استطلاع : نريد معرفة مميزات وعيوب الالتو بفئتيها ال 800 وال 1100

**نور العمر** · 05-07-2008 02:47 PM

:arghh: شاركونا الرأي والمعلومات عن الألتو حبيبة الملايين الآن
*ألوانها إيه
*سحبتها في ال800 وال 1100 cc
*التكيييييييييييييييييييي� �ييييييييف خصوصا في ال 800 cc وهل صاحب السيارة ال 800 جرب بنفسه الفرق بين التكييف فيها وفي السيارة ال 1100.
*استهلاك البنزين
*سألتو عن أسعار قطع الغيار وبكام
*طولها وعرضعا وارتفاعها عن الأرض وهل فيه فرق بين 1100 وال 800 في الحجم.
* تنصحوا إللي حيشتري الـ 800 يجيبها بالتكييف بس لأنه طبعا لا غنى عنه واللا يكبر ويجيبها فول أوبشن رغم أن الفرق في التقسيط حيسمع كتيير وهل ممكن .
يركبلها زجاج كهربا وسماعات وكاسيت برا وخلاص على مراحل ونوفر السعر.
* الـ 800 الفاضية في حد عنده مشكلة في عدم وجود باور وهل من غير الباور نعمة زي الماروتي *
* إيه أحسن البنوك بعد ناصر في الفائدة.
* أهم المميزات والعيوب ......................... وشكراً يا أصحاب الألتو

**نور العمر** · 06-07-2008 07:53 AM

الرد على هذه الاستفسارات حيساعد كل واحد عاوز يشتري ألتو . . ومتخافوش السعر المفروض إنه مش حيزيد بالشكل إللي يخوف لأن في تدابير احتمال تحصل قريب على جمارك السيارات... المشكلة في جشع التجار بيترجموا كل الأحداث لصالح جيبهم وهي دي سمة التجارة في مصر المحروسة

**نور العمر** · 06-07-2008 08:04 AM

معلش انا عارفة إن اسألتي كتيير . بس قرار شراء عربية زيرو بالنسبة لي قرار صعب مش عاوزة إجيب عربية واندم غني جبتها ودي مش زي الموبايل تتغير بسهولة ، وكمان أنا تقريباً حضع فيها كل إمكانياتي + فائدة التقسيط . . ومعايا اطفال عاوزة احفظهم وأطمن عليهم في سيارة آمنة مكيفة مريحة . . . فرص لفي على المعارض ضعيفة جداً الآن .. عشان كدة بسألكو ..
مرسيي يا نايل موتورز

**zalpany2000** · 06-07-2008 01:58 PM

استاذة ريهام انا هبدأ في اجابة الاسئلة اللي اقدر عليها
مبدأيا انا حاجز ألتو 800 كاملة فضي، وفي انتظار الاستلام... يا معين

1- الالوان المتاحة عند الوكيل
- الفضي: اتنصحت بيه قالو انه بيعكس الشمس و مش بيتبهدل بسرعة واحسن في إعادة البيع
- الازرق: لون جميل بس فيه صحابي كتير ما نصحونيش بيه مش عارف ليه بس هو عاجبني جدا
- الاحمر: و درجة الاحمر دي شكلها من رأيي بناتي اكتر لانه مش الاحمر النبيتي
- الاسود: و طبعا ده الملك بس اللي يقدر علي نضافته وصيانته علشان الاسةد مقرف في الحفاظ عليه

طبعا فيه ألوان تانية بس الوكيل ما نزلهاش
زي الأبيض - الأصفر - النبيتي
و دول موجودين علي الموقع بتاع السوزوكي ألتو
http://www.marutialto.com/

2- قطع الغيار
قطع الغيار بتاعتها غاليه نسبيا بس اللي يطمن انها انخفضت كتيير الشهر اللي فات علشان الوكيل نزل دفعة من قطع الغيار
ما زالت برضو اعلي من المتوسط بس متوقع انها تنزل تاني مع الدفعة اللي جايه غير انه قطع الغيار الصيني بتاعتها ما نزلتش لسه وموديل السنسن اللي قبلها كانت اسعاره قليلة نسبيا
و فيه موضوع عن اسعار قطع الغيار الخاصة بالألتو في القسم ده
http://www.nilemotors.net/Nile/showt...DD%C7%E4%E6%D3

3-بالنسبة للأبعاد بتاعتها برضو هاتلاقيها بالظبط علي السايت اللي انا كاتبه فوق، بس الملاحظة اللي شديتني للعربية انها مش واطية علي الارض و بالتالي مش هاتحك في المطبات يمكن ده يفرق في ثبات العربية مع السرعات العالية، وطبعا احنا مش بنشتري عربية سباق. يبقي ارتفاع العربية افضل من الثبات.

4-استهلاك البنزين
افتكر ما ينفعش يبقي فيه عربية بتستهلك بنزين اكتر من كده ، انا لما سألت استاذ ميدو عن الاستهلاك قال انه تقريبا 390 كيلو في الصفيحة، و ده طبعا معدل جميل جدا

5- التكييف
مش عارف بس لما سألت في الموضوع ده هما اقنعوني ان حجم العربية صغير و كمان التحميل علي الموتور مش هايبقي كبير ، طبعا لو 1100 يبقي احسن طبعا بس ال800 مش وحش ابدا، خصوصا ان الفرق بين الكاملة 800 و الكاملة 1100 بتاع 8000 جنيه

6- التقسيط
انا مقسط مع بنك اسكندرية بدون مقدم علي 7 سنين بفايدة 7.2
بس طبعا حولت مرتب الجامعة عليهم و ده لازم ، كمان كملت بإثباتات دخل تانية علشان لازم يبقي القسط لا يتجاوز 50 % من المرتب، و بصراحة بعد طول حيرة بنك الاسكندرية من انضف البنوك اللي ممكن تقسطي معاها ، غير ان الفايدة دي مافيش حد بيدي فايدة اقل منها غير بنك ناصر، و ما ادراكي ما ناصر

اتمني اكون افدتك
تحياتي

**zalpany2000** · 06-07-2008 02:12 PM

اسف في البنزين انا اقصد اقول اقل من كده

العربية استهلاكها لا يذكر ارجو من الادارة التعديل للمشاركة

تحياتي

**نور العمر** · 11-07-2008 09:33 PM

ألف شكر فعلا معلوات مفيدة وأنا إن شاء الله حتعامل مع بنك الاسكندرية بردو بس أنا زعلانة قوي من غلو الاسعار ده مشكلة بالنسبة لي
أمري لله بقى

**نور العمر** · 11-07-2008 09:34 PM

وأنا إن شاء الله برشح اللون الفضي لأن الالوان الثانية مش عجباني وأتمنى ينزلو اللون الذهبي

**نور العمر** · 12-07-2008 12:02 PM

والله العظيم جالي اكتئاب من العربيات كلها

**zalpany2000** · 12-07-2008 03:44 PM

ليه بس يا استاذة ريهام ؟؟
ليه الاكتئاب
انا فعلا سمعت ان الاسعار رفعت تقريبا 2000 او 3
هو ده السبب ؟؟؟؟

**نور العمر** · 12-07-2008 05:55 PM

طبعاً أنا عمالة أحوش عشان أقرب لأقرب مبلغ مناسب يخللي الباقي قسط هين ومش عارفة ألاحق والأسعار بتزيد مرة بنزين ومرة سعر العربية . وبصراحة أنا مش حلمي عربية 800 صغيرة كدة أنا عاوزة عربية مريحة أبقى مبسوطة بيها زي ( الماتريكس )بس الامكانيات بتحكم والالتو كانت احسنهم شكلا وسعرا دلوقتي خلاص مبقتش فارقة ممكن افكر في الشانا بيني أو السبرانزا الهاتش باك أو الشيري بلاس الجديدة قوة في الموتور وكماليات وأوسع وصيني بصيني أبقى اركبها بالشوكة والسكينة وخلاص بس أركب حاجة كويسة واسعة مريحة تقدي الغرض مرتاح . يا كدة يا أصغرها أكتر وأجيب ماروتي وخلاص ............. بس برضو دي غليت ؟؟؟؟؟؟؟؟ حاجة هم