الموضوع: ماذا تقفعل لو كنت فى هذا الموقف....

المشاركة الأصلية كتبت بواسطة benmatar

السلام عليكم
اللي حصل ده مبقاش غريب أو حاجة جديدة في المجتمع وعدى مرحلة الظاهرة وبقى شيء بيحصل بشكل يومي في مختلف أقطار مصر إلا بعض الأماكن مستحيل يحصل فيها كده، بس ده بقى شيء عادي تماما واكتر من كده بيحصل وهيحصل دوما وتكرارا الفترة المقبلة، وكلامي مش تشاؤم إطلاقا وإنما واقعية وأتمنى يكون كلام غلط وميحصلش بس ساعات الحقيقة بتوجع.
فاكرين كنا من فترة لما نسمع صوت طلقة مسدس كان الهلع بينتاب اهل الحي؟
ولما بنسمع صوت آلي بيضرب بقى الموضوع عادي ولا كأنه جرس بسكلتة !!!!
وحادثة سرقة عربية تخلينا قلقانين دلوقتي شقة الجيران يحصل عليها سطو مسلح والموضوع يتحكي كمغامرات سندباد !!!!
طبعا دور الداخلية أصبح منتهي بالمرة ويارب يكون كلامي غلط وتخاريف، بس التضاؤل فيه واضح، ويا فرحتي بكماين الحزام والرخص اللي بتتعمل عليا وعليك، يمكن حد قالهم إن مثل إضرب المربوط يخاف السايب هيفلح معاهم ومع سياستهم الفاشلة دي.
الأماكن اللي قلت مستحيل يحصل فيها كده تلاحظو إنها في الصعيد الجواني، لييييييييييييييه؟؟؟
عشان كل بيت أصغر سلاح فيه طبنجة، يعني مين مهفوف في عقله يدخل زريبة ولا جراج ولا دوار وهو يتعمل لانشون!!!!
والحي هناك كله عارف بعضه، وكونك غريب دخلت البلد تتعرف من أول لقطة.
وحصلت قصص واقعية خلال الفترة الماضية محدش تناها تاني لما دخل بلد أو قرية وحب يعمل فيها وحش كاسر، والأهالي طحنوه، وعشت موقف قبل كده لو كنا في القاهرة كنا باي باي، بس فوجئت طبعا بأهالي البلاد دي ومدى تعاونهم وتكاتفهم مع وجود ترسنة في كل بيت.
معلش محدش نفسه ياخد حقنة بس الضرورة تحتم إنك تتمرن وتعلم مراتك تشيله إزاي وتستخدمه إزاي وولادك كمان!!!
الحكاية مش سهلة.... ولا إيه؟؟ وأكيد كلنا سمعنا اللي مكناش فاكرين في يوم إننا نشوفه فيلم حتى... صح؟؟؟؟ وناس مننا اتعرضت لمواقف مش بتنساه من سنتين..... صح؟؟؟
طبعا هنا عتاة الإجرام والبلطجية عارفين إن النسبة العظمى من البيوت آخرها سكينة مطبخ أو سويس نايف.
يعني لو بقى السلاح في كل بيت إنسى سطو أو هتبقى حوادث نادرة، إيه اللي أنا بقوله ده؟؟
أيوة يا فندم كلامي صح، شوفت دول الخليج؟؟؟ عندهم الموضوع ده أمر عادي تماما وأغلبهم حائز على سلاح وبترخيص والوضع مقنن بحكمة، شوفتو أمريكا؟؟ طب الأردن؟؟ ومين كمان.... دول كتير الموضوع ده فيها عادي بس العملية تبقى بقوانين ... مش ببالغ ولا بهزر ده زي طفاية الحريق في البيت أو العربية.
ممكن يكون كلامي غريب بس فعلا لو اهل الحي والجيران متعاونتش وفضلنا كده حاطين عصاية مقشة ورا باب الشقة، يبقى السلام لأن محدش ينتظر من الداخلية جديد ولو خلال 5-6 سنين إن لم يكن التعاون والتواطؤ موجود حتى إنه باين من القصة اللي بدأت الموضوع عشان البيه بنظرة خارقة للحديدة يقولك معليهاش بصمات، وعارف إن اللوحات المعدنية بتتغير على نفس العربية، حلاوته هو واللي مشغلينه!!!!!

بص ياباشا .. انا ساكن فى منطقة قريبة من الاخت صاحبة الموضوع و عربيتى تعرضت لمحاولات سرقة مرتين تحت البيت منهم مرة شفت الحرامية بعينى قاعدين جوة عربيتى و ربنا ستر و عدت على خير .. بعد الحادثة التانية دى اللى شوفت الحرامية فيها قررت جديا انى اجيب سلاح و اللى هاييجى جنب العربية هاقتله .. لكن بعد التأنى و سؤال اكتر من ضابط من أصدقائى كلهم اجمعوا على انى ما اجيبوش و انى ممكن فى لحظة اروح فى 60 داهية بسببه .. قولت مش مهم و هاجيبه برضو و اللى يحصل يحصل .. بعدها على طول واحد صاحبى طلع عليه بلطجية (4 افراد كلهم معاهم رشاشات) و اخدوا عربيته بالاكراه و كان معاه سلاح و ماعملش اى حاجة -وكمان خدوا منه السلاح- قلت خلاص بقى الواحد يوفر فلوسه وربنا هو الحافظ لان ساعة القدر الموضوع كله بيخلص فى لحظات.