الحديث عن الحشيش ؟؟؟؟؟؟؟؟؟ هوه إنت مش عايش فى الدنيا ولا أيه يادكتور .... الحشيش فى مصر حالياً بقى زى السجائر بالظبط .. حضرتك فى شرم الشيخ حيث مكان عملى تجار الحشيش والمخدرات من البدو بيبعوه فى شوارع شرم الرئيسية وتحت أنظار الشرطة وبمنتهى السهولة ... وهذا المخدر تم إنتشارة فى مصر بصورة واسعة بين الشباب من الجنسين ولجميع الأعمار ..
من الآخر كان زمان اللى بيشرب حشيش بيستخبى .. دلوقتى من السهل جداً إنك تلاقى واحد ماشى فى الشارع وماسك فى أيده سيجارة الحشيش
نرجع لموضوعنا
أولاً الناس اللى فتشونى كانوا شرطة مش جيش
الشرطة زمان .. لو إنت ماشى فى الشارع ممكن كان يوقفك ويمسكك من قفاك ويفتشك ولو قلتله إنت بتفتشنى ليه هتلاقى الحفلة إتعملت عليك فورى
الشرطة حالياً ... لو إنت ماشى فى الشارع هيوقفك برده وهيستأذنك إنه يفتشك .. ولو قلتله ملكش حق تفتشنى .. مش هيرد عليك وهيفتشك برده .. ولو إعترضت بالقوة .. الحفلة هاتتعمل عليك برده .. وهيبقى إسمها مقاومة سلطات
قانون الطوارئ إتلغى ... بس الشرطة اللى قعدت عمرها كله تستخدم القانون ده علشان تنتهك حقوقك .. من غير القانون .. هتستأذنك علشان برده تنتهك حقوقك
بالنسبة لموضوع تفتيش السيارة .. أنا برده فكرت فى موضوع إنها ملكية خاصة زيها زى الشقة وملوش حق إنه يفتشها ... طب لو واحد شايل مخدرات أو سلاح هيعرفوا إزاى ... ولو إتفرجتو على البرامج الأجنبية هتلاقوهم بيفتشوا بدون إذن .. أعتقد إن السيارة يتم تفتيشها بدون الحاجة لإذن أياً كان المكان عند النفق أو فى أى مكان
بس هوه كده كده عموماً أنا مكنش معايا حاجة أخاف منها علشان أقوله متفتش وأعمل مشكلة من غير لازمة وأنا معرفش القانون بالظبط هل حقه إنه يفتش ولا لأ .... وعلى فكرة همه فتشوا العربية بس .. وكان برده ممكن يفتشنى أنا شخصياً .. وساعتها بصراحة أنا كنت هاعترض .. لأن منظرى كان هيبقى وحش أوى أدام نفسى وأدام الناس اللى واقفة ... وبرده معرفش القانون بيديله الحق فى حاجة زى كده ولا لأ ...
إحنا فعلاً محتاجين خبير قانونى يجاوبلنا على الأسئلة دى
وعلى فكرة أنا ملاحظ حاجة فى الشرطة اليومين دول ...
زمان كان بيعاملوك بروح القانون يا إما يعاملوك بقانون روح أمـ ......
دلوقتى بيعاملوك بالقانون بحذافيرة .. ولا مجال لروح القانون خالص .. بمعنى غلطت هاتتجلد وحتى لو غلطة ممكن التغاضى عنها .. مش هتتساب ... زى ميكونوا بيعاقبونا ...