الموضوع: عمل خيري ايجابي لمن يحب المشاركة-كريم منير

السلام عليكم ورحمه الله
كنت قد قرأت عن استعداد بعض الاعضاء للقيام بعمل خيري او تطوعي
وحسيت برغبة حقيقية لذلك لذا اسمحولي اعرض عليكم بعض من الاعمال التطوعية التي اشارك بها منذ فترة طويلة عسى ان اجد من يحب ان يشارك بها ابتغاء وجه الله يوم لا ينفع مال ولا بنون الا من اتى الله بقلب سليم
انا مدير لجروب الوفاء والامل وهو جروب خيري علي الياهو يختص بمساعدة كبار السن والمعاقين داخل جمعية الوفاء والامل بمدينة نصر لرعاية كبار السن والمصابين بحوادث اقعدتهم من الشباب والاطفال المعاقين ذهنيا مما لا يستطيعون التواصل مع الاخرين
والموضوع كله خيري وود وكنا من فترة بنعمل زيارات جماعية لكن دلوقتي كل واحد ليه اتنين او تلاتة بيزورهم ويطمن عليهم لكن من وقت للتاني بنعمل لهم رحلات جماعية ترفه عنهم

ده نشاطي الاساسي-لكن العمل الخيري ماتقدرش تقول انا بعمل حاجة واحدة
يعني بشرف علي جمع كفالات لايتام واسر-اجراء عمليات لغير قادرين-تزويج فتيات يتيمات-فك كرب عن مسلمين وهكذا

في كمان جروب المنار وده مديرتة زميلتنا مهندسة منار عقل ودي احد اعمدة الخير في هندسة عين شمس ومؤسسة اسرة المنار
منار ليها نشاطات كتير قوي (اطعام للفقراء-بناء دورات مياه في بعض القري شديدة الفقر زي عرب الترابين وعزبة الهجانة-والنشاط الكبير ليها والاساسي هو
جمع الملابس المستعملة من كل الناس وتصنيفها وتوزيعها علي الفقراء والمساكين وما يتبقي منها تقوم بعمل معارض خيرية في امكان شديدة الفقر لكي تباع لناس محتاجة لكن (لا يسئلون الناس الحافا يحسبهوم الجاهل اغنياء من التعفف ) ناس بتتكسف حد يديها حاجة ببلاش لكن تشتريها بتمن علي قدها-قميص ب 3 جنية او 5 جنية بنطلون ب 5 جنية-جيبة ب 5- جنية وهكذا تقوم بجمع اموال بسيطة تصرف منه علي مشروعاتها خيرية

انا بطلب منكم النهاردة طلبين
الاول كل اللي عندة هدوم قديمة يفتح دولابة واكيد هاتلاقي قميص او بنطلون او بلوزة عند مراتك او حتي جلابية او هدوم لاودك صغرت
يا ريت نجمعها-اطلب من قرايبك مش عيب من اخواتك-من والدك ووالدتك -عايزين ننزع السلبية من حياتنا ونكون ايجابيين
عمرو خالد لما عمل حملة المليون قطعة ملابس عشان خاطر فقراء العالم العربي لم من مصر 4 مليون قطعة في 3 اسابيع وده رقم انا متاكد منه عشان كنت واحد من شرفين المشروع
كمان بتحتاج ورق الجرايد او الكتب الدراسية القديمة عشان اعادة تدويرها وتبيعها وتستفيد من العائد-هو المخزن في مدينة نصر في الحي السويسري وقريب قوي هاجيبلكم العنوان عشان انا اعرف شكلا

(ملحوظة : الحاجات دي رايحة لله مش ليا او لحد تاني والسيدة عائشة رضي الله عنها كانت بتعطر الدرهم قبل ان تضعه في يد الفقير لانها تضعه في يد الله-يعني ماتطلعش حاجتك المقطعة البمهدلة ولا ماتكونش مغسولة ولا ولا عشان القائمين علي الفرز والله بيصابو بامراض عديدة نتيجة لتطوعهم-وزي ما شوفنا ناس جايبة هدوم مقطعة ماتنفعش هلاهيل-شوفنا ناس غسلالاها وكاوياها وحاطة كل قطعة في كيس ومعطرينها كمان-اه والله-(وما عند الله باق)

الجزء التاني بقي وده الاهم ان عايزين نعمل قاعدة بينات للناس اللي عايزة تشارك بسيارتها لان كتير قوي بتبقي في ناس بتتصل وعندها هدوم وبيبقوا سيدات او او ومش قادرين يتحركوا وعايزين حد يروح ياخدها منهم واحنا ماشاء الله كلنا معانا سيارات يعني لو عملت مشوار خير وجبت الهدوم من مكان وديتة المخزن هاتكون خدت ثواب كل واحد استفاد بقطعة الهدوم دي-تخيل بقي الثواب
وما شاء الله اول واحد عملها لاني كنت مسافر وماكنش في حد يلم مكاني كان محمود حفناوي جزاه الله كل خير جاب الهدوم من ناس ووداها المخزن وخد الثواب مني

اللي عايز يشارك معانا في موضوع جمع الهدوم هايحط في الموضوع ده

http://www.nilemotors.net/Forum/view...?p=29752#29752

اسمه ورقم تليفونة الموبايل والارضي لو امكن ومكان سكنة ومكان عملة عشان نشوف بيغطي اماكن ايه والايميل بتاعه كمان لسهولة التواصل
وهايلاقيني انا او انسة منار بنكلمة نقولوة في هدوم عايزينك تجيبها ومكانها كالاتي تقدر ولا لاء
الموضوع تطوعي بحت يا جماعة
يارب اكون فيدتكم
اخوكم في الله
كريم منير
ربي لا تجعلني جسرا يعبره الاخرين الى الجنة ويهوى بي في نار جهنم