الموضوع: لمحبي سيارات الخدمة الشاقة و الدفع الرباعي ...

بص العربية الرانجلر المعدله ديه شوفت زيها عند كارفور العربيه ديه بنظرتك كده متكلفه كام عشان توصل للشكل داه. الصور فى اللينك داه
صور جيب رانجلر معدلة | تموز دوت كوم

المشاركة الأصلية كتبت بواسطة jit_service

مع كامل إحترامي وتقديري لكل مشاركتكم وتعليقاتكم إنما والله يا جماعه الكلام ده مالوش وجود بالطريقه دي إلا في مصر بسبب أسعار العربيات العبيطه اللي جماركنا الحلوه وحكومتنا بتعليها بسبب الضرائب والرسوم
ما فيش أفضل من إن العربيه تكون على ابوها من الألف للياء
وأكيد مليون في الميه لو اللي صنعها كان يقدر يعدل فيها فيها حاجات كتير لو هيا محتاجه تغير أو تعديل إنما هندسة التصميم ليها متتطلبات وخامات ومقاسات لكا حاجه في العربيه سواءا للإتزان او إستهلاك البنزين حتى لمقاومة الهوا إثناء السير كل دي حاجات يا جماعه مينفعش نتجاهلها
وطالما المصاريف عاليه جدا زي ما إنتو بتقولو يبقى إيه فايدة التعديل ما نشتري اللي متقفل بفابريكته ونخلص ولا هوا وجع دماغ وخلاص دحنا بيطلع عنا وبنبقى عاصرين على نفسنا طن لمون وإحنا عند الصنايعي لحد ما يتكرم عليك ويبص على عيب عربيتك وإنت وحظك يا يقلبك لانه مش فاضي أو يعكهالك لو هوا مش فاهم وتخش في دايره من أول وجديد مع سلسلة مشاكل مش عارف هتخلص لحد فين
أسف يمكن راي ما يعجبش القارئ بس بجد ما فيش اوسخ من الذل عند الصنايعيه عشان يطلعولك شغلك مظبوط
ما بالك بقه وانت بتبني عربيه من اول وجديد

انا مش متفق مع كلام حضرتك
فيه متعة خاصة و انت بتضفى تعديلك على حاجة انت بتستمتع بيها .... زى عربيتك
و كمان ممكن تجد متعة اكتر لما تواجهك مشاكل و صعوبات ... و تتعلم ازاى تتغلب عليها
فيه ناس فى بلاد برة ..... بيعدلوا عربياتهم .. و اعتقد انهم قادرين على شراء عربيات جاهزة .. و فى الغالب التعديلات الى بيعملوها مش بتكون فى مواصفات الفابريكة ... و بتكون عربيات ناجحة جدا ... جرب حضرتك تتفرج على فيديوهات فى اليو تيوب على تعديلات العربيات ... و خاصة تعديلات عربيات الدفع الرباعى
و يا سلام ..... لو انت الى بتعدل بنفسك .... متعة مختلفة تماما
انا نفسى اعمل كل التعديلات الى قالها مينا فى عربيتى ... و بنفسى بدون استعانة بصنايعية ... بس ده شبه مستحيل
مينا من كتر ما لف على الصنايعية .... عرف مين الكويس و مين الى ينفع يعمل الحاجة دى و تكلف كام .... و كمان نشترى قطع الغيار من فين

انا متفق معاك ان اغلب الصنايعية ... ايديهم تتلف فى حديد و بعدين تتقطع ... بس عليك البحث عن الصنايعية الكويسين

المشاركة الأصلية كتبت بواسطة jit_service

رأيك لازم يحترم دي وجهة نظرك وليك حق فيها إلى حد كبير جدا

بس معلش برده صنايعية إيه اللي مدن الدلتا اللي يقدروا يعدلو على مصنع ومهندسين ورسومات وتخطيط وتوزيع أحمال وتوزيع نقط إرتكاز ونقط تحميل وهندسة أبعاد الكاوتش وهندسة المسافات بين المحاور في العربيه

يا صديقي تعرف ان ممكن يكون التنك الكبير اللي انت بدور عليه ده في حد ذاته نقطه ممكن تؤدي لمشكله في العربيه او حتى تتسبب في كارثه على الطريق لا قدر الله
تنك العربيات عموما بيتم تصميمه عشان يمنع المحروقات اللي جواه انها تصطدم بجسمه من غير ما يكون لها مكان تتوزع عليه يعني بعباره اخرى ميخبطش بقوه في جوانب التنك والتعاريج اللي بتبقى في جسم التنك دي مش بتبقى ديكور دي تقويه لجسم التنك ونفس الوقت ممتص لصدمة المحروقات اللي جواه لما العربيه بتلف او تقف مره واحده
ومكان التنك في حد ذاته وعرضه وطوله دي حاجه بتتعمل بدراسه مش مجرد حط التنك وإملاه وإمشي

انا فاهم انك نفسك تعمل اللي على مزاجك بس دي بتبقى حاجه كده لمزاجك الخاص بس معلش يعني مشاكل من كل الأنواع بتفضل تواجهك وما تقوليش اصل لو صنايعي مش عارف ايه هيبقى كل حاجه تمام
يا باشا كل اللي بتفكر فيه اللي صنع العربيه فكر فيه وأكتر شويتن تلاته اربعه بس لما تم تصميم الشكل وإعتمده المصنع يبقى لازم تعرف ان الشكل ده ما ينفعش يتعدل في اساسه حاجه تاني ممكن تلعب في الشكل الخارجي زي ما انت عايز انما اساسيات اعتقد انسى انك ممكن تضاهي المصنع

على فكره انا مش بقول الكلام ده وانا ما بظبطش في عربيتي بالعكس دا انا من هواة الإختراعات بس انا ببقى عارف انها كلها مسكنات العربيه لما كل حاجتها بتبقى فيها بتبقى إعتماديه وما يتخفش منها

تقبل تحياتي

السلام عليكم

انا مش بس بحترم رايك و وجهة نظرك .... انا كمان بحترم حسن اسلوبك للحوار و رقيه من حضرتك
ان شاء الله كدة دائما ربنا يديم المعروف

اما عن الصنايعية و التعديلات ..... انا اتعاملت مع حداد فى حتة ريفية بسيطة ... عجبنى دماغه جدا ... الراجل مش بيعدل و لا بيقول انا عبقرى و حغيرلك العربية و الكلام ده ... الراجل بسيط جدا فى كلامه و ماهر جدا فى صنعته ... انا اعترضت على حاجات كان بيعملها ... و هو كمان اعترض على حاجات انا قلتله عليها و انا فهمت وجهة نظره

كنت بتعامل مع ميكانيكى اسمه محمود توفيق فى العمرانية .... معلم .. عبقرى
وجدت عنده عربية واحد زميلنا .... كان بيرفع جسم العربية عن الارض ( شيفروليه تاهو ) ... و كان جايب واحد بتاع عفشة و بيوريه يعمل ايه ..... انا اتفرجت على العربية بعد كدة ... كنت فاكرها همر .... و فى المشى كويسة جدا ... بس توازنها اصبح اقل

انا عاوز اقول لحضرتك ان فيه صنايعية فى الاقاليم ... معلمين فعلا .. و اسعارهم رخيصة و تعاملهم كويس جدا ... بس دول قلة قليلة مندسة :)

كلام حضرتك عن التانك انا مقتنع بيه تماما ... و فعلا ممكن التانط ده يكون ازمة ...
اتكلم عن نفسى ..... انا رحت اشتريت تانك تانى زى الى راكب فى عربيتى بالظبط بالعوامة بتاعته .. و كنت حروح للحداد ده اتشاور معاه .. فين انسب مكان ينفع يتركب فيه .... و ان شاء الله حنحافظ على التوازن مع التانك الاصلى

التعديلات الى انا اقصدها ... مش بتيجى ناحية اداء العربية اوى ( انا اعتقد كدة ) ....حديك امثلة للى نفسى اعمله فى عربيتى من تعديلات على سبيل المثال :-

عمل قفص حديد خارجى لحماية العربية لو اقلبت لا قدر الله .... يعنى لو العربية اقلبت تحمل وزنها على القفص الحديد ده و متحملش على الصاج ... ده حيزود وزن العربية شوية و يزود حجمها ( الى هو مش ناقص اصلا )

تغيير الكارونة الامامية و الخلفية و استبدالهم بكوارين لوك ..... الى هى الكوارين الى بتخلى العجلتين يلفوا مع بعض فى بعض الاحيان ( اوتوماتيك ) او عند الحاجة ( مانيوال )

تركيب تانك بنزين زيادة .. و زى ما قلت لحضرتك حيكون زى التانك الى راكب فى العربية

لما ربنا يكرمنى بفلوس ان شاء الله ... كنت عاوز اسقط ماتور ديزل 8 سلندر ... عربيتى ليها موتور ديزل بينزل على بعض موديلاتها

انا عن نفسى بحب العب فى عربيتى ... لما بيكون معايا فلوس و وقت

انا سعيد بالنقاش مع حضرتك

موضوع جامد جدا