عندي رجه سخيفة أوي (أوبل فيكترا بي 2)
السلام عليكم و رحمة الله
من ساعة ما جبت العربية و هي فيها رجة خفيفة كده على السلانسية .. خفيفة على n ... و بتزيد على ال d و ال r .. وبتزيد أكتر مع تشغيل التكييف.
سألت ميكانيكي عندنا في الزقازيق .. من غير ما يكشف قالي كرسي موتور .. بس هو مبيشتغلش في الأوبل .. فقال لي اعملها في مصر ما دام هتشتري كرسي الموتور من مصر.
يوم الأربعاء رحت لهيثم عشان الحاجه تبقى جنبي لو احتجت حاجه في العربية ..كانت الساعة 6 مساءا .. أمير قال لي مفيش مكان و بتاع .. المهم رحت لمليجي جبت منه كرسي الموتور اللي ورا .. و قلت له مفيش حد يركبه؟ .. قال لي في واحد شغال معايا اسمه مصطفى .. هو و اتنين صنايعيه معاه .. قدام المخزن .. عشان لو زبون خد حاجه يركبها على طول.
المهم كان شغال في عربيتين فيكترا ايه بيغير لواحده اسطوانه و ديسك و بليه و التانيه طلمبة بنزين .. خلص و بس على عربيتي .. قال لي دي مش رجة كراسي .. قلت له أمال ايه؟ قال لي ده شداد الدينامو .. رجعت الكرسي و جبت شداد من عند مليجي (فك لي واحد من موتور) و اشتريت سير دينامو جيتس جديد من الوطنية .. و حساس شكمان .. حتى مكنش معايا فلوس .. ركبت تاكسي رحت سحبت فلوس و رجعت .. جربت العربية .. زي ما هي بالضبط.
قال لي تبقى القنطرة و بتاع .. بص عليها لقى مافيهاش حاجه .. المهم حسيت انه مش عارف كده .. و في الاخر عاوز 150 جنيه في تغيير شداد و سير دينامو .. حسبي الله و نعم الوكيل .. اديته 130 جنيه و مشيت .. و طبعا متضايق جدا عشان دفعت 600 جنية بالضبط (سير دينامو و شداد دينامو و حساس شكمان و مصنعية) و الحاجة اللي كنت رايح لها متحلتش .. حتى حساس الشكمان مكنش عندي مشكلة معاه .. بس عشان فيشته كانت مقطوعه.
تاني يوم الخميس .. كنت راجع الزقازيق .. و معدي على جسر السويس .. لقيت نفسي جنب الحرفيين .. قلت اما أعدي على هيثم .. يقول لي الرجه دي من ايه و أروح .. بعد مداولات أمير دخلني .. حلمي قال لي شداد الموتور اللي فوق كاوتشته مقطوعه .. قلت له بس الميكانيكي قال لي بس ده مش عليه حمل .. قال لي ازاي و بتاع .. وقعد يكلمني عن التشخيص الصحيح للعطل .. عندك يا عم أمير؟ .. عندي جديد .. غيره يا سيدي.
المهم غيره .. نفس الرجه .. قال لي روح لبتاع شكمانات يبص لك عليها .. رحت (و امير جه معايا) و استنيته .. كان شغال في عربية مرسيدس كانت مسروقه من صاحبها و رجعت له ناقصه الكراسي و الشكمان و كل حاجه .. المهم بص .. قال لي الشكمان زي الفل .. رجعت لأمير قال لي استنى هيثم يبص لك عليها .. هيثم جه قال لي مش شايف قدامي و تعال بكره و بتاع .. و انا أصلا كنت تعبان جدا و كل شويه يكلموني في البيت و أقو لهم خلاص جاي أهه و انا لسه في الحرفيين فمشيت .. بس للأمانه أمير حاسبني على تمن الشداد بس عشان المشكلة متحلتش.
المهم واحد صاحبي امبارح ركب العربية قال لي كبر دماغك .. دي مش باينه .. قلت له أنا عاوز أبيع و مش عاوز حاجه تكون في العربية .. قال لي محدش بيبص على الحاجات دي ولا بيلاحظها .. انت اللي حساس شوية .. بس هي الرجه ملحوظه.
انا احتمال كبير أروح لصابر النهاردة ان شاء الله بعد الشغل يبص لي عليها.
تفتكروا دي ممكن تكون من ايه؟ يعني ايه الحاجات اللى تخلي في رجة خفيفة على n ... و بتزيد على ال d و ال r .. وبتزيد أكتر مع تشغيل التكييف؟
