أعلان بيو فيت بتاع نورا السباعى كدب فى كدب

طبعا أنا مش بحب أتفرج على التليفزيون خالص بسبب الأعلانات
و لما بتفرج على التليفزيون بشوف كام قناه كدة معينين عشان مش بييجى فيهم أعلانات كتيرة
و بالأخص قنوات الأخبار
من كام يوم كدة كنت قريت على النت أن نورا السباعى دى عملت عملية أسمها تدبيس معدة
و دى طبعا إلى خلتها رفيعة بالمنظر دة

لكن بطبيعة الحال و الفراغ حبيت أشوف كل القنوات و لقيت نورا السباعى و ركزت جدا فى أول ظهور لها أتارى نورا السباعى عاملة أعلان لمنتجات زى شاى دكتور مينج الصينى و الكلام الأهبل دة بس المرة دى أسمها بيو فيت و جه فى دماغى كدة ماهو أى واحد هيحط جنزبيل على كمون على قرفة على عرقسوس هيبقى بيساعد على التخسيس و كلها حاجات طبيعية و مش هتتعب

لكن اتأكدت من الموضوع دة إنهاردة لما لقيت الحكومة قبضت على صاحب الفكرة القذرة دى

و دة بيأكدلى أن الشعب المصرى بيمشى بمبدأ
.................................................. ..*

و على فكرة أنا حتى الأن مش مصدقه أن ممكن واحد يشوف أعلان و يمسك الموبايل و يتصل
دا يبقى بصراحة كلمة مينفعش أقولها :L_bhuhhh[1]:


بصوا الفيديو دة
‫أعلان بيو فيت لنورا السباعى كدب ونصب بالدليل‬‎ - YouTube


أية رأيكم فى التجارة فى مصر !!!

العضوة الفاضلة......الرجاء عدم ذكر مثل هذه الأمثلة لأن الرزق على الله.

م ع 3

رجاء تعديل العنوان وعدم اللجوء لهذا المثل لأن الرزق على الله تعالى
شكرا لحضرتك

هيا ممكن يكون ملهاش علاقة بالنصباية دي وطلبوها بس عشان تعمل اعلان

انا لما شفت الاعلان ده استغربت ازاي هي حست بالشكل ده

لكن اكيد مصدقتش ان بيو فيت ده هو اللي خسسها
وحاولت اوصل لاي معلومة ازاي هي خست كده معرفتش

فى ناس صدقوا و اشتروه
و لقوا الكبسولات فيها كمون

المهم ان كل واحد بينقد تصرفات الاخرين بمنتهي الشده ولكن لما تيجي علي تصرفاته بيلاقي الف حجه
في رأيي اكتر من95% من مواطني المحروسه يا اما كداب او معندوش ضمير او اخلاق

اقتباس:

---

المشاركة الأصلية كتبت بواسطة w-m-a

رجاء تعديل العنوان وعدم اللجوء لهذا المثل لأن الرزق على الله تعالى
شكرا لحضرتك

---

+++++++++++++++++++++++++1

بالتاكيد انه مش حقيقي
مجرد سياسة اعلان لخداع المشتري ..

الاعلانات دي بتعتمد على بيع وش القفص
بمعنى
فئة من الناس عندها السكر .. وتعبانة جدا في حياتها
ينزل إعلان كبيررررررررررر .. ويجيبو دكاترة يأكدو إن ده العلاج الشافي المعافي النهائي من السكــر
الناس تجرب من باب إنه يمكن يكون صحيح .. ويكون العلاج فيه الشفاء
تتباع 100.000 عبوة
يعملو سبوبة جامدة جداااا ------>الناس تكتشف ان المنتج أي كلام------> يبطلو يشتروه
يقومو عاملين منتج تاني للتخسيس------> الناس تشتري وتجرب------->يتباع 100.000 عبوة ------> يعملو سبوبة جامدة-------> الناس تكتشف ان المنتج أي كلام ويبطلو يشتروه

يقومو عاملين منتج تاني
الاصقة السحرية لعلاج كل حاجة
الناس تشتري ----> يتباع 100.000 عبوة -------> يتعمل من وراها سبوبة جامدة--------> الناس تكتشف انه اي كلام ويبطلو يشتروه


يقومو عاملين منتج تاني
إلخ
إلخ


وهما الي كسبانين كل مرة

لدرجة اني مرة أخدت بالي من ان الرقم واحد
يعني كان جه مرة إعلان لتقسيط أي حاجة .... سجلت الرقم
وشوية لقيت اعلان للاصقة السحرية تقريبا .. ولقيت هو هو نفس الرقم

دي شبكة كبيرة هدفها النصب المتغير
انصب عليه في حاجة ..او مايكشفها.. غيرها وانصب عليه في حاجة تانية .. اول مايكتشفها.. انصب عليه في حاجة تالتة


وأنا عندي قناعة
ان الشركات دي شغالة على ستات البيوت الفاضيين الي ماعندهمش عقل.. وقاعدين قدام التليفزيون ماسكين الموبايل وبيتصلو

ولاحول ولاقوة الا بالله

اقتباس:

---

المشاركة الأصلية كتبت بواسطة eng f3lix

هيا ممكن يكون ملهاش علاقة بالنصباية دي وطلبوها بس عشان تعمل اعلان

---

ما هى بتقول فى الاعلان ان المنتج ده هو الى خسسها

نورا السباعي برضه عليها مسئولية كبيرة
لان المفروض انها فنانة وعليها رسالة بتوجهها للناس
وهي استغلت ده بشكل سيء

مش عارف اصلا ازاي هي وافقت على اعلان زي ده مهما كانت المغريات
انا شايف انها برضه المفروض تحاكم معاهم

70 فى المئه من الشراكات ديه نصب فى نصب وشوفت المنتاجات بتاعتهم فعلا زى ماالدكتور احمد قال انهم فى الاول بيجيبو الحاجه صح الصح لاكن بعد كده كل حاجه بايظه كان من اول القلم السحرى بتاع العربيات ده كلنا سماعنا عنه انا شوفت القلم ده اقسم بالله قلم الكوريكتر احسن منه التانى ده طلعو بيجيبو من الموسكى محدش يستغرب انا اشتغل فى شركه من الشركات ديه اسبوع وشوفت كل الحاجات ديه وحزام الظهر الى بيقولك بتاع الفقرات ويقولك فى منه مقاسات كان اكبر مقاس منه يلبس عيل صغير او شاب رفيع جدااااااااااا وياريته بيعمل حاجه ده عامل زى عارفيين الحزام بتاع المسدس ؟ زيه بالظبط يعنى عيره تعال بقى لزيت السيرم ده بيقولو انه للشعر الابيض تعال افتح العلبه والله والله والله عباره عن صابغه سودا فعرفت ان 70 فى المئه من شركات التى فى شوب نصب فى نصب والى كان بيجننى ان ناس كتييييييييييييييييييير اوى بتكلمهم

انا زمان واحد حبيبي جابلي كريم من منتجات انه اسلان .... كريم للتخسيس كان فوووق الممتاز وفوق الوصف وكان اعشاب طبيعية بس مشكلتوا انو انتاجوا محدود. فكرت اجيبوا مصر وابيعوا بس المشكلة الي بيصنعوا. بيصنع كميات محدودة منوا وتقريباً استحالة دلوقتي تلاقيه في السوق الاوربية كان سعر العلبة ٩ دولار تقريباً بس فيها الشفه لو استمريت عليه بس انا مع الاسف مستمريتش لاني مبقيتش الاقيه يا خسارة وسايب جسمي زي ماتيجي تيجي بقه انا هحرم نفسي ليه. هو انا هعيش كام مره ...

على فكرة احب انوه عن حاجة
انا شوفت نورا السباعي شهر 2 اللي فات في حفلة افتتاح مسلسل ومؤتمر صحفي للنجوم المسلسل وهيا كانت مدعوة بحكم انها من الوسط .. وانا كنت هناك لان صاحبي كان مساعد المخرج
وكانت تقريبا زي ماهيا في الاعلان بتاع دلوقتي
واول ماشوفتها بصراحة استغربت جداً لانها كانت خست جامد جداً عن الاول
يعني افتكر ان اصلا المنتج ده ملوش علاقة باللي هيا بقت فيه والخسارة في الوزن اللي هيا خسرتها دي كلها

محدش طبعا يصدق موضوع ان المنتج هو الي خسسها
هو استغلال انها خست بس
هي أكيد خست بألف طريقة تانية ...

مع اني بحب البت دي جدا .. بس ماحترمتهاش لما عملت الاعلان ده

أولا سورى جدا على المثال أنا مكنتش فاكرة أنه ممكن يضايق الأعضاء لأنه بيتقال بعفوية زايدة
أو بمعنى أصح مع العفوية أنا متغاظة مش عشان بيكسبوا لأن دى حاجة بتاعة ربنا سواء حلال أو حرام و كل واحد يا أما هياخد ثوابة يا اما عقابة
أنا متغاظة و بوضح موقفى من أن فيه ناس جهله كتير خليت الناس دى تبقى رجال أعمال

ثانيا بما أنى متضامنه مع الفكر الأشتراكى شوية شايفة أن أحنا مجتمع أصلا فقير يبقى ليه يتم أستغلال الجهل الناتج عن التعليم و عن الثقافة بسرقة شعب فقير !!!

ثالثا بما أن فيه دكاترة كتير جدا فى المنتدى و ناس خريجين صيدليه زى أحمد فارما أنا عملت الموضوع دة عشان دة فى صميم مهنتهم

رابعا إلى تعبان من حاجة يروح يكشف عند دكتور يمكن حالته غير الحالات إلى بيتم عرضها على التليفزيون دا إذا كان المنتج أساسا سليم

خامسا لما يكون الطب و الصحة و العلاج فى أيد رجال أعمال و أحنا أصلا بلد بتعانى من الأهدار فى صحة المواطنين و معلش هاجى على جرح أحمد فارما شوية وهقولة مين المفروض يعمل الأدوية مش الصيدلى برضة ؟ طيب لو متابع ردى بالذمه و الدين أنتم أخدين حقكم ولا لأ ؟ و أية أخبار صناعة الأدوية المصريه ؟ و معلش كلمة ممكن تجرحه لكنى عارفة أنه مقدر الموقف جدا لأنى بتكلم فى مصلحة خريجين صيدله بصفة عامة أية رايك لما يتساوى تاجر بصيدلى و تتغير ثقافة الشعب أن التاجر دة بياع و الصيدلى بياع ؟ - و الأعلام و البرامج الأخباريه فى أيد ناس مدرستش أعلام - و الهندسه فى أيد مقاولين - شوية شوية ممكن نلاقى جراحين خريجين أداب و المدرسين خريجين شرطة

سادسا مين دلوقتى عنده حياء يبقى متطمن و هوا بيتفرج على التليفزيون ؟

لذلك يا جماعة محدش يزعل منى بسبب المثل و بكرر أسفى للمرة المليون بسبب المثل
و لكن ما فى وسعى أننا أقولة حاليا جملتين أتنين بس و مظنش أنها تضايق حد أطلاقا
"حسبى الله و نعم الوكيل فى تجار مشاكل الناس"
"ومن يتق الله يجعل له مخرجا ويرزقه من حيث لا يحتسب"

اقتباس:

---

المشاركة الأصلية كتبت بواسطة zkralla

ما هى بتقول فى الاعلان ان المنتج ده هو الى خسسها

---

ايوه كلام مضبوط.......
ومدام رضيت انها تشارك تبقى نصابة زيهم......
ربنا يحفظنا..

نسيت تظبط صوتها بالمرة ....

اقتباس:

---

المشاركة الأصلية كتبت بواسطة y a r i s

انا زمان واحد حبيبي جابلي كريم من منتجات انه اسلان .... كريم للتخسيس كان فوووق الممتاز وفوق الوصف وكان اعشاب طبيعية بس مشكلتوا انو انتاجوا محدود. فكرت اجيبوا مصر وابيعوا بس المشكلة الي بيصنعوا. بيصنع كميات محدودة منوا وتقريباً استحالة دلوقتي تلاقيه في السوق الاوربية كان سعر العلبة ٩ دولار تقريباً بس فيها الشفه لو استمريت عليه بس انا مع الاسف مستمريتش لاني مبقيتش الاقيه يا خسارة وسايب جسمي زي ماتيجي تيجي بقه انا هحرم نفسي ليه. هو انا هعيش كام مره ...

---

يا راجل كل واتهنى