الموضوع: لمحبي سيارات الخدمة الشاقة و الدفع الرباعي ...

صباح الخير عليكم جميعا :)

الموضوع ده مخصوص للناس اللي بتحب عربيات الدفع الرباعي...والعربيات العالية و اللي بتمتاز بالقوة و المتانة في مختلف ظروف التشغيل و على مختلف الطرق

و الناس ديه كذا نوع....

فيه اللي بيحب العربيات ديه عشان خاطر محتاجها لدخول الصحرا الرملية -شغل أو هواية - و ده بيكون عايز موتور قوي (ميقلش عن 6 سلندر) كشرط أساسي مع وزن مش تقيل للعربية و عفشة متوازنة ...

و نوع تاني بيحب العربيات ديه علشان شغل و بس.... زي السماسرة و المقاولين و الناس اللي محتاجة تشيل عدة تقيلة معاها و تمشي في مدقات.....
و ده مش بيفرق معاه أن الموتور يكون 6 من 4 سلندر... مجرد أنه يكون شايل العربية و الحمولة اللي فيها بشكل متوازن و خلاص....

و نوع تالت بيحب العربيات ديه.... و هو لا هيشتغل بيها و لا بيهوى الصحرا.... بس مجرد عايز عربية جامدة تتحمل معاه مطباتنا الحلوة ... و كمان عشان ميبقاش ماشي خايف عليها من الميكروباصات و النص نقل .....


الكلام هنا على العربيات اللي مش غالية أو مش محتاجة ميزانية كبيرة عشان تشتريها.....
زي النيفا - و الرانجلر القديم - الجي ام سي (بليزر)

أنا شخصيا و مع احترامي للنيفا كعربية... بس مبحبهاش لأنها على شاسيه علب... مش فردتين شاسيه

أما الرانجلر و الجي ام سي.... فالشاسيه بتاعهم فردتين (زي العربيات النقل و كل عربيات الخدمة الشاقة)

مشكلتهم الوحيدة.... هي قطع الغيار الغالية.... و استهلاك البنزين العالي جدا (الرانجلر 6 سلندر 4100 سي سي و الجي ام سي 8 سلندر 5700 سي سي)

و الكلام على العربيتين دول تحديدا.... لأني كنت كتبت مسبقا عن موضوعين مختلفين لتسقيط موتور ديزل لعربية رانجلر و التاني كان لعربية جي ام سي بليزر

المشكلة الأساسية أن الناس واخدة فكرة غلط عن العربية التجميع.... يعني أي حد يسمع عن عربية تجميع.... ييجي في باله علطول العربيات اللي بتشتغل بالنفر بين القرى في الأرياف و على أطراف القاهرة....

و دية أكيد مش فكرة صح.... لأن التجميع بيكون حسب الخامات و الشغل اللي هيتعمل بالعربية.... فأكيد اللي بيجمع حاجة لمزاجه غير اللي بيجمع حاجة عشان يشتغل بيها

أهم شيء يتعمل في تجميع العربية... انه يتعمل صح... يعني لو جبت موتور.... أجيبه بالفتيس و آلات الجر كاملة.... و أقعده بنفس الطريقة اللي كان قاعد بيها في العربية الأصلية...

و تترمي الضفيرة اللي في العربية و تتفصل ضفيرة جديدة.... (مش يتعدل على الضفيرة القديمة زي ما ناس كتير بتعمل)

و العربية تتفصص جزء جزء كسمكرة و كدهان و يتم معالجة أي بارومة... و تترش من فوق و من تحت و برا و جوا (كأنها بتتصنع من جديد) و كذلك الشاسية.... يترش كله.....

كل ده بيتعمل عشان العربية تبقا اتجددت من الأول.... و كل النقط اللي فيها اتراجع عليها..... بحيث بعد ما تخلص.... تبقا كأنها موديل السنة (موتور بفتيس و آلات جر جديد - رادياتير جديد - ضفيرة كهربا جديدة - دهان كامل لجسم و شاسيه العربية - فرش داخلي جديد)

و التكلفة أكيد هتكون عالية.. بس في مقابل كدا.... العربية هتكون فيها مميزات الزيرو.... و متانة القديم

المهم في كل ده الصنايعية اللي هتشتغل... و الخامات اللي هتستخدم.... و بالتأكيد عملية زي ديه هتاخد وقت طويل جدا.... و هتكون عايزة صبر.... و خبرة....

الموضوع مفتوح للنقاش..... و اللي يحب يسأل عن أي تفاصيل لأي مرحلة من المراحل.... :)

أتمنى أكون أفدتكم

يوم سعيد ليكم جميعا.... :)