ارجوا المساعدة صوت تكتكه عالي جدا وبعدين العربيه عطلت
السلام عليكم ورحمة الله وبركاتة
بشكركم على المنتدي الرائع وعلى الاعضاء المميزين اللى بيساعدوا الكل
ويارب الاقي اللى يساعدنى ويقولى اعمل ايه بالظبط لانى محتار جدا
الموضوع ابتدى انى كنت راجع من مشوار كبير
وفجأة لقيت الغيار الرابع بينطر
كل ما اجي على الرابع وامشي شويه صغيرين الغيار ينطر
حصلت اكتر من مره
لحد ما خوفت امشي عليه تانى
ابتديت امشي على التالت
وفضلت ماشي عليه مسافه كبيره جدا
لحد ما مؤشر السخونه جاب ان العربيه سخنت جامد جدا
نزلت ووقفت لحد ما العربيه ريحت شويه وبعدين حطيت ميه فى الرادتير
وبعدين مشيت مسافه كويسه طبعا على التالت
بعد شويه حوالى 10 كيلو لقيت صوت تكتكه فى الماتور عالي جدا جدا جدا
كأن صوت حاجة بتخبط جوة الماتور او صوت تروس بيخبط في بعض
طبعا انا كنت فى صحرا فكان لازم اكمل مكنش ينفع اقف
لان الحته اللى كنت فيها مفيش عربيات بتقف لحد
فقكملت بيها وهي كده والصوت عمال يعلي
لحد ما لقيت العربيه بطلت خالص ومرديتش تدور
كأن البطاريه نايمه
حاولت ادورها لكن بدون فايدة
اتمنى من الاعضاء تنصحني وتقولى اعمل ايه
لان عارف انى ممكن اروح لمكانيكي ممكن يقولى حاجة كتير او يبهدل الدنيا
فأتمنى انكم تساعدونى وتقوليلى ممكن يكون حصل ايه كده
وممكن تتكلف كامل فى حدود كام يعني تقريبا او تخمين علشان اعمل حسابي
والف شكر على تعاونكم
