد
السلام عليكم
ده موضوع تقييم للعربية اللوجان فول أوبشن 2010 اللي معايا لعل حد يستفيد.
هنا سأذكر السلبيات فقط وغير كده هيبقى إيجابي منعا لإطالة الموضوع.
1- اول مشكلة واجهتني بعد إستلام العربية مباشرة وهي صعوبة نقل الغيارات وخاصة المارشدير وإنتهى نسبيا (يعني موجود لغاية دلوقتي) بعد تغيير تروس في علبة الفتيس.
2- مشكلة كبيرة جدا في التوكيل ألا وهي رفض التصليح لأي حاجة تبوظ وده لو العميل هيدفع أمّا لو الحاجة اللي باظت دي تبع الضمان يبقى تتصلح مش تتغير. (مثال : - طلع عيني علشان يغير الكلاكس لدرجة إن واحد من الصنايعية صلحه مرة عن طريق إستخدام مفك وعندي أمثلة كتيرة والله لدرجة إنّ بحس إن أنا بفاصل في التوكيل ولا كإنّي بشتري طماطم )
3- مشكلة تانية ألا وهي الواسطة بمعنى تلاقي عربيات جات بعدك وطلعت قبلك وبتتكرر كتير جدا ... آخر مرة كنت في التوكيل كان الإستلام الساعة 4 وإستلمت الساعة 6
4- إستغلال نسبي في بعض قطع الغيار (حتى الآن مش لاقي علبة يمكن تمنها 2 جنيه ولا حتى 5 جنية وهي علبة السبوت لايت والتوكيل عارف بقى ومشهيص الدنيا مخلي تمنها أكتر من 350 جنية بالرغم من إنه بيبيع الإكصدام كله بحوالي 1200 جنية ..... غريبة جدا جدا).
5- نرجع لمشاكل العربية .... طلبو منّي تغيير مساعد شمال بعد صيانة الخمسين ألف.
6-غيرت خلال السبعين ألف 4 تيل فرامل وكمان طنابير ... مش عارف غزاي ... والله يا جماعة معظم السبعين ألف على الطرق السريعة ... تقريبا مش بستعمل الفرامل غير عند البوابات.
7- والآن مع المفاجأة الكبير ... طلبو تغيير طقم الدبرياج ... برضو نفس التعليق (والله يا جماعة معظم السبعين ألف على الطرق السريعة).
8- طلعت من صيانة الستين ألف اللي هيه بقى أعظم صيانة ... وعلبة الشوكمان مش مربوطة (معرفش ليه فكوها اصلا) ورحت تاني يوم ... ألاقيهم بيقولولي أصل إمبارح بتاع الشوكمانات مكنش موجود ( برضو نفس السؤال مين فك علبة الشوكمان ومعاه سؤال تاني هوه بتاع شوكمانات واحد بس) .... والمصيبة بيتخانقو معايا علشان ياخدو فلوس تصليح المشكلة ...
9- تمّ تغيير الضفيرة كاملة بسبب وجود خلل في مؤشر الحرارة (بعد 3 صيانات أو 4 مكنوش راضيين يعملو حاجة).
الحمد لله على كل شيء ولكن أظن إن التققيم مش جيد خلال السبعين الف الاولى ... وأتمنى للجميع التوفيق .....تحياتي.
