العربية من الركنة مبتقومش والبطارية سليمة وشغالة !!!!

**Mrs.Aya** · 01-10-2012 12:24 AM

السلام عليكم
بعد ما الحمد لله جيت ووصلت المنتدى بالسلامة أو بمعنى أصح المنتدى وصل عندى بالسلامة وداعا فيس بوك نايل موتورز وهاى منتدى بس عاوزة الردود والخبرات تنزل مطرة ترف عليا

العربية بتاعتى ريجاتا 86 لما بتقعد اكتر من اربع ايام منزلش وحتى مسخنهاش اجى بعد كدا ادورها بتحلف بالله ما هى قايمة
كشفت على البطارية مظبوطة وسليمة وشحنها مية مية والعيب مش منها لانها شغالة ومنامتش ننة هوووووو
المهم بقى مرة دارت بان اتجرت بعربية تانية وفضلت فيها احاول ادور وانا جايبة التانى وكارك دبرياج دارت بس بعد ما المارش صوت وطلع تاريخه هو والبطارية والموضوع دا معجبنيش ورحت لميكانيكى قالى لا هى زى الفل قام بتعليه حاجة تخلى ال rpm بيعلى شوية وهى واقفة بيقرب على رقم 10 لان كانت احيانا يقل اوى لدرجة تفصل

المهم بقى ان كل مرة العربية تتركنلها كام يوم تعمل نفس الحركة
مرة تانية دارت ان حد من الجيران فتح غطا الموتور وحط بنزين وبعدين فتحت الشفاط ودورت فصلت مرة وبعدين دارت الحمد لله

هل بقى كل مرة تتركنلها كام يوم هنزل اعمل فيها الحركة دى ؟
وهل دا طبيعى يحصل ؟
والعيب منين ؟؟
واكتشفت حاجة انهاردة ان فى سلكة من السلوك الموصلة للموبينه فاصل والسلك دا ماشى فيه كهربا ومش شايفة ان فى تأثير عالعربية العربية عادية بس كل اللى حساه الفترة اللى فاتت ان فى قفلة بسيطة فى الكهربا لان لما اكون مشغلة الكاسيت وادوس كلاكس الاغنية او السورة ترجع من الاول تانى

وسؤال أخير معلش رخامة يعنى
عاوزة اتعلم واعرف توصيلات الكهربا فى العربية بادئة منين وماشية ازاى فى الريجاتا علما بأن عربيتى بتقفيلة المصنع مش ملعوب فيها خالص شرياها من مالك اول كان محافظ عليها جدا لحد ما اشترتها منه
هل فى فى المنتدى هنا كدا ؟ ولو مفيش دلونى على موقع يعلمنى

شكرا نايل موتورز

**strongxx** · 01-10-2012 12:53 AM

بصي....عموما مشكلتك بتتلخص في توصيلات الكهربا ولازم تروحي للكهربائي يراجع لك علي البوجيهات بالوصلات بتاعتها إلي متوصله للبوبينه....وكمان يشوف المارش لو مش بيدور من أول تكه
لان موضوع ان العربيه لما بتبات كذا يوم بتنام خالص دي غريبه علي عربيه بالحاله الجيده دي
بس عن نفسي مش قادر أوصل لسبب المشكله الفعلي

وموضوع ان العربيه لما تبات كذا يوم بتنام في سبات عميق دي ميزه علشان متتسرقش

**mohamed_selim** · 01-10-2012 01:17 AM

البنزين فى خراطيمه بيتبخر و الطلمبه مبتقدرش توصله للموتور فبتحتاج تحضير بنزين زى ما جارك عمل
ممكن تغيير الطلمبه ينفع بس بنسبه كبيره لازم تدور كل يوم عشان ده ميحصلش

**icucono** · 01-10-2012 01:20 AM

بما اني كان ريتمو في سالف العصر والآوان
موتور ١٥٠٠ هو نفس موتور الريجاتا
قابلت نفس المشكله ديه واكتشفت ان قي حاجة اسمها الخزان في الكاربراتير مهمتها تحوش شويه بنزين عشان تدور العربيه الصبح بدري، ولو فيها مشكله البنزين بيرجع تاني للتانك او بيتبخر عشان كده الراجل فك غطا الموتور وصب شويه بنزين في الكاربراتير، بس طالما بتدوري وصوت المارش كويس وسلوك الاسبراتير بتشرز كهربا يبقا الكهربا عندك سليمه باستثناء البوجيهات لو قديمه شويه

**Mrs.Aya** · 01-10-2012 04:50 AM

المشاركة الأصلية كتبت بواسطة strongxx

بصي....عموما مشكلتك بتتلخص في توصيلات الكهربا ولازم تروحي للكهربائي يراجع لك علي البوجيهات بالوصلات بتاعتها إلي متوصله للبوبينه....وكمان يشوف المارش لو مش بيدور من أول تكه
لان موضوع ان العربيه لما بتبات كذا يوم بتنام خالص دي غريبه علي عربيه بالحاله الجيده دي
بس عن نفسي مش قادر أوصل لسبب المشكله الفعلي

وموضوع ان العربيه لما تبات كذا يوم بتنام في سبات عميق دي ميزه علشان متتسرقش

لا اعتقد تفسيرك خاطئ لان البوجيهات متغيرة من تقريبا نص سنة والمارش جديد وبيستجيب على طول مش العيب فيه لا انا عارفة عيوب المارش
تصدق معاك حق فعلا ميزة عشان السرقة !!! هتخلينى مصلحهاش هههههههههههه

**Mrs.Aya** · 01-10-2012 04:53 AM

المشاركة الأصلية كتبت بواسطة mohamed_selim

البنزين فى خراطيمه بيتبخر و الطلمبه مبتقدرش توصله للموتور فبتحتاج تحضير بنزين زى ما جارك عمل
ممكن تغيير الطلمبه ينفع بس بنسبه كبيره لازم تدور كل يوم عشان ده ميحصلش

تفسير منطقى فعلا
بس هل من معنى كلامك ان الوضع سيظل على ما هو عليه ؟؟ انا عاوزة حل يلغى المشكلة دى نهائى
وطبعا بحب اسأل الأول عشان الصنايعية ميكلونيش بجهلى

**Mrs.Aya** · 01-10-2012 04:56 AM

المشاركة الأصلية كتبت بواسطة icucono

بما اني كان ريتمو في سالف العصر والآوان
موتور ١٥٠٠ هو نفس موتور الريجاتا
قابلت نفس المشكله ديه واكتشفت ان قي حاجة اسمها الخزان في الكاربراتير مهمتها تحوش شويه بنزين عشان تدور العربيه الصبح بدري، ولو فيها مشكله البنزين بيرجع تاني للتانك او بيتبخر عشان كده الراجل فك غطا الموتور وصب شويه بنزين في الكاربراتير، بس طالما بتدوري وصوت المارش كويس وسلوك الاسبراتير بتشرز كهربا يبقا الكهربا عندك سليمه باستثناء البوجيهات لو قديمه شويه

ملحوظة بسيطة فى بداية كلامى الريجاتا بتاعتى 1300 سى سى !!!
اه فعلا انا قبل كدا اول ما جبت العربية من سنة عملت تنظيف شامل للرداخ والكربراتير الميكانيكى قال العربية محتاجاهم وفعلا صوت المارش تمام والاسبراتير ممتاز والكهربا لسة متظبطة قريب فيما عدا السلك اللى فصل دا والبوجيهات جديدة وكويسة !!!

ما الحل بقى اغير الكربيراتير ولا اعمل اية ؟

**icucono** · 01-10-2012 09:54 AM

المشاركة الأصلية كتبت بواسطة mrs.aya

ملحوظة بسيطة فى بداية كلامى الريجاتا بتاعتى 1300 سى سى !!!
اه فعلا انا قبل كدا اول ما جبت العربية من سنة عملت تنظيف شامل للرداخ والكربراتير الميكانيكى قال العربية محتاجاهم وفعلا صوت المارش تمام والاسبراتير ممتاز والكهربا لسة متظبطة قريب فيما عدا السلك اللى فصل دا والبوجيهات جديدة وكويسة !!!

ما الحل بقى اغير الكربيراتير ولا اعمل اية ؟

موتور الريتمو هو موتور الريجاتا سواء ١٣٠٠ او ١٥٠٠ او ١٦٠٠ ،
في حاجة اسمها طقم اصلاح على ما اعتقد، وخليه يشيك على البوابه والشفاط، المشكله هنا ان شاء الله وماتدخليش في متاهه تانيه

**mohamed_selim** · 01-10-2012 10:00 AM

المشاركة الأصلية كتبت بواسطة mrs.aya

تفسير منطقى فعلا
بس هل من معنى كلامك ان الوضع سيظل على ما هو عليه ؟؟ انا عاوزة حل يلغى المشكلة دى نهائى
وطبعا بحب اسأل الأول عشان الصنايعية ميكلونيش بجهلى

عربية اخويا ١٣٢ نفس المشكله بس لما غير الطلمبه اتحسنت شوىه .... يعنى بتحتاج اسبوع ركنه عشان تفصل و غىر الكاربراتير مفرقتش كتير فحاولى تظبطى الدنيا و بعدين تتعايشى مع الوضع

**Mrs.Aya** · 02-10-2012 10:39 PM

المشاركة الأصلية كتبت بواسطة icucono

موتور الريتمو هو موتور الريجاتا سواء ١٣٠٠ او ١٥٠٠ او ١٦٠٠ ،
في حاجة اسمها طقم اصلاح على ما اعتقد، وخليه يشيك على البوابه والشفاط، المشكله هنا ان شاء الله وماتدخليش في متاهه تانيه

انا عاملة طقم اصلاح دا قريب
وفعلا مقتنعة بكلامك جدا
طيب الوقتى من بعد ما سقطت بنزين فى الكاربيراتير عشان تدور ووانا ماشية بيها اول ما اديها النقلة بتنطر لما ابدأ ارفع رجلى من على الدبرياج
النطرة دى سببها اية ؟؟؟؟؟؟؟؟؟؟