الموضوع: بنزين 80 خلاص اتمنع ولا ايه

المشاركة الأصلية كتبت بواسطة ahmed1981

وفي الحالة دي
لما تركب مع تاكسي مشوار ب 5 جنيه ويطلب منك 10 جنيه يبقى حقه
لأنك إضطريته يدفع ضعف ثمن البنزين يبقى ياخد ضعف الأجرة

في نسبه كبيرة جدا من سيارات التاكسي لم تتأثر بزياده اسعار البنزين لانها ببساطه مواتيرها غاز اللتر منه ( المتر المكعب ) ب40 قرش فقط اي ان صفيحه الغار ب 8 جنيه بس ؛ وبالتالي لاتزال اجرة بعض سيارت الاجرة التاكسي في بعض المحافظات لاتزال كما هي .
وياريت نرجع لنظام العداد تاني زي سيارات الاجرة المميزة بالقاهرة اللي بديرتها تبدأ من خمسه جنيه وتزود 1 جنيه كل كيلو وتعطي الراكب ايصال بالمبلغ المطلوب ؛ فلو النظام ده اتطبق تنتهي المشاكل بين السواق والراكب ؛ ثم من وجهه نظري ماعدش في حاجه اسمها تاكسي لان مفروض نظام التاكسي انك بتأجرة لوحده مده توصيلك اما الان فالتاكسي ميكروباص بالنفر والله احيانا نركب اربعه فيه كل واحد رايح مشوار يعني البنديرة باربعه اضعاف ؛ وسمعت ان في طنطا ان الزبون الاول يدفع الاجرة واذا حد ركب بعده يدفع اجرة مخفضه واهل طنطا ادري بها .

السبب (الفعلى) للأزمة مش هيخرج عن حاجة من اتنين:
انخفاض العرض: إما من الحكومة بهدف منعه فى نهاية الأمر، أو من محطات البنزين التى تخلطه ببنزين 90
ازدياد الطلب: تحول عدد كبير من السيارات إلى استخدام بنزين 80 مع ارتفاع ثمن البنزين 90


أنا اعتقد إن لو الأزمة دى استمرت فترة طويلة فالطلب أكيد هيقل عن طريق:
**بعض سيارات الأجرة ستتحول إلى استخدام الغاز الطبيعى (بدل ما كل يوم يقف ساعتين عشان يمون)
**بعض سيارات الملاكى ستتحول (أو ترجع) لبنزين 90 وأمرهم إلى الله عشان يخلصوا من الوقفة والبهدلة

لكن بصراحة مش متوقع إن حاجة تحصل عشان تزود العرض

ياترى حضراتكم تفتكروا إيه السيناريوهات المحتملة المتعلقة بالموضوع ده؟؟؟؟

ياجماعة موضوع البنزين 80 ده بقي مستفز جدا وفي بنزينات كتير مبقاش موجود فيها اصلا انتوا عارفين انا بعرف من قبل مادخل البنزينة لو لاقيتها فاضية اعرف ان مفيهاش 80 على طول انا لما بلاقي شارع المفروض انه عادي مقفول تماما والحركة المرورية فيه صعبة بعرف علي طول ان فيه بنزينة فيها 80 وفعلا بعد مالزحمة تنفض الاقي بنزينة واقف عندها طوابير من التاكسيات اللي منهم لله يمونوا بنزين 80 وكمان يطلبوا اجرة زيادة عشان البنزين غلي.

ده غير بقي الجديد في الموضوع ان بعد كذا يوم كل ماعدي الاقي طوابير علي بنزين 80 فاحط 90 وامشي في مرة لاقيت بنزينة عديت من جنبيها سألته في 80 قالي ايوة روحت جبت العربية من الجراج ووقفت وكان قدامي حوالي 4 او 5 عربيات مش مشكلة اهي عطلة بعطلة بقي بس افول التانك بقي بدل ماكل شوية 5 ولا 10 لتر 90 ويخلصوا في مشوار واحد وتقطع مني في الطريق.
المهم بقي لما جه دوري وبقوله فول قالي لأ معلش مش بنفول احنا بنحط 20 لتر بس لكل واحد كمان بقوا يحددوا البنزين بحصص كإنهم بيتفضلوا علينا بإنهم يدونا بنزين لعربياتنا ولا كإننا بناخده ببلاش.

انا بجد بفكر جديا اغير لبنزين 90 بسبب القرف اللي بشوفه ده كل ماجي امون

بقالي اسبوع مش لاقي 80 خالص

و خلاص اتخنقت
حسبي الله ونعم الوكيل في اللي كان السبب

انا حولت على بنزين 90 بقالى اسبوع تقريبا ...... وروحت شبرا ظبط الكربراتير وغيرت البوجيهات ... و استهلاك البنزين قل عن الاول . ال20 لتر دلوقتى بيمشونى 190 : 200 كيلو ... بعد ماكونت بامشى ايام ال80 بال20 لتر 160 كيلو بالعافيه وفى احسن الاحوال .....ولا الذل والمهانه فى طوابير عصير اللفت ال80 .

انهارده فى شارع بورسعيد فى السيده زينب شوفت العجب ... فعلا العجب !!! 39 تاكسى وعربيه واقفين فى طابور على بنزينه التعاون " اول مره اشوف فى حياتى طابور على البنزين بالطول ده " علاشان بنزين 80 ؟؟؟؟ 39 عربيه ؟؟؟؟ انا عديتهم على فكره يعنى مش بالوايم ولا بالتقريب ........ غير العربيه الى كانت بتمون يعنى 40 عربيه . فى اكتر من كده ذل ؟

أهلا يا شباب

انا ساكن جديد بمدينة 6 أكتوبر و مش عارف فين ممكن الأقي بنزين 80
رحت محطة التعاون و لما سألت ، الراجل قالي مفيش و ما بيجيش ... يعني ماتدورش

أذا حد يعرف أي محطة فيها 80 يقولي

و شكرا