عودة اضراب سائقي ميكروباصات القاهرة والجيزة

**Karim_Monir** · 02-10-2012 03:12 PM

إضراب جزئي لسائقي الميكروباص للمطالبة بإلغاء المخالفات ووقف زيادة "الكارتة"

نظم سائقو سيارات الأجرة الجماعية "الميكروباص" صباح اليوم إضرابا جزئيا في القاهرة والجيزة للمطالبة بإلغاء قيمة مخالفات متراكمة من العام الماضي ووقف زيادة مقررة لرسوم تحصلها المحليات على النقل الجماعي الخاص تعرف باسم "الكارتة"، ما تسبب في زحام أمام مواقف النقل الجماعي.
وقال خالد الجمصي رئيس النقابة المستقلة لسائقي الميكروباص بحلوان (تحت التأسيس) إن السائقين لجأوا للإضراب بعد فشل مفاوضات استمرت أكثر من أسبوعين مع السلطات المختصة.
وعلق مئات من سائقي الميكروباص -وهي وسيلة نقل لخاصة- إضرابا نظموه الشهر الماضي في خمس أحياء بالقاهرة على الأقل بعد موافقة السلطات على بحث مطالبهم.
ولاحظت "أصوات مصرية" التزاما متوسطا بالإضراب في حلوان، وقال سكان في أحياء دار السلام والمعادي والبساتين إن السائقين أضربوا هناك أيضا وامتنعوا عن نقل الركاب.
وقال أشرف سيد -سائق- إن مخالفات العام الماضي سجلت عشوائيا على الأغلب، موضحا "في 2011 مشفناش عسكري مرور في الشارع"، وطالب كذلك بإلغاء زيادة "الكارتة".
وشهد شهرا يناير وفبراير 2011 صدامات واسعة بين الشرطة والمواطنين خلال الانتفاضة التي أطاحت بالرئيس السابق حسني مبارك والاضطرابات التي أعقبتها، وتراجع وجود الشرطة غثر ذلك في الشوارع بشكل كبير.
وقال خالد الجمصي إن الإضراب يعد بديلا عن رفع تسعيرة الانتقال "الأجرة"، وأن السائقين لا يريدون الإضرار بمصالح المواطنين.
ولكن محمد طه -طالب- قال لـ"أصوات مصرية" إن الإضراب تسبب في تعطيله وآخرين، وقال "البلد بتتعدل وهما عاوزين يبوظوها تاني".
وقال الجمصي إن مسؤولين اتصلوا بممثلي السائقين أمس وعرضوا تأجيل دفع المخالفات لمدة شهر مقابل إلغاء الإضراب، وأكد رفض ممثلي السائقين مؤكدين على مطالبهم بإلغائها.
والتقى اللواء حسن البرديسي مدير مرور القاهرة ممثلين عن السائقين في مواقف للميكروباص بالقاهرة -بينهم الجمصي- حيث طلب منهم تشكيل لجنة من 10 أفراد للتفاوض حول مطالبهم، وقال الجمصي غن المفاوضات انتهت دون اتفاق.
ولم يتسن الاتصال على الفور بمسؤول في مرور القاهرة أو الإدارة المحلية للتعقيب.

عن اصوات مصرية

**SYD** · 02-10-2012 04:04 PM

شكرا استاذ كريم علي نقل الخبر

بس مش المفروض الأضرابات والأعتصامات اللي بتوقف سير العمل داخل الدولة ممنوعة ؟؟؟

وبعدين مفيش دخان من غير نار

ازاي يعني كل المخالفات عشوائية وجزافية ؟؟؟؟؟
علي اساس ان السواقين ملايكة والظباط مفتريين ؟؟؟؟؟

هما ما بيشوفوش شكل عربياتهم ؟؟؟؟

جربت حضرتك تركب الميكروباص الكيا ال8 راكب وهو متعدل ل 12 راكب ؟؟؟

طب حد جرب الميكروباص اللي مستبدلين الكراسي (الأسفنجية) الأصلية بالكراسي المعمولة من شاسيه حديد وبدل التنجيد معمولة خشب ؟؟؟؟؟

طب بتشوفوا الميكروباص اللي حاطط بدل الموتور والشكمان عربية بطاطا مدخنة الشارع كله

طب شوفوتوا الميكروباص اللي السواق ماعوش رخصة

طب شوفتوا

طب شوفتوا
طب شوفتوا
طب شوفتوا

كمية مخالفات لو الظباط دققوا فيها هيعدموا السواق وصاحب العربية واحتمال الركاب كمان

يا جماعة حرام والله
حرام والله
حرام والله

الحجة بتاعة زمان خلاص فكست
حجة ان الظابط بيستقصدك - خلاص مالهاش وجود النهاردة
الظباط لو دققوا في كل كبيرة وصغيرة وبطلوا قلبهم الحنين مفيش ولا واحد في مصر هيمشي برخصته في جيبه

احنا بنستهبل والسواقين مش بيسوقوا عربيات دوول سايقين فيها

معلش انا أسف علي طريقتي في الكلام
بس دمي اتحرق لما قريت البوست

تحياتي

**Karim_Monir** · 02-10-2012 04:07 PM

وانا اكتر منك والله
رغم اني ربنا ميسرلي سيارة الا اني لما ركبت ميكروباص ونوعا ما كويس باللي بتقوله اشفقت على اللي بيركبوه كل يوم

**SYD** · 02-10-2012 04:14 PM

المشاركة الأصلية كتبت بواسطة karim_monir

وانا اكتر منك والله
رغم اني ربنا ميسرلي سيارة الا اني لما ركبت ميكروباص ونوعا ما كويس باللي بتقوله اشفقت على اللي بيركبوه كل يوم

والله يا استاذ كريم انا ركبت الميكروباص 6 شهور متصلين لما عربيتي كانت عاملة حادثة السنة اللي فاتت
كنت متضرر من الميكروباصات اكتر من تضرري وزعلي علي عربيتي

ناهيك عن الميكروباصات الكبيرة (الميني باص ال26 راكب) بشكله العفش واخلاق السواق واخلاق التباع (اللي بيلم الأجرة) والكراسي المتهالكة واحيانا من غير زجاج خلفي وشبابيك جانبية في عز الشتا وناهيك عن عدم وجود فوانيس - كانوا بيركبوه او بيحملوه فوق ال55 راكب (ستات علي رجالة علي عيال علي بياعين)

لذلك انا النهاردة - لو العربية بتموت تحت رجلي - بردو بركبها حتي لو رايح اخر الشارع اشتري علبة كبريت

لا

دة استهبال رسمي فهمي نظمي

**mbx4e** · 02-10-2012 04:48 PM

معلش انا مش معاكو
وازمة الجاز اللي بقالها اكتر من 15 يوم؟؟؟؟؟؟؟
الناس دي ناصحه وفرت عربيتها وعملوا اضراب عشان مايعملوش مشاكل مانتوا لو شفتوا سواق المهنيه الجاهل وهو بيمتحن امتحان الاشارات بتاع الرخصه المهنيه ومش عارف يجاوب وبدل مايجي بعد اسبوعين تلاته ولا شهر ولا 3 شهور زي مايشاع لا دا بيدخل مره ويسقط و ورقه يتقطع ويرجع يخش كمان 10 دقايق للمره التانيه (طبعا بعد مايغمز البيه الواقف بريال ولا بريزه ولا حتى يتحايل شويه عليه ) ويسقط وممكن يخش للمره التالته هاتعرفوا ان العيب في اللي بيطلع رخص سواء بالرشوه او التعريض ( طبعا دا غير البيه اللي متوصي عليه بكرت تبع محسن بيه الشنكوتي او مزبط مع البيه الظابط باي شكل طبعا دا مابيخشش امتحان الاشارات اساسا واحيانا مابيعديش على العملي دا كمان ممكن الكاميرا تجيله وهو بيشرب اللمون مع الباشا عقليه المرور والامن المصري عمرها ماهيتغير ..... انسى ياعمرو)
وكذلك عند ترخيص العربيه المفروض يستخدموا اجهزه تكشف عن نسب العوادم
هاتعرفوا ان العيب في السيستم واللي بيحطوه واللي بيشغلوه مش في اللي بيتعامل معاه ويعرف يعدي منه

**hugan** · 02-10-2012 10:26 PM

انا عندي قناعه 100*100
ان الناس دي في حد بيحركها
فوضي شامله في كل قطاعات الدوله عايزين يخربوها
حتي سواقين الميكروباص اللي عايزين الحرق بجاز
فاهمين في الاضرابات والاعتصامات
يعني اطباء وسواقين ميكروباص في يوم واحد
ايه متفقين علي ميعاد واحد

**SYD** · 03-10-2012 02:23 AM

المشاركة الأصلية كتبت بواسطة maheralsisi

اللي انت كنت فيه السنة اللي فاتت انا فيه دلوقتي و هاجاول اكون مؤدب و ماشتمش بس بجد تيت ام اللي بيطلع رخص مهني اساسا
كله بالفلوس و انا شايف ان الاضراب ده مالوش اي لازمة غير استغلال الوضع فقط لان دول اساسا اوسخ فئة ( بعد سواقين التوكتوك ) عيل معفن بفردة شبشب واحدة و نضارة نص شمس ( نص شمس مش العدسة ده لان النضارة بعدسة واحدة و التانية واقعة ) و بنطلون جنز مقطع ع الموضة وواقف ع الصبح بيصطبح بسيجارة الحشيش و يتنك علي خلق الله
(العربية اربعات يا افندية ) و يركن مكان ما هو عاوز و يقف في نص الشارع يرغي مع اللي جاي في المقابل و ممكن بسبب العربية و ينزل يجيب اكل و ياكل في المطعم و بعدين يدخل ع القهوة يعمل الشاي بنفسه كل ده بعد ما حمل و مشي و انت جوة و بسبب العربية في اي مكان و انت لو سايق وراه تبقي انت اللي غلطان ( ايه اللي مخليك ماشي ورايا ) و لو سايق قدامه يجيلك طرش من صوت الكلاكس اللي مش بيفصل
بس طبعا فيه ناس مضطرة ماهو مش كل يوم تاكس ده خراب بيوت مستعجل
ده غير طبعا انك هاتلاقي ده انعكس ع التاكسيات بالزحمة و التناكة برضه

و الله انا شايف ان و لا حد يسال فيهم و هم هايرجعوا تاني لما يلاقوا حالهم وقف
و شايف ان فيه حلول تانية
1- الجيش يشغل و يعوض باتوبيساته زي ما عمل ايام اضراب الهيئة
2- المواصلات البديلة المتاحة مترو اتوبيس كده يعني
3-بالنسبة للملاكي و انت رايح الشغل و وانت راجع شوف مين اللي جنبك اللي ممكن تاخده في طريقك رايح راجع (طبعا هنا في مصر عاداتنا بتقول عيب بس اظن ان في الدول الاوروبية بيقتسموا تكلفة الوقود ) لكن بما انك كده كده هاتركب العربية و هاتحرق بنزين مش فارقة بقي
عرفتوا بقي ليه كل الناس دلوقتي بتجيب عربيات
عشان الاشكال الضالة اللي الواحد بيتعامل معاها

كلامك سليم بس للأسف - فعلا الناس بتحتاجلهم
انا لسة امبارح راكب ميكروباص (محطة واحدة فقط) بس لأني بجد كنت علي أخر الليل مش قادر اسوق وزهقت من عدم وجود ركنات واولاتي ودبرياج واطلع واقف
واسوء عادة فيهم - لما يغلوا الأجرة بدون مبرر
حاجة تقرف